"ادىرنا" پورتالىنا جاس سۋرەتشىنىڭ ءوز يدەياسى مەن ەڭبەگىنىڭ قاز-قالپىندا قولدى بولعانىنا اشىنىپ جازعان حاتى كەلىپ ءتۇستى. ونىڭ تالدىقورعان قالاسىنداعى كوپقاباتتى ءۇي قابىرعاسىنا بەدەرلەگەن كەسكىندەمەسى (مۋرالىنىڭ) ۇرلانعان. مۋرالدىڭ ەسكيزى الماتى قالاسىنداعى ۇيلەردىڭ بىرىندە رۇقساتسىز كوشىرلىپ، بويالعان. سۋرەتشىنىڭ شاعىمىنا اكىمدىك تە، قۇزىرلى ورگاندار دا ماندىرتىپ جاۋاپ بەرمەي وتىر.
قاجىر-قايرات پەن ىجداعاتتىلىقتى، شىعارماشىلىق كوركەمدىكتى قاجەت ەتەتىن تۋىندىنى اۆتور ويىندا جاڭعىرتىپ، مەرەكە كۇنىنە وراي جارىققا شىعارادى. الايدا كەيىننەن ءوز تۋىندىسىنىڭ اينا-قاتەسىز كوشىرمەسىمەن ءوزى الماتى قالاسىندا جولىعادى.
"مەن - يمانعالي ەركەعالي. سىزدەرگە ءوز تۋىندىمنىڭ رۇقساتسىز ۇرلانعانى بويىنشا حات جولداپ وتىرمىن. مەنىڭ بەزەندىرگەن مۋرالىم 2021 جىلى تالدىقورعان قالاسىندا "قۇتقارۋشىلار كۇنىنە" ورايلاستىرىپ سالىنعان ەدى.
بۇگىندە اينا-قاتەسىز ءدال سونداي مۋرال الماتى قالاسىنداعى كوپقاباتتى ۇيلەردىڭ بىرىنە سالىنىپتى. مۋرالدى "كوشىرىپ باسۋ" الماتى اكىمدىگىنىڭ تاپسىرماسى بويىنشا جۇزەگە اسقان. بۇل تالدىقورعان قالاسىندا ارنايى تاپسىرىسپەن سالىنعان مەنىڭ جۇمىسىم، ونى ەسكەرتپەستەن رۇقساتسىز قولدانىپ وتىر.
ەرەكشە مۋرالدىڭ (گراففيتيدىڭ) نوبايى تالدىقورعان تج دەپارتامەنتىندە جۇمىس ىستەيتىن كەيىپكەرمەن جەكە كەلىسىم-شارت بويىنشا جاسالدى. سۋرەتتەگى كىشكەنە قىز دا ءبىزدىڭ قالامىزدىڭ تۇرعىنى. ەسكيز، ياعني تۋىندىنىڭ نوبايىن جاساۋ كەزىندە ءبىز فوتوسەسسيا جۇرگىزدىك. ديزاينەر ارنايى ەسكيز سىزدى.
كوپ ەڭبەك پەن ۋاقىت سارپ ەتتىك. بىراق "كوشىرگىشتەر" مەنەن دە، مۋرال كەيىپكەرلەرىنەن دە رۇقسات سۇرامادى. وسى ەسكيزدى مەنىڭ كەلىسىمىمسىز پايدالانعان ادامدارعا قاتىستى شارالار قابىلداۋىڭىزدى سۇرايمىن", - دەپ جازىلعان حاتتا.
ءدال قازىرگى ۋاقىتتا الماتى قالاسىنىڭ اكىمى ەربولات اسكاربەكۇلىنا سۇرانىس حات جولداندى. تۇتاس ءۇردىستى "ادىرنا" ۇلتتىق پورتالى باقىلاۋىندا ۇستايتىن بولادى.
قوسىمشا اقپارات: اۆتور قابىرعا سۋرەتىنىڭ قاي ۋاقىتتا سالىنعانىن ايعاقتايتىن فوتو-cكرين دا جولدادى. 17 قازان. 2021 جىل.
الماتى قالاسىنداعى كوشىرمە مۋرال:
"ادىرنا" ۇلتتىق پورتالى
