قاڭتارداعى قىرعىن كەزىندە "قارۋدى زاڭسىز يەمدەندى", "قارۋدى زاڭسىز ۇستادى", "بيلىك وكىلىنە كۇش كورسەتتى" دەپ ايىپتالىپ، 16 جىلعا سوتتالعان تاراز تۇرعىنى ەربول جۇمانوۆ تەرگەۋ يزولياتورىندا ءوز دەنەسىنە جاراقات سالدى. بۇل اقپاراتتى ءبىرىنشى بولىپ الەۋمەتتىك جەلىدە قۇقىق قورعاۋشى رينات رافكات جاريالاعان دەپ حابارلايدى "ادىرنا" ۇلتتىق پورتالى "ازاتتىق راديوسىنا" سىلتەمە كورسەتە وتىرىپ.
ەربول جۇمانوۆتىڭ ءوز دەنەسىن جاراقاتتاعانىن ادۆوكاتى جالعاس ساپارحانوۆا راستادى. اقپاراتقا قاراعاندا، جۇمانوۆ سوت ۇكىمىنە قارسى بولعان.
ادۆوكاتتىڭ ايتۋىنشا، وقيعا 6 كۇن بۇرىن بولعان. سول ءۇشىن ول جەكە كامەراعا قامالعان. ازىرگە ونىڭ دەنساۋلىعى تۋرالى مالىمەت جوق.
تارازداعى تەرگەۋ يزولياتورى باستىعىنىڭ ورىنباسارى تيمۋر ساندىباەۆ جۇمانوۆتىڭ مۇنداي ارەكەتكە بارعانىن راستادى. ونىڭ ايتۋىنشا، "جاراقات سالعانى ءۇشىن" تاعايىندالعان قاماۋ مەرزىمى اياقتالعان. "دەنساۋلىعىنا ەش قاۋىپ جوق" دەدى ول.
جۇمانوۆتىڭ ءىسى بويىنشا اپەللياتسيالىق وتىرىس 29 ماۋسىمعا بەلگىلەنگەن. 28 ساۋىردە تاراز سوتى قاڭتار وقيعاسىنا بايلانىستى ايىپتالعان ءتورت ادامعا تۇرمە جازاسىن بەرگەن. ءتورت ادامنىڭ ىشىندە ەڭ ۇزاق جازا وسى ەربول جۇمانوۆقا بەرىلگەن ەدى.
جۇمانوۆ قاڭتار كەزىندە قارۋ العانىن مويىنداعانمەن "ادام ولتىرمەدىم" دەگەن.
"قارۋدى مەن ساعات 16.00-دە العانمىن، ال قازا تاپقان ادامعا وق 15.18-دە تيگەن. مەنى جازىقسىز تۇرمەگە جاۋىپ جاتىر" دەگەن ەدى ول سوتتا.
رەسمي مالىمەت بويىنشا، قاڭتار وقيعاسى كەزىندە تارازدا 15 ادام مەرت بولعان. ال بۇكىل قازاقستان بويىنشا كەمى 238 ادام قازا تاپقان.
"ادىرنا" ۇلتتىق پورتالى
ۇقساس جاڭالىقتار
