"11-سىنىپتا كوبەيتۋ كەستەسىن بىلمەيتىن بالا وتىر" - جاس مامان بىلىقتىڭ بەتىن اشتى

2880
Adyrna.kz Telegram

قاراعاندى وبلىسى، اباي اۋدانىنا شاكىرت تاربيەلەپ، بالا وقىتۋدى ماقسات ەتىپ بارعان جاس مامان ءوز instagram پاراقشاسىندا جانايقايىن جاريا ەتتى.  «ديپلوممەن – اۋىلعا» باعدارلاماسى بويىنشا وڭىرگە قونىس اۋدارعان جاس ۇستاز ءاليحان ءيبراھيموۆتىڭ ايتارى بار. ول جەرگىلىكتى جەردەگى ءبىلىمنىڭ ساپاسىزدىعىن ۆيدەو-ۇندەۋىندە جايىپ سالعان. بۇل تۋراسىندا "ادىرنا" ۇلتتىق پورتالى "aikyn.kz"-كە سىلتەمە كورسەتە وتىرىپ حابارلايدى.

ءاليحان يبراھيموۆ قازىر اقباستاۋ اۋىلىنىڭ مەكتەبىندە فيزيكا پانىنەن ساباق بەرەدى.

- مەكتەپتەگى ءبىلىم دەڭگەيى وتە ناشار. 11-سىنىپتا كوبەيتۋ كەستەسىن بىلمەيتىن بالا وتىرعاندا، ءبىلىم ساپاسى جايىندا نە ايتۋعا بولادى؟ ال جوعارى سىنىپتا كىتاپتى ەجىكتەپ وقىپ وتىرعانداردى قايدا جىبەرەمىز؟ ماتەماتيكا، جاراتىلىستانۋ سياقتى پاندەر تومەنگى جانە جوعارعى سىنىپتاردا بىرىگىپ وتەدى. ەلەستەتىپ كورىڭىزشى، ءبىر 45 مينۋتتا مەن فيزيكا ءپانىن بىردەن 8 جانە 10-سىنىپقا وتكىزەمىن. 6-8-10 سىنىپتارعا ءبىر ۋاقىتتا وتەتىن پاندەر دە بار. ءار سىنىپقا 45 مينۋت ەمەس، 15 مينۋت قانا ۋاقىت بولىنەدى. مۇعالىم ءارتۇرلى 3 سىنىپقا دايىندالادى. بىراق جالاقىنى ءبىر ساباققا عانا الادى، - دەپ اشىندى جاس مامان.

جاس ماماننىڭ ايتۋىنشا، ينفورماتيكا پانىنەن ساباق بەرەتىن مۇعالىم تەحنيكاعا دا، ساباققا دا، ءبىلىم بەرۋ پورتالىنا دا جاۋاپتى. ال جالاقىسى -  ماردىمسىز. ءتىپتى، مەكتەپتە 50 جىلدان بەرى سىياقى الماي جۇرگەن ماماندار بار ەكەن.

- ساباق كەزىندە جينالىس وتكىزىپ، ديرەكتوردىڭ كابينەتىنە شاقىرۋ – مەن ءۇشىن تۇسىنىكسىز جاعداي. مۇعالىمدەردى اۋداننان كەلەتىن كوميسسيامەن ابدەن قورقىتىپ تاستادى. مەن بىردەن جوسپارمەن جۇرە المايتىنىمدى ايتتىم. سەبەبى بالالاردىڭ ءبىلىم دەڭگەيى ءبىر-ەكى ايعا ەمەس، ەكى-ءۇش جىلعا قالىپ قويعان، - دەدى ءاليحان يبراھيموۆ.

بۇل رەتتە «ديپلوممەن – اۋىلعا» باعدارلاماسى بويىنشا قۇجات راسىمدەۋ دە ماشاقاتقا اينالعان. ءاليحاننىڭ ءوزى سول ءۇشىن اۋدانعا 15 رەت بارىپ كەلگەن. ال ديرەكتور ونى جەكە شارۋا دەپ سانايتىن كورىنەدى. سول سەبەپتى، جاس ماماندار اقىسىز دەمالىس الۋعا ءماجبۇر.

Sputnik.kz-ءتىڭ حابارلاۋىنشا، قاراعاندى وبلىستىق ءبىلىم باسقارماسى وسى ۆيدەوۇندەۋدەن كەيىن اقباستاۋ اۋىلدىق مەكتەبىنە ىشكى تەكسەرىس جۇرگىزىلگەلى جاتقانىن مالىمدەگەن.

«ارنايى كوميسسيا قۇرىلدى. ونىڭ قۇرامىنا ءبىلىم باسقارماسىنىڭ، ءبىلىم بەرۋ سالاسىنداعى ساپانى باقىلاۋدى قامتاماسىز ەتۋ دەپارتامەنتىنىڭ وكىلدەرى ەندى. اقپارات راستالسا، بارلىق قاجەتتى شارالار قابىلدانىپ، لاۋازىمدى تۇلعالار جاۋاپكەرشىلىككە تارتىلاتىن بولادى»، - دەلىنگەن رەسمي حابارلامادا.

"ادىرنا" ۇلتتىق پورتالى 

پىكىرلەر