اتىراۋداعى №25 مەكتەپتىڭ 4- سىنىپ وقۋشىلارى ساباققا بارۋدان باس تارتتى. ايتۋلارىنشا، ولاردى جوعارى سىنىپتاعىلار قورقىتىپ، اقشا جيناعان. سونداي-اق، تۇسىنىكسىز قۇرعاق ۇنتاقتى جەۋگە ماجبۇرلەگەن كورىنەدى. اتا-انالار بالالار بەلگىسىز زاتتان ۋلانىپ، اۋىرعان سوڭ عانا بىلدىك بۇل جاعدايدى دەپ دابىل قاعادى. ال مەكتەپ باسشىلىعى وزدەرىنە شاڭ جۋىتپاي وتىر. بۇل تۋرالى Astana.tv حابارلادى، دەپ جازادى "ادىرنا" ۇلتتىق پورتالى.
ايگەرىم بوتاعاريەۆا 4 سىنىپ وقيتىن ۇلىنىڭ سوڭعى كەزدە ءتۇرلى سىلتاۋمەن ءجيى اقشا سۇراي باستاعانىنا كۇدىكتەنگەن. الدىمەن 500, كەيىن 1000, سوسىن ەكى مىڭ تەڭگە سۇراپ العان. تاعى بىردە اكەسىنىڭ ءاميانىنان رۇقساتسىز اقشا الىنعانىن بايقاپتى. ال ەكى كۇن بۇرىن ۇلى ساباقتان كەلىسىمەن باسىنىڭ اينالعانىن ايتىپ، ەسىنەن تانىپ قۇلاي جازدايدى. سول ساتتە كەلىنشەك بالاسىنا كەلگەن حابارلامانى وقىپ، شالقاسىنان تۇسكەنىن ايتادى.
«بەردىقوجا، ەرتەڭ 4 مىڭ الىپ كەل، اعالار كەلەدى، ودنارازكا الىپ كەلەدى. ەرتەڭ ءبىزدى ولتىرەدى عوي. مەن سونداي سوندايلاردى كورگەندە، شوشيمىن دا. ول مەكتەپكە اپارماڭىزدارشى وتىنەمىن. مەن بارسام، مەنى ولتىرەدى دەيدى. سەبەبى ءبىر بالانىڭ قالتاسىنان پىشاق كوردىم ءبىزدى قورقىتتى»، - دەيدى اتا-انا ايگەرىم بوتاعاريەۆا.
ايگەرىم وسىدان كەيىن وزگە بالالاردىڭ اتا-اناسىمەن سويلەسكەن. بالالار 9-سىنىپتا وقيتىن اعالارىنا اقشا بەرىپ وتىرعانىن ايتقان. ءتىپتى سوڭعى كەزدە ءشوپ اراسىنا قالدىرعان قۇرعاق سۋسىندى جەۋدى تالاپ ەتىپ، الىستان باقىلاپ جۇرگەن كورىنەدى.
«ۇشەۋمىز تۋالەتتەن شىعىپ كەلە جاتقاندا قاعىپ كەتىپ ەدىك دەدى بايقاماي. سودان باسىمىزدان سالىپ قالدى،- دەيدى. باسىمىزدان سالىپ قالىپ، «ەرتەڭنەن باستاپ اقشا الىپ كەلەسىڭدەر 2 مىڭ»،- دەپ ايتتى دەيدى. كەلەسى كۇنى تابا الماي كەلگەن ءۇشىن بالا مەنىڭ بالامدى ۇستاپ الىپ، مەكتەپتىڭ ارتىنا بارىپ سوقتى دەيدى مەنى. يتەرىپ قالىپ ەكى تەپتى ىشىمنەن، سوسىن اياعىمنان تەپتى دەپ تۇر. سودان باستاپ اقشا جيناۋ باستالدى. ەكى مىڭ، ارتىنان 3 مىڭ بەردىم، ارتىنان 4 مىڭ بەردىم دەيدى. بالا بىراق قورقىپ، ءالى دۇرىس ايتا الماي وتىر»، - دەدى اتا-انا دانيار قاعازوۆ.
«ارالادى دا، ءيۋپيدىڭ قاعازىن الىپ شىقتى. الىپ شىقتى ءبىز سالىپ الدىق. ىشىندە كىشكەنتاي ۇگىندى. ءيۋپيدى ارالاستىرعان، اراسىندا بوتەن نارسە بار ەكەنى بەلگىلى بولىپ تۇر. ءبىز پاكەتتى الىپ، اۋزىمىزعا سالمايىنشا دەيدى ۆەلوسيپەد تۇراتىن جەردە 3 بالا قاراپ تۇرادى دەيدى. ءبىز اۋزىمىزعا سالعاننان كەيىن انا بالالار كەتىپ قالادى»، - دەدى اتا-انا عاليا مويناقوۆا.
اتا-انالار بۇل تۋرالى مەكتەپ باسشىلىعىنا حابارلاعان. بالالاردىڭ ايتۋىمەن، 9-سىنىپ وقۋشىلارى مەن ولاردىڭ اتا-انالارىن شاقىرىپ سويلەسىپتى. بىراق ەشقايسىسى مويىنداماي قويعان. مەكتەپ ديرەكتورى دا بۇل ىسكە جوعارى سىنىپتىڭ وقۋشىلارىنىڭ قاتىسى بولۋى مۇمكىن ەمەس دەپ ازار دا بەزەر بولادى.
«بالالاردى شاقىرتتىق، اتا-انالاردى شاقىرتتىق، بىراق بالالار جىلاپ تۇر. ءبىز ەشقانداي اقشا جيناعانىمىز جوق دەپ. سىرت ادام بولىپ تۇر عوي. مەكتەپتىڭ ىشىندە دەپ ويلامايمىن. مەكتەپتىڭ ىشىندە ەمەس، سىرتتاعى نارسە»، - دەيدى ب.مومىشۇلى اتىنداعى №25 ورتا مەكتەپ ديرەكتورىنىڭ مىندەتىن اتقارۋشى باقتىلى نۇرجانوۆا.
اتا-انالار ماسەلەنىڭ ءمان-جايىن بەينەكامەرا ارقىلى دا انىقتاماق بولعان. الايدا مەكتەپتىڭ سىرتىنداعى بەينەكامەرادا 2-قىركۇيەكتەن باستاپ ەشتەڭە تۇسىرىلمەگەن. ال دالىزدەگى كامەرالار تومەن قاراپ تۇرعاندىقتان، ەشتەڭە كورە المادىق،- دەيدى. ەندى مەكتەپتەگى جاعدايدى پوليتسيا انىقتاۋعا كىرىستى.
«تەكسەرۋ جۇمىستارىن جۇرگىزەمىز. ەگەر قىلمىس قۇرامى بولسا، قىلمىس بولادى. اكىمشىلىك بولسا، اكىمشىلىك بولادى. قوسىمشا جەتكىزەمىز تەكسەرىپ، انىقتاپ»، - دەدى اتىراۋ وبلىسى پد جەرگىلىكتى پوليتسيا قىزمەتى باسقارماسىنىڭ باستىعى ەرلان بيعامباەۆ.
ءبىلىم ءبولىمىنىڭ اقپاراتىنشا، مەكتەپكە بارۋدان باس تارتقان 4-سىنىپ وقۋشىلارىنا پسيحولوگيالىق كومەك كورسەتىلەدى. ال ءبىلىم وشاعىندا الىمجەتتىكتىڭ بار ەكەنى راس پا، جوق پا، ونى پوليتسيا انىقتايدى.
"ادىرنا" ۇلتتىق پورتالى
