الماتى وبلىسىنىڭ مامانداندىرىلعان اۋدانارالىق ەكونوميكالىق سوتىنىڭ سۋدياسى سوتتالدى. بۇل تۋرالى انتيكوردىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«ايىپتالۋشى قاراساي اۋدانى مەملەكەتتىك كىرىستەر باسقارماسىنىڭ ءوندىرىپ الۋ ءبولىمى باسشىسىنىڭ كومەگىمەن ەكى جشس-ءتى بانكروت دەپ تانىعانى ءۇشىن كاسىپكەردەن پارا الدى دەپ ايىپتالدى. قوناەۆ قالالىق سوتىمەن ا. ابدراحمانوۆ 4 جىل مەرزىمگە باس بوستاندىعىنان ايىرىلدى»،—دەلىنگەن حابارلامادا.
سۋدياعا 122,5 ملن تەڭگە ايىپپۇل تۇرىندە جازا تاعايىندالدى. ال پارا بەرۋشى 3 جىل 6 اي مەرزىمگە باس بوستاندىعىنان ايىرۋعا سوتتالدى.
ايتا كەتەيىك، سوتتالعاندار ءومىر بويى مەملەكەتتىك قىزمەتتە قىزمەت اتقارۋ قۇقىعىنان ايىرىلادى.
