الماتى بازارىندا اۋىر جۇك كولىگىنىڭ استىندا قالعان 15 جاستاعى ءجاسوسپىرىم قىزدىڭ جاعدايى تۋرالى دارىگەرلەر مالىمدەدى، دەپ حابارلايدى "ادىرنا" پورتالى.
انىقتالعانداي، ول الماتى قالاسىنداعى بالالار جەدەل مەديتسينالىق جاردەم ورتالىعىنا شۇعىل تۇردە جاتقىزىلدى.
«بالا جول اپاتىنان زارداپ شەكتى: قىزدى سولتۇستىك اينالما كوشەسىنىڭ بويىندا جولدى كەسىپ ءوتىپ بارا جاتقاندا جۇك كولىگى قاعىپ كەتتى، سوققىنىڭ سالدارىنان قىز بىرنەشە مەترگە ۇشىپ كەتىپ، باسىن اسفالتقا سوقتى. قابىلداۋ بولىمىندە كلينيكالىق-زەرتحانالىق زەرتتەۋلەر جۇرگىزىلىپ، مامانداردىڭ كەڭەستەرى وتكىزىلدى» دەپ جازدى الماتى قالاسى قوعامدىق دەنساۋلىق ساقتاۋ باسقارماسى.
دارىگەرلەردىڭ ايتۋىنشا، قويىلعان دياگنوز:
- جابىق باس سۇيەك-مي جاراقاتى;
- ميدىڭ شايقالۋى;
- جۇمساق تىندەردىڭ زاقىمدانۋى، سول جاقتا پاريەتو-وكسيپالدى ايماقتىڭ تەرى استىنداعى گەماتوماسى;
- وڭ جاقتا تىزە بۋىنىنىڭ، سول جاقتا شىنتاق بۋىنىنىڭ، وڭ جاقتا قولدىڭ كوگەرگەن ابرازياسى;
- وڭ جاقتا ساننىڭ جۇمساق تىندەرىنىڭ كوگەرۋى.
ءجاسوسپىرىم ورتالىق ستوماتولوگيالىق مەديتسينالىق ورتالىعىنىڭ نەيروحيرۋرگيا بولىمىنە جاتقىزىلدى.
ەسكە سالا كەتەيىك، 25 شىلدە كۇنى الماتى قالاسىنداعى باراحولكا بازارىندا ءبىر وتباسىنىڭ "سولتۇستىك اينالما جولى" كوشەسىن كەسىپ وتپەك بولعانىندا، 15 جاسار قىزدىڭ جۇك كولىگىنىڭ استىندا قالعانى ايتىلعان بولاتىن. ءجاسوسپىرىم قىزدىڭ جانىندا اتا-اناسى دا بولدى. سونداي-اق، ۆيدەودا بايقالعانداي زاڭسىز جەردەن جۇگىرىپ وتپەك بولعان وتباسىنىڭ ءدال ۇستىندە جاياۋ جۇرگىنشىلەرگە ارنالعان كوپىر ورنالاسقان. الايدا، وتباسى توتە جولمەن تەز ءوتۋدى تاڭداعان.
پوسموترەت ەتۋ پۋبليكاتسيۋ ۆ Instagram
