شىمكەنتتىڭ تۇرعىنى نۇرسۇلتان جاقسىبەك 18 جاسقا تولعان تۋعان كۇنىن سايلاۋ ۋاسكەسىندە داۋىس بەرۋدەن باستادى.
– مەن بۇگىن 18 جاسقا تولدىم. سايلاۋ 20 قاراشادا بولاتىنىن ەستىگەندە، مەن سول كۇنى 18 جاسقا تولامىن عوي دەپ ويلاپ قويىپ ەدىم. ءدال سول كۇنى داۋىس بەرە الامىن با دەپ سۇراپ الدىم. بەرە الادى ەكەنمىن. تۋعان كۇنىمنىڭ ەلىمىزدە بولىپ جاتقان تاريحي كۇنمەن تۇسپا-تۇس كەلگەنىنە قۋانىشتىمىن. بۇل مەنىڭ ومىرىمدە دە ەستە قالارلىق كۇن بولىپ قالادى، – دەدى مۇحتار اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ ستۋدەنتى نۇرسۇلتان جاقسىبەك.
ايتا كەتسەك، شىمكەنت قالاسىندا ورنالاسقان 38 كوللەدج بەن 8 جوعارعى وقۋ ورنىندا نۇرسۇلتان جاقسىبەك سياقتى 120 مىڭنان استام ستۋدەنت ءبىلىم الىپ جاتىر. ولاردىڭ ىشىندە 90 مىڭعا جۋىعى داۋىس بەرۋ جاسىنداعى جاستار.
سونىمەن بىرگە، شىمكەنت قالاسىندا 245 مىڭنان استام جاس بار. جاستاردىڭ بوس ۋاقىتىن ءتيىمدى پايدالانۋ، مەملەكەتتىك باعدارلامالاردى ءتۇسىندىرۋ، ءتۇرلى باعىتتاعى جوبالاردى بىرلەسە اتقارۋ ءۇشىن قالادا ءتورت جاستار رەسۋرستىق ورتالىعى جۇمىس ىستەيدى.
«شىمكەنت كەلبەتى».
