كىسى قولىنان قازا تاپقان شەرزات بولاتتىڭ ءۇيى سەنبىگە قاراعان ءتۇنى ورتەنگەن. مارقۇمنىڭ تۋعان-تۋىستارى وقيعانىڭ قالاي بولعانىن ايتتى، دەپ حابارلايدى “ادىرنا” ۇلتتىق پورتالى.
ۇلىسمەديا جاريالاعان اقپاراتتا ءورت شامامەن تۇنگى 00.30 ۋاقىتىندا بولعانى كورسەتىلگەن. قىزىل جالىن شارپىعاندا ۇيدە ەشكىم بولماعان.
مارقۇمنىڭ تۋعان-تۋىستارى شەرزاتتىڭ قازاسىنان سوڭ قارا شاڭىراقتا بولعان. ورتتەن مال امان قالعان. ال ءيتتى كۇيىك شالىپتى.
ۇلىسمەدياعا وقيعانىڭ ءمان-جايىن قارجاۋباي نۇرىموۆتىڭ قارىنداسى ايتىپ بەرگەن.
“قارجاۋبايدىڭ ءوزى بىردەڭە دەيتىندەي جاعدايدا ەمەس.
سوڭعى ءۇش كۇندە شەرزاتتىڭ سىنىپتاستارى “كوشەلەرىڭىزدە ءنومىرى جوق كولىكتەر ءجۇر” دەدى. ءورت بولماي ءبىر كۇن بۇرىن كورشىلەر ء“سىزدىڭ ۇيلەرىڭىزگە ءنومىرى جوق كولىكپەن كەلگەندەر كىرىپ شىقتى، ءبىز شۋلاپ، ءبارىمىز جارىقتى جاقتىق، ايعايلاپ ەدىك، توقتاماستان قاشىپ كەتتى” دەپ حابار بەردى. مەكتەپ بالالارىنىڭ ءبارى دە ءبىر اۋىلدان بولعان سوڭ كىمنىڭ قانداي كولىكتى ايدايتىنىن بىلەمىز دەپ وتىر. بالالار “ىشىندەگى ادامدار دا بەيتانىس، امانداسايىق دەپ قاسىنا بارىپ ەدىك، تەرەزەنى جاۋىپ الىپ، توقتاماي ءوتىپ كەتتى” دەدى. سوڭعى ءۇش كۇندە “كولىكتەر ءجۇر” دەگەندى ەستىدىك. ءىىم-گە بارىپ، كەلگەننەن بەرى وسىلاي بولىپ جاتىر، – دەيدى قارىنداسى.
مارقۇمنىڭ تۋىس اپكەسى پەريزات نۇرىموۆا رەسمي ورگاندار ءوز جۇمىسىن دۇرىس اتقارماعانىن ايتقان.
“قاراستىرىپ جاتىر. سونىڭ “ارقاسى”. ءىىم-ءنىڭ، تالعار، وبلىس اكىمدىگىنىڭ “قاراستىرىپ، كۇشتى جۇمىس اتقارىپ جاتقاندارىنىڭ ارقاسى”. ۇيدەن ايىرىلىپ قالدىق. ءۇيدى قويشى، جانىمىز امان. بۇعان دەيىن كۇزەت قويىلعان جوق. ۇيگە قويماي-اق قويسىن، جوق دەگەندە اۋىلدىڭ باسىنا قويىپ بەرسىن. كىمنىڭ كىرىپ شىعىپ جاتقانىن ءبىلسىن. قاراپايىم حالىق بولىپ، جولدان وتكەن كولىكتى توقتاتىپ، “كىمسىڭ” دەپ سۇراي بەرسەك، ەسى دۇرىس ەمەس دەپ ويلايدى عوي. ۇستالعان ادامداردىڭ، سول جاقتان شىققان ادامداردىڭ بارىنە كولىك قويىپ بەرىپ قويىپتى. اۋىلعا كىرە بەرىستە كولىك قويىپتى. سوندا ءبىز جانىمىز شىعىپ وتىرعاندا بىرەۋدىڭ جانىن الۋعا شامامىز جەتە مە؟ مامامىزدىڭ ءوزى ءبىر قۇلاپ، ءبىر ەسىن جيىپ وتىر. زاڭ وكىلدەرىنە ويلانۋعا بولادى عوي. بۇگىن توپىرلاپ ءبارى ءجۇر. جۇرگەننەن نە پايدا؟ ءبارى بىتكەن سوڭ! قالعانىمىزدىڭ جانىمىزدى الىپ كەتكەنىن كۇتەمىز بە؟ ءسويتىپ، ءبىر توبە بولىپ، ءۇيىپ قويايىن دەگەن شىعار؟ زاڭ وكىلدەرى جۇمىس ىستەسە بۇلاي بولمايدى! ءبىزدىڭ پرەزيدەنت قاسىم-جومارت كەمەلۇلى زاڭ وكىلدەرى قالاي جۇمىس ىستەيتىنىن كورسىن! سول كىسىنىڭ قول استىندا باسشى بولىپ، جۇمىسشىلارىنىڭ ءىس-ارەكەتى وسى!” – دەيدى ول.
شەرزاتتىڭ اكەسى اۋىل ماڭىنا كۇزەت قويۋدى سۇراعان. الايدا قۇزىرلى ورگان بۇل جاعدايدى ەسكەرمەگەنى دە ايتىلدى.
“جىلاپ-سىقتاپ بولدىق. ەندى قويا سالمايمىز. اقىرىنا دەيىن بارامىز”، – دەيدى پەريزات نۇرىموۆا.
