وقۋشى ساناسىنا ساۋلە شاشىپ، ءبىلىمي ينۆەستيتسيانى اياماي قۇيعان ۇستازدار - ۇلت ماقتانىشى. الەۋمەتتىك جەلىلەر اجارىندا حيميالىق ەلەمەنتتەردى قازاقى ۇعىمعا ساي تاپسىرلەپ، جەتەسىنە جەتكىزە تۇسىندىرگەن، تالداعان ۇستازدىڭ ەرەكشە ۆيدەوسى تارادى.
ۆيدەونى كورىپ قۋانعان ءارى بويىن ماقتانىش سەزىمى كەرنەگەن كۇيشى، قازاق ءداستۇرىن دارىپتەۋشى المات ارداقۇلى:
- بۇل - مەنىڭ انام! وتىز ءۇش جىلدىق ەڭبەك ءوتىلى بار جوعارى ساناتتى حيميا ءپانىنىڭ مۇعالىمى - روزا ابدىراسىلقىزى! وسى ۆيدەو TikTok-تا حيت بولىپ جاتقان كورىنەدى. پاراقشامدا ساقتاپ قويۋدى ءجون كوردىم، - دەپ جازدى.
View this post on Instagram
روزا ابدىراسىلقىزى - تالدىقورعان قالاسى، №21 مەكتەپتىڭ قۇرمەتتى ۇستازى، وقۋشىلارىنىڭ سۇيىكتى جولاشارى، حيميا ءپانىنىڭ مۇعالىمى. ۇستاز ۇنەمى شاكىرت ساناسىنا ساۋلە قۇيۋدا تىڭ تاسىلدەرگە سۇيەنەدى، قازاق ءتىلى مەن ادەبيەتىنىڭ بار قۇنارىن پايدالانا وتىرىپ، حيميا الەمىنىڭ سىرىن ايشىقتايدى.
ۇستازدىڭ ەرەكشە بولمىسىنا سۇيسىنگەن وقىرماندار سانى كوپ.
"قانداي سۇلۋ ايەل جانە ءبىلىمدى ۇستاز! دەنساۋلىعى مىقتى، جاسى ۇزاق بولسىن!",
"وتە كەرەمەت. اناڭىز امان بولسىن. ءوزىن ۇستاۋى، بالاعا قامقورلىعى، ءاربىر ءسوزى ماعان قاتتى ۇنادى. پاراقشاما دا ساقتاپ قويعام. ساباعىن تۇگەل كورمەي-اق، كىشكەنتاي ۇزىندىدەن بۇل كىسىدەن كوپ نارسە ۇيرەنۋگە بولاتىنىن كورىپ قالدىم. وسىنداي ۇستازدار كوپ بولسىن!",
"اناڭىزعا ۇزاق عۇمىر تىلەدىك. ۇرپاققا بەرگەن ءتالىمى، تاعدىرىنا تاۋسىلماس باق بولىپ كەلسىن!" دەپ اق تىلەگىن جاۋدىردى جۇرت.
"ادىرنا" ۇلتتىق پورتالى
