"الماتى" تەلەارناسىنىڭ ءجۋرناليسى مادينا وقاس تالعار اۋدانى، داۋلەت اۋىلىنداعى وقۋشىلاردىڭ مۇشكىل ءحالىن ءسوز ەتىپ، دابىل قاقتى. ونىڭ ايتۋىنشا، 2017دە قۇرىلىسى باستالىپ، 2019دا پايدالانۋعا بەرىلۋى ءتيىس مەكتەپتىڭ جوندەۋ جۇمىستارى ءالى بىتپەگەن. بالالاردىڭ يگىلىگىنە بولىنگەن اقشا ورتا جولدا جوعالىپ، جاۋاپتىن جالتارعان اۋدان ماماندارى اقىر سوڭىندا جۋرناليستەردەن جالتارىپ، دارەتحاناعا بارىپ تىعىلعان. بۇل سوراقى جايدى "ادىرنا" ۇلتتىق پورتالى حابارلايدى.
مادينا وقاس ءوز جازباسىنىڭ باسىندا ار-ۇياتتان بەزگەندەرگە قاراتا تۇيرەي سويلەيدى:
- اعالار، ۇيات قايدا؟! تالعار اۋدانى داۋلەت اۋىلىنىڭ وقۋشىلارى ءۇش جىلدان بەرى ونلاين وقيدى. ويتكەنى، 2017-دە قۇرىلىسى باستالىپ، 2019-دا پايدالانۋعا بەرىلگەن مەكتەپتىڭ جوندەۋى بىتپەگەن. ەڭ سوراقىسى، بيۋدجەتتەن قۇرىلىسقا دەپ بولىنگەن 1,6 ملرد تەڭگەنىڭ قايدا كەتكەنىن ەشكىم اشىپ ايتا المادى. ايتپاق تۇگىلى، اۋدان اكىمدىگىنىڭ ماماندارى دارەتحاناعا تىعىلىپ، جاۋاپتان جالتارىپ ءجۇر!تالعار اۋدانى اكىمىنىڭ ورىنباسارىنا ءتىپتى ءسوز جوق! ءۇش رەسپۋبليكالىق تەلەارنانىڭ كەلىپ تۇرعانىن ءبىلىپ، "BBC, CNN-ءدى دە شاقىرىپ المادىڭىزدار ما؟", "كەلسەڭدەر، قۇتتى بولسىن، ەندى قايتەيىن؟",-دەپ شالا بۇلىنەدى. بۇل بەرگى جاعى... اۋديودا ءبارى جازىلعان، - دەدى جانكەشتى جۋرناليست.
كەيىننەن بالالار يگىلىگىنە بولىنگەن اقشانىڭ بوتەن باعىت، تەرىس توراپتا جۇمسالىپ، قولدى بولعانىنا كەيىس ءبىلدىردى.
- بەۋ، اعالاردىڭ ءبىرازىنىڭ بەتىن تىلسە قان شىقپايدى عوي قازىر! باسقا-باسقا، بالاعا دەپ بولىنگەن قارجى ەدى عوي ول! 700-دەن استام وقۋشىنىڭ وبالى كىمگە؟ بىرەر اي بۇرىن مينيستر ايماعامبەتوۆ كەلىپ، تاپسىرما بەرىپتى. وعان دەيىن نەگە ارەكەت ەتۋگە بولمادى؟ ودان كەيىنگى ناتيجە قايسى؟ اكىمدىك وكىلى "1 ايدا ترۋبا توسەلەدى، بالالاردى وفلاينعا اۋىستىرامىز",-دەيدى. الماتىدان ارنايى كەلگەن مەن ءبىلىپ تۇرمىن شارۋانىڭ 1 ايدا بىتپەيتىنىن. بىلىقتىڭ ورتاسىندا ءجۇرىپ بۇلار كىمگە ەرتەگى ايتادى؟! قايدار ءابدىحانوۆ وزىڭىزگە دە حابارلاستىق، ايتۋىڭىز بويىنشا ارەكەت قىلدىق. مۇرتى قيسايماعان ماماندارىڭىزدىڭ مازاعىنا قالا بەرەر جاي جوق. ءتۇزۋ سۇراققا ءتۇزۋ جاۋاپ بەرۋدى ۇيرەنسىن! - دەپ جازدى مادينا وقاس.
مەكتەپ نىسانىنا تاپسىرىس بەرۋشى - "تالعار اۋدانى قۇرىلىس ءبولىمى" مم 2017 جىلدىڭ 23 قاراشاسىندا "ەلامان" جشس-مەن 1 ميللياردقا كەلىسىمشارت جاساسقان. جوبالاۋشى - "نۇر-قۇرىلىس-80" جشس. مەكتەپتى جابدىقتاۋعا 71 ميلليون تەڭگە بولىنگەن. الايدا، داۋلەت اۋىلىنىڭ بالالارى مەكتەپ قابىرعاسىن كورمەگەلى 3 جىلدان استى.
"تالعار ءجونى ءتۇزۋ اكىمگە جارىمادى", "BBC, CNN-گە شىققىسى كەلسە، شىعادى ءبىر كۇنى. “ۇيالعان تەك تۇرماس” دەگەن سول. جۋرناليستەردى كەكەتىپ-مۇقاتقانشا، الدىنداعى جۇمىسىن ىستەمەي مە ەكەن؟!.", "ار-ۇياتتان بەزگەندەر" دەپ جازدى وقىرماندار.
"ادىرنا" ۇلتتىق پورتالى
