قاراعاندىدا «تاۋەلسىزدىك بەلگىسىنىڭ» تۇساۋكەسەرى وتەدى

2697
Adyrna.kz Telegram

16 جەلتوقسان – قازاقستان رەسپۋبليكاسىنىڭ تاۋەلسىزدىك كۇنىنە وراي قاراعاندىدا «قازاق حالقىنىڭ مۇراسى» كىتاپتار سەرياسىنىڭ Qazaq club باستاماسىمەن «تاۋەلسىزدىك بەلگىسىنىڭ» تۇساۋكەسەرى وتەدى، دەپ جازادى “ادىرنا” ۇلتتىق پورتالى.

بيىل كوپشىلىككە ۇسىنىلعالى وتىرعان «تاۋەلسىزدىك بەلگىسى» وسىعان دەيىن 2020 جىلى جارىق كورگەن «تاۋەلسىزدىك لەنتاسىنىڭ» نەگىزىندە جاسالدى. توسبەلگىنىڭ ورتاسىندا قازاقستان رەسپۋبليكاسىنىڭ قازىرگى جەر اۋماعىن بەينەلەيتىن كارتا كورىنىس تاپقان. سونىمەن قاتار قازاقستان اۋماعىن ءبىزدىڭ جىل ساناۋىمىزعا دەيىن 5-4 عاسىرلاردا مەكەن ەتكەن ساقتاردىڭ ەسىك قورعانىنان تابىلعان التىن ادامى بەينەلەنگەن. بۇل قازاق تاريحىنىڭ ساقتار زامانىمەن بايلانىستى ەكەنىن بىلدىرەدى. بۇدان كەيىن بەلگىدە عۇندار مەملەكەتىنىڭ نەگىزىن قالاعان مودە قاعان جانە عۇن مەملەكەتتىلىگىنىڭ شاڭىراعى كوتەرىلگەن ب.ز.د 209 جىل كورىنىس تاپقان. «تاۋەلسىزدىك بەلگىسىندەگى» كەلەسى ايتۋلى داتا 552 جىل، ياعني تۇركى قاعاناتى قۇرىلعان جىل جانە ونىڭ سيمۆولى ءبورىلى بايراق بەينەلەنگەن.

بۇدان كەيىن قازاق حاندىعىنىڭ شاڭىراعى كوتەرىلگەن 1465 جىل مەن كەرەي مەن جانىبەك حاندار سالىنعان. تاۋەلسىزدىك بەلگىسىندەگى كەلەسى كورنەكتى تۇلعا ءۇش ءجۇزدىڭ باسىن قوسقان حانداردىڭ حانى ۇلى ابىلاي حان مەن ول سايلانعان 1771 جىل، ۇلتىمىزدىڭ تاۋەلسىزدىگى ءۇشىن كۇرەسىپ وتكەن جانە قازاق حاندىعىن قالپىنا كەلتىرگەن كەنەسارى قاسىمۇلى حان اتانعان 1841 جىل جانە الاش كوسەمى ءاليحان بوكەيحان باستاعان الاشوردا ۇكىمەتى قۇرىلعان 1917 جىل بەينەلەنگەن. «تاۋەلسىزدىك بەلگىسىنىڭ» جوعارعى جاعىندا قازاقستان رەسپۋبليكاسى تاۋەلسىزدىگى جاريالانعان 1991 جىل كورىنىس تاپقان.

كوتەرىلىپ كەلە جاتقان كۇن قازاق حالقى ءۇشىن جاڭا ءداۋىردىڭ كەلگەنىن، ال اشىلىپ تۇرعان كىتاپ ەلىمىزدىڭ بولاشاعى عىلىم – بىلىمدە جاتقاندىعىنا مەڭزەيدى. تاۋەلسىزدىك بەلگىسىنىڭ ءون بويىنداعى ۇلتتىق ويۋ-ورنەك ءبىزدىڭ ۇلتتىق مادەنيەتىمىز بەن بولمىسىمىزدى ارۋاقىتتا كوزدىڭ قاراشىعىنداي ساقتاۋعا ۇندەيدى. ەل يگىلىگىنە باعىتتالعان بۇل جوبانى قارجىلاندىرعان «Qazaq club». «تاۋەلسىزدىك بەلگىسى» كەۋدەنىڭ سول جاعىنا جۇرەك تۇسىنا تاعىلادى.

«تاۋەلسىزدىك بەلگىسىن» تاعىپ ءجۇرۋ ءاربىر ازامات ءۇشىن ۇلكەن جاۋاپكەرشىلىك ەكەنىن ەستە ساقتاۋ كەرەك. بەلگىنىڭ يەگەرى وندا بەينەلەنگەن ۇلى تۇلعالاردىڭ جولىن جالعاستىرۋعا، ساقتاۋعا، ونى جاس ۇرپاققا ناسيحاتتاۋعا اتسالىسۋعا مۇمكىندىگى كەلگەنشە تىرىسۋى كەرەك.«تاۋەلسىزدىك بەلگىسى» قازاقستان رەسپۋبليكاسىنىڭ مەملەكەتتىك مەرەكەلەرى كۇندەرى، سالتاناتتى شارالاردا تاعۋعا ارنالعان. سونداي-اق بەلگىنى ەل تاريحىنا قۇرمەت ءبىلدىرۋ ماقساتىندا كۇندەلىكتى تاعۋعا دا بولادى – دەيدى «تاۋەلسىزدىك بەلگىسىنىڭ» اۆتورى ن.سۇرشاۇلى. 

تاۋەلسىزدىك بەلگىسىندە قازاق تاريحىنا ەسىمدەرى التىن ارىپپەن جازىلعان 5 تاريحي تۇلعا مەن 8 تاريحي داتا، قر جەر اۋماعىن بەينەلەيتىن كارتا مەن تۇركى قاعاناتىنىڭ ءبورىلى بايراعى جانە ۇلتتىق ويۋ-ورنەك كورىنىس تاپقان.

“ادىرنا” ۇلتتىق پورتالى

پىكىرلەر