اقپارات جانە قوعامدىق دامۋ ءمينيسترى دارحان قىدىرالى "ەل بىرلىگى" تikTok house جوباسىنىڭ قاتىسۋشىلارىمەن كەزدەسىپ، كرەاتيۆتى جاستاردى ارقاشان قولداۋعا دايار ەكەنىن جەتكىزدى، دەپ جازادى "ادىرنا" ۇلتتىق پورتالى.
"مادەني جانە تاريحي قۇندىلىقتاردى، مادەنيەتارالىق ديالوگتى ناسيحاتتاۋدا بۇل جوبانىڭ ءمانى مەن ماڭىزى زور. بۇگىنگە دەيىن جاستاردىڭ تيك-توك-تاعى قايتالانباس قىزىقتى بەينەروليكتەرى التى جارىم ميلليوننان استام كورىلىم، ءتورت ءجۇز جەتپىس مىڭنان اسا «لايك» جيناعان ەكەن. بۇل ولاردىڭ ەڭبەكتەرىنىڭ كوپشىلىك تاراپىنان جوعارى باعالانىپ جاتقاندىعىنىڭ ايقىن دالەلى.الداعى ۋاقىتتا كورسەتكىش سانى ودان دا ارتارىنا سەنىمىمىز مول. ويتكەنى جاستارىمىز جارقىن يدەيالارىنىڭ جۇزەگە اسۋىنا جان-تانىمەن، بار كۇش-جىگەرىن جۇمساپ جاتقانىن كورىپ-بايقاپ وتىرمىز.تيك-توك بۇگىندە ميللياردتاعان قولدانۋشىسى بار الەمدەگى ەڭ تانىمال پلاتفورمالاردىڭ ءبىرى. ءبىزدىڭ ەلدە تيك-توك قولدانۋشىلارى اراسىندا قازاق تىلىندەگى كونتەنتكە سۇرانىس ارتىپ وتىر. وسى ورايدا، جاقىندا ەلىمىزدە تيك-توك كومپانياسىنىڭ وڭىرلىك ءوفيسى اشىلعانىن تاعى دا تىلگە تيەك ەتكىم كەلەدى. تيك-توك كەڭسەسىنىڭ اشىلۋى وسى پلاتفورمانىڭ بەلسەندى قولدانۋشىلارىنا كوپتەگەن مۇمكىندىك بەرەتىنى ءسوزسىز.ءبىز ءوز تاراپىمىزدان قازاق ءتىلدى كونتەنتتەردى دامىتۋعا، جاڭا ساپاعا كوتەرۋگە بايلانىستى جۇمىستاردى جالعاستىرا بەرەمىز. ماسەلەن، جاقىندا ەلوردادا وتەتىن ورتالىق ازيا مەديا فورۋمىنا YouTube ارناسىندا 18 ميلليوننان استام جازىلۋشىسى جانە 5 ميللياردتان استام قارالىمى بار، وزدەرىڭىزگە بەلگىلى D Billions مۋزىكالىق توبى كەلەدى. ولاردىڭ ەلىمىزگە كەلۋى ماڭىزدى وي الماسۋلار مەن جاڭا مۇمكىندىكتەرگە جول اشادى دەگەن ۇمىتتەمىز. جاستار – قوعامنىڭ بارلىق سالاسىنداعى ەڭ باستى قوزعاۋشى كۇش. ءبىز ءوز تاراپىمىزدان كرەاتيۆتى جاستاردى ارقاشان قولداۋعا دايىنبىز",- دەپ جازدى مينيستر ءوزىنىڭ فەيسبۋك پاراقشاسىندا.
"ادىرنا" ۇلتتىق پورتالى
