اقتاۋ قالاسىنداعى نازارباەۆ زياتكەرلىك مەكتەبىندە «Samgau» تۇلەكتەر فورۋمى ءوتتى.
Alumni NIS بىرلەستىگى ۇيىمداستىرعان شارانىڭ باستى ماقساتى تۇلەكتەر مەن وقۋشىلار اراسىندا بايلانىس ورناتىپ، نازارباەۆ زياتكەرلىك مەكتەبى وقۋشىلارىنىڭ كاسىبي دامۋىنا ۇلەس قوسۋ. فورۋم استانا، الماتى، شىمكەنت، پاۆلودار، تاراز، اقتاۋ، وسكەمەن، سەمەي، قوستاناي، اتىراۋ، قىزىلوردا قالاسىنداعى NIS مەكتەپتەرىندە ءوتتى.
فورۋمنىڭ اشىلۋ سالتاناتىندا Alumni NIS پرەزيدەنتى جانەل سابدەنوۆا «Giving» كونتسەپتسياسىنا توقتالىپ، وقۋشىلار مەن تۇلەكتەرگە ونىڭ ماڭىزدىلىعىن ءتۇسىندىردى.
اقتاۋداعى NIS-ءتىڭ العاشقى تۇلەكتەرى دە بۇل شارادان تىس قالمادى. 2017 جىلى زياتكەرلىك مەكتەپ تۇلەگى اتانعان ەسەت سيدەشوۆ «Samgau» تۇلەكتەر فورۋمىنا قاتىسىپ، مەكتەپكە دەگەن ساعىنىشىن جەتكىزدى.
“سۇيىكتى نازارباەۆ زياتكەرلىك مەكتەبىمنىڭ تۇلەگى اتانعانىما 5 جىل بولىپتى. مەكتەپتەن العان بىلىمىمەن قازاقستانداعى ۇزدىك ۋنيۆەرسيتەتتىڭ تۇلەگى اتاندىم. بۇگىن تۇلەكتەر فورۋمى ارقاسىندا مەكتەپكە قايتا ورالىپ، ءتالىم بەرگەن ۇستازدارىممەن قاۋىشقانىما قۋانىشتىمىن”،- دەيدى 2017 جىلعى تۇلەگى ەسەت سيدەشوۆ
ەسەت مەكتەپتىڭ العاشقى تۇلەكتەرىنىڭ ءبىرى، ءارى ءوزىن ءوزى باسقارۋ ۇيىمىنىڭ تۇڭعىش پرەزيدەنتى بولعان ۇزدىك وقۋشى. ول 2021 جىلى قازاقستان-بريتان تەحنيكالىق ۋنيۆەرسيتەتىن اياقتاپ، قازىرگى تاڭدا ق.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتىندە ماگيستراتۋرادا ءبىلىم الىپ جاتىر.
فورۋمعا قاتىسقان تۇلەكتەر اراسىندا شەتەلدە ءبىلىم الىپ جاتقان ستۋدەنتتەر دە بار. سولاردىڭ ءبىرى اقتاۋداعى NIS-ءتىڭ 2022 جىلعى تۇلەگى ءامينا شايدۋللينا. ءامينا قازىرگى تاڭدا شۆەيتسارياداعى فرانكلين ۋنيۆەرسيتەتىندە ءبىلىم الىپ جاتىر.
“نازارباەۆ زياتكەرلىك مەكتەبى ماعان شەتەلدە ءبىلىم الۋىما مۇمكىندىك بەردى. سوندىقتان ەندىگى كەزەك بىزگە كەلگەن سەكىلدى. «Samgau» فورۋمىنىڭ اياسىندا بۇگىن فرانكلين ۋنيۆەرسيتەتىندە الىپ جاتقان بىلىمىمەن، شەتەلگە وقۋعا تاپسىرۋداعى تاجىريبەممەن وقۋشىلارمەن ءبولىستىم”، - دەيدى ءامينا
ايتا كەتەيىك، ءامينا شايدۋللينا مەكتەپ تاريحىندا شۆەيتساريالىق ۋنيۆەرسيتەتتىڭ شاكىرتاقىسىنا يە بولعان العاشقى ستۋدەنت.
«Samgau» فورۋمىنىڭ باعدارلاماسىنا سايكەس تۇلەكتەر ءار ءتۇرلى سالا بويىنشا سەسسيالار جۇرگىزدى. سەسسيادا وقۋعا تۇسۋمەن قاتار ماماندىق پەن ۋنيۆەرسيتەتتى تاڭداۋداعى تاجىريبەلەرىمەن ءبولىستى. شارا سوڭىندا زياتكەرلەر مەن تۇلەكتەر اراسىندا ۆولەيبولدان جولداستىق كەزدەسۋ ءوتتى.
