اققۇمدىق ۇستازلار "كۇندەلىكتى" تولتىرۋ ءۇشىن كورشى اۋىل مەن تاۋ-تاستى ارالاۋعا ءماجبۇر، دەپ حابارلايدى "ادىرنا".
تۇركىستان وبلىسى اققۇم اۋىلىندا ءموبيلدى ينتەرنەت جوق. جەرگىلىكتى تۇرعىنداردىڭ ايتۋىنشا مۇندا ءتىپتى ۇيالى تەلەفوننان قوڭىراۋ شالۋ ءۇشىن بيىك توبەگە شىعۋعا ءماجبۇر. بايلانىس پەن ينتەرنەتتىڭ جوقتىعىنان ەڭ كوپ زارداپ شەگەتىن - اۋىل مەكتەبى مۇعالىمدەرى.
مەكتەپ ۇستازدارىنا كۇن سايىن ەلەكتروندى جۋرنال "كۇندەلىكتى" تولتىرۋ تالاپ ەتىلەدى. ال بۇل اۋىلدىڭ مەكتەپ وقۋشىلارى ينفورماتيكانى تەك تەوريالىق تۇردە وقۋعا ءماجبۇر. مەكتەپ كومپيۋتەرلەرىنەن كەلەر پايدا جوق ەكەنى ايتىلدى.
اققۇم اۋىلىنىڭ تۇرعىنى، ينفورماتيكا ءپانىنىڭ مۇعالىمى الماسبەك سارمان:
«عالامتورعا جالعانعان جالعىز كومپيۋتەر تەك مەكتەپتە بار. شەكتەۋمەن بەرىلگەن 10 گيگابايت تەك 30 كۇنگە جوسپارلانعان. كورشى اۋىلعا بارۋعا ءماجبۇرمىز»، - دەيدى.
ايتۋىنشا اققۇمداعى 30-دان اسا مۇعالىم ساباق بەرىپ، جۇمىس ۋاقىتى اياقاتلعان سوڭ تاكسي جالداپ، بايلانىسى مەن ينتەرنەتى بار اۋىلداردى جاعالاپ، ەلەكتروندى جۋرنالدى تولتىرادى. ال ءار كۇن سايىن كورشى اۋىلعا بارۋ - شىعىن. سونداي-اق نوۋتبۋگىمەن كوشەدە وتىرىپ، ءبىر كۇندىك جۇمىسىنىڭ ەسەبىن تولتىرۋعا ءماجبۇر.
"ەگەر ادام كوپ بولسا، 200 تەڭگەدەن شىعارامىز. ءبىر ءوزىڭ بولساڭ، مىڭ تەڭگە بەرەمىن كۇن سايىن. شامامەن 500 تەڭگە، مىڭ تەڭگەدەن. تانىستار بولسا، ارزان الادى. توقساننىڭ باسىندا قورىتىندى ەسەپ جاسايمىز. سوندا ءبىز تۇنگى ساعات 12-گە دەيىن ىستەيمىز. بالا-شاعا ۇيدە قاراۋسىز قالادى. نە مەكتەپتە ەمەسپىز، نە ۇيدە ەمەسپىز. جۇرت كۇلەدى اققۇمنىڭ مۇعالىمدەرى سىعان سياقتى جۇرەدى نەمەسە قىدىرىپ جۇرەدى دەپ. "بۇلارعا راحات" دەيدى. بىزگە راحات ەمەس. قاراۋسىز بالا-شاعا. مەكتەپتە وتىرساق جاقسى ەمەس پە، كوپ نارسە ىستەيمىز عوي. ۋاقىتتىڭ ءبارى جولعا كەتەدى. قايتاردا جاياۋ-جالپى قايتامىز. ءبىز مەكتەپتە نە ۇيدە ەمەسپىز. اققۇم مۇعالىمدەرى سىعاندار سياقتى دەپ كەلەكەلەيدى،نەمەسە ءبىزدىڭ قالاي دەمالىپ جاتقانىمىزدى قاراڭىزدار دەيدى. بىراق كۇلۋگە دە ۋاقىتىمىز جوق. – دەيدى باستاۋىش سىنىپ مۇعالىمى قۇرالاي قوجابەرگەنوۆا.
بۇل جاعدايدان شەنەۋنىكتەر حاباردار بولىپ شىقتى. اۋىلعا بازالىق ستانتسيا ورناتىلىپ، الايدا اقاۋلىقتار بار كورىنەدى. ماسەلەنى شەشۋ ءۇشىن 45 مەترلىك مۇنارا ورناتۋ قاجەت. ولار ءتىپتى دەمەۋشى تاپتى. بىراق جەرگىلىكتى بيلىك ۇيالى بايلانىس وپەراتورىمەن كەلىسىمگە كەلۋ مۇمكىن بولماعانىن العا تارتادى.
"قازىرگى تاڭدا ءمجا 2.0 باعدارلاماسى جۇزەگە اسىرىلۋدا. مينيسترلىك وپتيكا ورناتادى. وپتيكانى توسەۋ جۇمىستارىن وسى جىلدىڭ اياعىندا نەمەسە كەلەسى جىلى باستاۋ جوسپارلانۋدا. وسىدان كەيىن بازالىق ستانتسيانىڭ ساپاسى جاقسارادى دەپ ۇمىتتەنەمىز. – دەيدى قازىعۇرت اۋدانى اكىمدىگىنىڭ باس ينسپەكتورى ەرسايىن نۇرلىبەك.
بۇعان دەيىن تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسينگە قازاقستانداعى ينتەرنەت پەن بايلانىس ساپاسى تۋرالى بىرنەشە ساۋال قويىلعان بولاتىن. استانا مەن توكيوداعى ينتەرنەت جىلدامدىعىن سالىستىرۋدان باس تارتقان مينيسترگە تاعى دا بىرنەشە سۇراق قويىلعان بولاتىن. ال مينيستر 5G بايلانىسى اۋىلدىق جەرلەرگە ەنىپ جاتقان جوق ەكەنىن ايتادى. بازالىق ستانتسيانى ورناتۋ ازىرگە تەك ماڭىزدى قالالار مەن وبلىستاردا جۇزەگە اسپاق.
