تالدىقورعاندا كەزەكتە تۇرعان 51 وتباسى جاڭا باسپانانىڭ كىلتىنە يە بولدى. جاڭا قونىس يەلەرىن جەتىسۋ وبلىسىنىڭ اكىمى بەيبىت يساباەۆ قۇتتىقتادى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
ءوڭىر باسشىسى اتاپ وتكەندەي، ازاماتتاردى قولجەتىمدى تۇرعىن ۇيمەن قامتاماسىز ەتۋ – حالىقتىڭ ءومىر ءسۇرۋ ساپاسى مەن الەۋمەتتىك ءال-اۋقاتىن ارتتىرۋعا باعىتتالعان مەملەكەتتىك ساياساتتىڭ باسىم باعىتتارىنىڭ ءبىرى.
– مەملەكەت باسشىسىنىڭ تاپسىرماسى اياسىندا وڭىردە تۇرعىن ءۇي قۇرىلىسىنىڭ قارقىنى جىلدان جىلعا ارتىپ كەلەدى. ماسەلەن، جىل باسىنان بەرى تالدىقورعان قالاسىنىڭ وزىندە 49 مىڭ شارشى مەتر تۇرعىن ءۇي پايدالانۋعا بەرىلدى. ياعني وتكەن جىلدىڭ سايكەس كەزەڭىمەن سالىستىرعاندا 3,4 پايىزعا ارتقان. جىل سوڭىنا دەيىن كەزەڭ-كەزەڭىمەن تالدىقورعاننىڭ 1400-دەن استام وتباسىن قولجەتىمدى باسپانامەن قامتاماسىز ەتۋدى جوسپارلاپ وتىرمىز، – دەدى ب. يساباەۆ.
جاڭا باسپانا كەزەكتە تۇرعان ازاماتتارعا مەملەكەتتىك قولداۋ شارالارى اياسىندا بەرىلدى. ولاردىڭ اراسىندا كوپبالالى جانە تولىق ەمەس وتباسىلار، جەتىم بالالار مەن اتا-اناسىنىڭ قامقورلىعىنسىز قالعان بالالار، ءى جانە ءىى توپتاعى مۇگەدەكتىگى بار ازاماتتار بار.
جاڭا قونىس يەلەرى ءوز اسەرىن ءبولىستى:
– بۇگىن وتباسىمىز ءۇشىن ۇلكەن قۋانىش. جاڭا قونىسقا يە بولىپ جاتىرمىز. «جاستار-3» شاعىن اۋدانىنداعى جاڭا ءۇيىمىزدىڭ كىلتىن قولىمىزعا الدىق. تۇرعىن ءۇي كەزەگىندە 9 جىلعا جۋىق تۇردىم. التى بالا تاربيەلەپ وتىرمىن، ونىڭ بەسەۋى مەكتەپ وقۋشىلارى، – دەدى دينارا وتارباەۆا.
– 2017 جىلدان بەرى تۇرعىن ءۇي كەزەگىندە تۇردىم. قۋانىشىمدى سوزبەن ايتىپ جەتكىە المايمىن. ەڭ الدىمەن بالالارىمدى ەرتىپ اپارىپ، وزدەرىنىڭ جەكە ۇيلەرىن كورسەتەمىن. ەندى ولاردىڭ ءوز بولمەلەرى بولادى، كەڭ ءارى جايلى جەردە تۇراتىن بولدىق. وسى ۋاقىتقا دەيىن تالاي جىل پاتەر جالداپ تۇردىق. ەندى، مىنە، ءوز باسپانامىز بار. كورسەتىلگەن قولداۋ ءۇشىن شىن جۇرەكتەن العىس ايتامىن، – دەدى دانا جاماناەۆا.
– تۇرعىن ءۇي كەزەگىندە 10 جىل تۇردىق. وسى ۋاقىت ىشىندە ءبىر جالدامالى پاتەردەن ەكىنشىسىنە كوشىپ، تالاي قيىندىقتى باستان وتكەردىك. بالالارمەن بىرگە كوشىپ-قونۋ ارينە قيىن بولدى. ەندى مۇنىڭ ءبارى ارتتا قالدى. جاس وتباسىمىزدىڭ جاڭا شاعىن اۋداندا ءوز باسپاناسى بار دەپ قۋانىپ جاتىرمىز، – دەدى «قۇلاگەر» شاعىن اۋدانىنان پاتەر العان تورعىن تويشىبەكوۆا.
اتاپ وتسەك، الداعى ۋاقىتتا تالدىقورعان قالاسىندا «بىرلىك» شاعىن اۋدانىندا 170 پاتەرگە ارنالعان ەكى كرەديتتىك ءۇيدى پايدالانۋعا بەرۋ جوسپارلانىپ وتىر. سونداي-اق جىل سوڭىنا دەيىن «ىنتىماق» تۇرعىن الابىندا 200 پاتەرگە ارنالعان بەس بەسقاباتتى ءۇيدىڭ قۇرىلىسى اياقتالىپ، پايدالانۋعا بەرىلەدى.
جالپى، سوڭعى 4 جىلدا جەتىسۋ وبلىسىندا 1,4 ملن شارشى مەتر تۇرعىن ءۇي پايدالانۋعا بەرىلىپ، 11 مىڭعا جۋىق استام وتباسى جاڭا قونىسقا يە بولدى.
