كيىك سانىن رەتتەۋگە قاتىستى جاڭا قۇجات جاريالاندى. بۇل تۋرالى ەكولوگيا جانە تابيعي رەسۋرستار مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
بۇل قۇجات ارقىلى سانىن رەتتەۋگە جاتاتىن جانۋارلاردىڭ تۇرلەرىن الىپ قويۋعا رۇقسات بەرۋ قاعيدالارىنا وزگەرىس ەنگىزۋ كوزدەلگەن
بۇيرىق جوباسى سانى رەتتەلەتىن جانۋار ءتۇرىن الىپ قويۋعا مەملەكەتتەن رۇقسات الۋ ءۇشىن جازىلاتىن ءوتىنىم ۇلگىسىنە جانە سول ءوتىنىم نەگىزىندە رۇقسات بەرۋ قۇجاتىنىڭ ۇلگىسىنە وزگەرىس ەنگىزۋگە ارنالعان.
«جانۋارلار سانىن رەتتەۋ ۋچاسكەسىنىڭ اۋدانى جانە شەكاراسى» دەگەن تارماقتىڭ اياعىنا «(اقبوكەننىڭ سانىن رەتتەۋدى قوسپاعاندا)» دەيتىن قوسىمشا تىركەس ەنگىزىلمەك.
ورمان شارۋاشىلىعى جانە جانۋارلار دۇنيەسى كوميتەتىنىڭ ماماندارى بۇل وزگەرىس كيىك سانىن رەتتەۋ ساياساتىنداعى سوڭعى وزگەرىستەرمەن بايلانىستى ۇسىنىلىپ وتىرعانىن ايتادى.
بۇيرىقتاعى وزگەرىس كيىك اتۋعا رۇقساتتى شەكتەگەنىمەن تىيىم سالۋ بولىپ ەسەپتەلمەيدى.
«اقبوكەندەر سانى رەتتەۋگە جاتاتىن جانۋارلاردىڭ تۇرىنە جاتقىزىلعانىن بىلەسىزدەر. بىراق سوڭعى كەزدە وسى ماسەلەنىڭ اينالاسىنداعى ۇستانىمدار قايتا قارالىپ جاتىر. وسىعان بايلانىستى سانى رەتتەلەتىن جانۋارلاردىڭ ىشىندە كيىك اتۋعا رۇقسات بەرىلمەيدى. بىراق بۇل تولىقتاي تىيىم سالۋ دەگەن ءسوز ەمەس. مەملەكەت تاراپىنان ناقتى شەشىم شىققاننان كەيىن بارىپ كيىك اتۋعا تولىق تىيىم سالىنۋى دا مۇمكىن»، - دەيدى كوميتەتتىڭ جانۋارلار دۇنيەسى جانە اڭشىلىق شارۋاشىلىق باسقارماسىنىڭ باس ساراپشىسى ولجابەك حولوۆ.
ايتا كەتەيىك، قازاقستاندا 10 اقپاننان باستاپ كيىك اتۋعا قايتادان تىيىم سالىنعان بولاتىن.
