جاڭادان تاعايىندالعان وقۋ-اعارتۋ ءمينيسترى عاني بەيسەمباەۆ جەلىدە جازبا جاريالاپ، ەل مۇددەسى ءۇشىن ايانباي قىزمەت ەتۋگە دايار ەكەنىن جەتكىزدى، دەپ جازادى "ادىرنا" ۇلتتىق پورتالى.
"قۇرمەتتى دوستار، ارىپتەستەر! مەملەكەت باسشىسىنىڭ جارلىعىمەن وقۋ-اعارتۋ ءمينيسترى بولىپ تاعايىندالدىم. قاسىم-جومارت كەمەلۇلى توقاەۆقا جوعارى سەنىمى ءۇشىن ريزاشىلىعىمدى بىلدىرە وتىرىپ، ءبىلىم سالاسىنىڭ دامۋى مەن جاس ۇرپاقتىڭ بولاشاعى جانە ەل مۇددەسى ءۇشىن قىزمەت ەتۋدە بار كۇش-جىگەرىمدى جۇمساۋعا دايىن ەكەنىمدى بىلدىرەمىن. كەشە مەملەكەت باسشىسى قابىلداۋىندا بولىپ، مەملەكەتتىك جانە سالالىق باعدارلامالاردى، ۇلتتىق جوبالاردى ءتيىمدى ءارى ساپالى جۇزەگە اسىرۋدىڭ ماڭىزدىلىعىنا قاتىستى تاپسىرمالار الدىم. سونىمەن بىرگە ءتيىستى ماسەلەلەردى ۋاقىتىلى شەشۋگە جەتكىلىكتى دەن قويۋ قاجەتتىگىن تاپسىردى. مەكتەپكە دەيىنگى، ورتا، قوسىمشا، تەحنيكالىق جانە كاسىپتىك ءبىلىم، سونداي-اق ينكليۋزيۆتى ءبىلىم مەن بالالاردىڭ قۇقىقتارىن قورعاۋ ماسەلەلەرىنە قاتىستى ماڭىزدى سالانىڭ سالماقتى جۇگى ارتىلىپ وتىر. ارينە، پرەزيدەنت تاپسىرماسىنا سايكەس سالا جۇمىسىن ساپالى دامىتۋعا قاتىستى بۇعان دەيىن دە اتقارىلعان ىستەر از ەمەس. اسحات قاناتۇلى ايماعامبەتوۆكە بىرگە اتقارعان جۇمىس ءۇشىن العىس ايتا وتىرىپ، ساباقتاستىق جالعاسىن تاباتىنىن اتاپ وتكىم كەلەدى. ءوز قىزمەتىمدە اشىقتىق قاعيداتى نەگىزىندە تاربيەشىلەردىڭ، مۇعالىمدەردىڭ، وقۋشىلاردىڭ، اتا-انالار قاۋىمىنىڭ، ۇستازداردىڭ پىكىرلەرى مەن ۇسىنىستارىنا، جۋرناليستەر، كاسىبي ساراپشىلارمەن ءبىلىم سالاسىن دامىتۋعا قاتىستى ۇسىنىس-پىكىرلەردى تىڭداپ، كاسىبي تالقىلاۋ جۇرگىزۋ ءۇشىن اشىق ديالوگ وتكىزۋگە دايىنمىن. ەلىمىزدەگى ءار بالانى ساپالى بىلىممەن قامتىپ، ونىڭ ىسكەر، قۇقىقتىق ساۋاتتىلىعى جوعارى ازامات بولىپ قالىپتاسۋداعى قابىلەتى مەن قارىمىن اشۋعا قاجەتتى جاعداي جاساۋدا ءبىر بولامىز دەپ ۇمىتتەنەمىن", - دەپ جازدى عاني بەيسەمباەۆ.
"ادىرنا" ۇلتتىق پورتالى
