ەكىباستۇز قالاسىندا جىلۋسىز وتىرعان ءالى 11 تۇرعىن ءۇي بار. بۇگىن قاس قارايعانشا بارلىق شاڭىراققا جىلۋ جەلىلەرى جالعانىپ، اپاتتىق جاي-كۇي رەتتەلەدى، دەپ حابارلايدى "ادىرنا" ۇلتتىق پورتالى.
توتەنشە جاعدايدى جويۋ جونىندەگى جەدەل شتاب ەكىباستۇز قالاسىندا اپاتتىق جاعدايدى قالپىنا كەلتىرۋ جۇمىستارىن جالعاستىرىپ جاتىر. بۇل جايلى "UKIMET" Telegram-ارناسى حابارلادى.
4 جەلتوقسان، تاڭعى ساعات 08:00-دەگى احۋال بويىنشا ايتار بولساق، 11 ءۇيدىڭ جىلۋ جەلىلەرى جوندەلىپ جاتىر.
جىلۋ جۇيەسىنە قوسىلۋعا دايىن ۇيلەردە قۇبىرلار مەن رادياتورلار اۋىستىرىلۋ ۇستىندە. سونىمەن قاتار سۋمەن جانە جىلۋمەن جابدىقتاۋ جۇيەلەرىن جوندەۋ جۇمىستارى جۇرىۋدە.
نەگىزىنەن العاندا، ەكىباستۇز قالاسىندا بارلىعى 689 كوپ قاباتتى ءۇي بار. ونىڭ ىشىندەگى جىلۋسىز قالعان 11 ۇيگە كەشكى ۋاقىتقا دەيىن جىلۋ بەرۋ جوسپارلاندى.
جوندەۋ-قالپىنا كەلتىرۋ قىزمەتىنە 500-گە جۋىق ادام جۇمىلدىرىلدى.
"ادىرنا" ۇلتتىق پورتالى
