بۇگىن قازاق پوەزياسىنىڭ كورنەكتى وكىلى، اقىن، كومپوزيتور، جازۋشى جۇمەكەن ناجىمەدەنوۆتىڭ تۋعانىنا 90 جىل تولدى، دەپ حابارلايدى "ادىرنا".
قازاق ادەبيەتىنىڭ ءورىسىن كەڭەيتكەن قالامگەردىڭ شىعارماشىلىعى ۇلتتىق رۋحتى، ەركىندىكتى، ادام بولمىسىنىڭ تەرەڭ سىرلارىن جىرلاۋمەن ەرەكشەلەنەدى.
قازاقستاننىڭ 2006 جىلدان بەرگى مەملەكەتتىك ءانۇرانىنىڭ ءماتىنى رەتىندە جۇمەكەن ناجىمەدەنوۆتىڭ "مەنىڭ قازاقستانىم" ولەڭى تاڭداپ الىندى. ولەڭنىڭ كەيبىر تۇسى وزگەرتىلىپ، وعان قوسالقى اۆتور رەتىندە سول كەزدەگى پرەزيدەنت نۇرسۇلتان نازارباەۆتىڭ اتى قوسىلدى.
اقىننىڭ وتانشىلدىق رۋحتاعى ولەڭدەرى بىرنەشە بۋىننىڭ ساناسىنا تىكەلەي اسەر ەتتى.
جۇمەكەن سابىرۇلى 1935 جىلى 28 قاراشادا اتىراۋ وبلىسى قۇرمانعازى اۋدانىندا دۇنيەگە كەلگەن. ەڭبەك جولىن مۇعالىمدىكتەن باستاعان ول كەيىن جۋرناليستيكا، ادەبيەت سالالارىندا قىزمەت ەتتى. قازاق راديوسىنىڭ ادەبيەت بولىمىندە، «لەنينشىل جاس» گازەتى مەن جازۋشىلار وداعىندا ەڭبەك ەتتى.
جۇمەكەننىڭ شىعارمالارى تەرەڭ فيلوسوفياسىمەن، ويشىلدىعىمەن ەرەكشەلەنەدى. ول پوەزيادا توسىن تەڭەۋ، كوركەمدىك جاڭاشىلدىق الىپ كەلگەن اقىنداردىڭ ءبىرى سانالادى.
اقىننىڭ «جەتى بوياۋ»، «كىشكەنتاي»، «جارىق پەن جىلۋ»، «مەنىڭ قازاقستانىم» سياقتى ەڭبەكتەرى ۇلتتىق ادەبيەت قازىناسىنا قوسىلعان قۇندى دۇنيەلەر.
سونىمەن قاتار جۇمەكەن ناجىمەدەنوۆ – كاسىبي دەڭگەيدەگى كۇيشى-كومپوزيتور. ونىڭ «ەركە سىلقىم»، «اق شاعىل» سياقتى كۇيلەرى قازاق مۋزىكا ونەرىندەگى ەرەكشە تۋىندىلاردىڭ ءبىرى.
