"Almaty" telearnasynyń jýrnalısi Madına Oqas Talǵar aýdany, Dáýlet aýylyndaǵy oqýshylardyń múshkil hálin sóz etip, dabyl qaqty. Onyń aıtýynsha, 2017de qurylysy bastalyp, 2019da paıdalanýǵa berilýi tıis mekteptiń jóndeý jumystary áli bitpegen. Balalardyń ıgiligine bólingen aqsha orta jolda joǵalyp, jaýaptyn jaltarǵan aýdan mamandary aqyr sońynda jýrnalısterden jaltaryp, dárethanaǵa baryp tyǵylǵan. Bul soraqy jaıdy "Adyrna" ulttyq portaly habarlaıdy.
Madına Oqas óz jazbasynyń basynda ar-uıattan bezgenderge qarata túıreı sóıleıdi:
- Aǵalar, uıat qaıda?! Talǵar aýdany Dáýlet aýylynyń oqýshylary úsh jyldan beri onlaın oqıdy. Óıtkeni, 2017-de qurylysy bastalyp, 2019-da paıdalanýǵa berilgen mekteptiń jóndeýi bitpegen. Eń soraqysy, bıýdjetten qurylysqa dep bólingen 1,6 mlrd teńgeniń qaıda ketkenin eshkim ashyp aıta almady. Aıtpaq túgili, aýdan ákimdiginiń mamandary dárethanaǵa tyǵylyp, jaýaptan jaltaryp júr!Talǵar aýdany ákiminiń orynbasaryna tipti sóz joq! Úsh respýblıkalyq telearnanyń kelip turǵanyn bilip, "BBC, CNN-di de shaqyryp almadyńyzdar ma?", "Kelseńder, qutty bolsyn, endi qaıteıin?",-dep shala búlinedi. Bul bergi jaǵy... Aýdıoda bári jazylǵan, - dedi jankeshti jýrnalıst.
Keıinnen balalar ıgiligine bólingen aqshanyń bóten baǵyt, teris torapta jumsalyp, qoldy bolǵanyna keıis bildirdi.
- Beý, aǵalardyń birazynyń betin tilse qan shyqpaıdy ǵoı qazir! Basqa-basqa, balaǵa dep bólingen qarjy edi ǵoı ol! 700-den astam oqýshynyń obaly kimge? Birer aı buryn mınıstr Aımaǵambetov kelip, tapsyrma beripti. Oǵan deıin nege áreket etýge bolmady? Odan keıingi nátıje qaısy? Ákimdik ókili "1 aıda trýba tóseledi, balalardy oflaınǵa aýystyramyz",-deıdi. Almatydan arnaıy kelgen men bilip turmyn sharýanyń 1 aıda bitpeıtinin. Bylyqtyń ortasynda júrip bular kimge ertegi aıtady?! Qaıdar Ábdihanov ózińizge de habarlastyq, aıtýyńyz boıynsha áreket qyldyq. Murty qısaımaǵan mamandaryńyzdyń mazaǵyna qala berer jaı joq. Túzý suraqqa túzý jaýap berýdi úırensin! - dep jazdy Madına Oqas.
Mektep nysanyna tapsyrys berýshi - "Talǵar aýdany qurylys bólimi" MM 2017 jyldyń 23 qarashasynda "Elaman" JShS-men 1 mıllıardqa kelisimshart jasasqan. Jobalaýshy - "Nur-Qurylys-80" JShS. Mektepti jabdyqtaýǵa 71 mıllıon teńge bólingen. Alaıda, Dáýlet aýylynyń balalary mektep qabyrǵasyn kórmegeli 3 jyldan asty.
"Talǵar jóni túzý ákimge jarymady", "BBC, CNN-ge shyqqysy kelse, shyǵady bir kúni. “Uıalǵan tek turmas” degen sol. Jýrnalısterdi keketip-muqatqansha, aldyndaǵy jumysyn istemeı me eken?!.", "Ar-uıattan bezgender" dep jazdy oqyrmandar.
"Adyrna" ulttyq portaly
