بۇگىن قر عىلىم جانە جوعارى ءبىلىم ءمينيسترى ساياسات نۇربەك مەملەكەت باسشىسىنىڭ تاپسىرماسى بويىنشا جاس عالىمدارعا 10 پاتەر سەرتيفيكاتتارىن سالتاناتتى تۇردە تابىستادى.
پرەزيدەنتتىڭ 2024 جىلعى 31 مامىردا عىلىم ورداسىندا جاس عالىمدارمەن كەزدەسۋىندە بەرگەن تاپسىرماسىن ورىنداۋ ماقساتىندا عالىمداردىڭ الەۋمەتتىك مارتەبەسىن كوتەرۋ جانە قولداۋ كورسەتۋ، سونداي-اق عىلىمعا جاس كادرلاردىڭ كەلۋىن ىنتالاندىرۋ ءۇشىن رەسپۋبليكالىق كوميسسيا الماتى قالاسىندا باسپانا بەرۋ ءۇشىن مەملەكەتتىك ورگاندارعا ۆەدومستۆولىق باعىنىستى عىلىمي ۇيىمداردىڭ، جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ جاس عالىمدارىنىڭ كەزەكتى ءتىزىمىن ايقىندادى.
مينيستر ساياسات نۇربەك جاس عالىمدارمەن كەزدەسۋ بارىسىندا عىلىم مەن يننوۆاتسيانى دامىتۋ – ەل دامۋىنىڭ ەكونوميكالىق باعىتىنىڭ نەگىزگى باسىمدىقتارىنىڭ ءبىرى ەكەنىن ايتا وتىرىپ، مەملەكەت باسشىسىنىڭ قولداۋىمەن عىلىم سالاسىندا ايتارلىقتاي وزگەرىستەر بولعانىنا توقتالدى.
«مەملەكەت باسشىسى «عىلىم جانە تەحنولوگيالىق ساياسات تۋرالى» زاڭعا قول قويدى. جاس عالىمداردىڭ زەرتتەۋلەرىن گرانتتىق قارجىلاندىرۋعا ارنالعان كونكۋرستاردىڭ ناتيجەسىندە 1500 جوبا ىسكە اسىرىلۋدا. جىل سايىن الەمنىڭ جەتەكشى عىلىمي ورتالىقتارىندا 500 قازاقستاندىق عالىم تاعىلىمدامادان وتۋدە. الداعى ەكى جىلدا جاس عالىمداردىڭ زەرتتەۋىنە بولىنەتىن گرانت سانى تاعى دا كوبەيەدى. عىلىمي كادرلاردى الەۋمەتتىك قولداۋ تەك بار مامانداردى قولداپ قانا قويماي، عىلىمي-تەحنيكالىق پروگرەسكە ۇلەس قوسۋعا دايىن جاس عالىمداردىڭ جاڭا بۋىنىن تارتۋعا مۇمكىندىك بەرەدى. جاس عالىمداردىڭ كوبەيۋى ءوز كەزەگىندە عىلىمدى دامىتۋعا، زەرتتەۋ ناتيجەلەرىن كوممەرتسيالاندىرۋعا جانە جاڭا ەكونوميكالىق كلاستەرلەر قۇرۋعا ىقپال ەتەدى»، - دەدى ساياسات نۇربەك.
كەزدەسۋ بارىسىندا جاس عالىمداردىڭ اتىنان ءسوز سويلەگەن ۇلتتىق عارىشتىق زەرتتەۋلەر جانە تەحنولوگيالار ورتالىعىنىڭ ماتەريالتانۋ زەرتحاناسىنىڭ مەڭگەرۋشىسى لاۋرا مۇستافا ەلىمىزدە جاس عالىمدارعا كورسەتىلىپ جاتقان قولداۋ جايلى، عىلىمي-يننوۆاتسيالىق جوبالاردى جۇزەگە اسىرۋدا جاس ماماندارعا ارنالعان باعدارلامالار مەن مۇمكىندىكتەردىڭ كەڭەيتىلىپ جاتقاندىعىن اتاپ ءوتىپ، العىسىن ءبىلدىردى.
بۇگىن كوپتەن كۇتكەن جاڭا پاتەر سەرتيفيكاتىن العاندار قاتارىندا عالىمدار وتباسىسى دا بولدى. جاس عالىمدار ايدار مولداجانوۆ پەن اقمارال قۇلماحامبەتوۆا – فيلوسوفيا دوكتورلارى، PhD. «ءبىزدىڭ قۋانىشىمىزدى سوزبەن ايتىپ جەتكىزۋ قيىن. جاس عالىمدارعا وسىنداي بەرىلىپ جاتقان مۇمكىندىك ءۇشىن العىس بىلدىرەمىز! ەندى عالىمدار ءوز پاتەرلەرىندە تۇرىپ، تۇرعىن ءۇي ماسەلەسىن شەشۋگە الاڭداماي، عىلىمعا كوبىرەك ۋاقىت بولە الادى»، - دەپ ءبولىستى ولار.
قر عىلىم جانە جوعارى ءبىلىم مينيسترلىگى اعىمداعى جىلعى مامىر ايىنان باستاپ باسپاناعا مۇقتاج جاس عالىمداردىڭ (40 جاسقا دەيىن قوسا العاندا) ءتىزىمىن قالىپتاستىرۋ بويىنشا جۇمىس جۇرگىزۋدە. الماتى قالاسىندا ورنالاسقان مەملەكەتتىك ورگاندارعا ۆەدومستۆولىق باعىنىستى عىلىمي ۇيىمدار مەن جوعارى وقۋ ورىندارىنان 300-گە جۋىق ءوتىنىم كەلىپ ءتۇستى.
كەزدەسۋ سوڭىندا، مينيستر جاس عالىمداردى قولداۋ ماقساتىندا ۆەدومستۆو بۇل جۇمىستى كەزەڭ-كەزەڭىمەن جۇزەگە اسىراتىنىن، وسىنداي ناقتى شارالار ارقىلى ەلىمىزدەگى عىلىمدى جانە عالىمدار قاۋىمىن قولداۋ جۇمىسى الداعى ۋاقىتتا دا جالعاسىن تاباتىنىن اتاپ ءوتتى.
اتاپ وتەيىك، مەملەكەت باسشىسى 2024 جىلعى 31 مامىردا الماتى قالاسىنىڭ 10 جاس عالىمىنا تۇرعىن ءۇي سەرتيفيكاتتارى تابىستادى. سونىمەن قاتار 2023 جىلعى 19 قازاندا قر عىلىم جانە جوعارى ءبىلىم مينيسترلىگى مەن «وتباسى بانك» اق اراسىندا جاس عالىمدارعا 2023-2027 جىلدارعا ارنالعان جەڭىلدەتىلگەن كرەديت بەرۋ باعدارلاماسى بويىنشا ىنتىماقتاستىق تۋرالى كەلىسىمگە قول قويدى. قازىرگى ۋاقىتتا اتالعان باعدارلاما بويىنشا 290 جاس عالىم جەڭىلدىكپەن باسپانا الدى.
