اباي اۋدانىنىڭ جاستارى مەملەكەت باسشىسى ق.توقاەۆتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋىنداعى باستامالار تۋرالى ويلارىن ورتاعا سالىپ، ءوزارا پىكىر الماستى.
الدىمەن شىمكەنت قالالىق جاستار رەسۋرستىق ورتالىعىنىڭ باسشىسى ماعجان يساحوۆ پرەزيدەنتتىڭ جاستارعا قولايلى ورتا قالىپتاستىرۋ ءۇشىن بارلىق جاعداي قاراستىرعانىن ايتىپ، جاس بۋىندى پاتريوت بولۋعا شاقىردى.
ء–بىلىم ىزدەپ، تۇلعالىق دامۋ جولىنا تۇسكەن جاستاردى بۇگىننىڭ پاتريوتى دەپ ايتار ەدىم. قازىر جاستاردىڭ ساپالى ءبىلىم الۋىنا، جۇمىسپەن قامتىلىپ، كاسىپكەرلىكپەن اينالىسۋىنا جاعداي جاساۋ ءۇشىن كوپتەگەن مەملەكەتتىك باعدارلامار جۇزەگە اسىپ جاتىر. ماسەلەن، «جاستار پراكتيكاسى» باعدارلاماسىن الىپ قاراساق، ەندى وقۋ ورنىن تامامداعان جاس تۇلەك تاجىريبە جيناۋ ءۇشىن العاشقى جۇمىس ورنىنا جولدانادى. ءوز كاسىبىڭىزدى اشىپ، ەرەكشە جوبالاردى جۇزەگە اسىرۋدى كوزدەسەڭىز، مەملەكەتتىك گرانتتىڭ مۇمكىندىگىن پايدالانىڭىز. جۇمىس ىستەيتىن جاستاردى دا پاتەرمەن قامتۋ جولعا قويىلىپ وتىر. جۋىردا مەملەكەت باسشىسى ءوز جولداۋىندا 100 مىڭ جاستى جۇمىسپەن قامتۋ، كاسىپكەرلىگىن دامىتقىسى كەلگەن جاستار ءۇشىن 2,5 پايىزدىق نەسيە بەرىلەتىنىن ايتتى. ەل پرەزيدەنتى جاستار ءۇشىن بارىنشا كۇش سالىپ جاتىر. سوندىقتان سىزدەردەن دامۋ جولىنا ءتۇسىپ، ەلدىڭ وركەندەپ، گۇلدەنۋىنە ۇلەس قوسۋعا شاقىرامىن، - دەدى م.يساحوۆ.
شىمكەنت جاستارىنىڭ ۇسىنىسى ءاردايىم اكىمدىكتەن قولداۋ تاۋىپ كەلەدى. وتكەن جىلى قالانىڭ ءبىر توپ بەلسەندى جاستارى قالا اكىمى مۇرات ايتەنوۆپەن كەزدەسۋىندە ءار اۋداننان ورتالىق اشۋ ۇسىنىسىن جەتكىزگەن بولاتىن. كوپ ۇزاماي شاھار باسشىسىنىڭ تاپسىرماسىنا سايكەس، قالاداعى ءتورت اۋداندا جاستار رەسۋرستىق ورتالىعىنىڭ فيليالدارى ءوز جۇمىسىن باستادى. بۇگىندە اۋداندىق ورتالىقتاردا جاستارعا مەملەكەتتىك باعدارلامانىڭ مۇمكىندىكتەرى ءتۇسىندىرىلىپ، بوس ۋاقىتتى ءتيىمدى پايدالانۋعا باعىت بەرىپ وتىر.
–جاستاردىڭ بەلسەندىلىگى تەك ۆولونتەر بولۋىمەن شەكتەلمەۋ كەرەك. ەلىمىزدى دامىتۋعا، قالامىزدى كوركەيتۋگە، ءوز زامانداستارىڭىزدىڭ پاتريوتتىق سەزىمىن نىعايتۋعا باعىتتالعان جوبالارىڭىز بولسا ورتاعا سالىڭىزدار. ءبىز ءۇشىن سىزدەردىڭ ۇسىنىستارىڭىز ارقاشان ماڭىزدى، - دەدى ورتالىق باسشىسى.
جيىنعا قاتىسۋشى جاستار سپورت ۇيىرمەلەرىن كوبەيتۋدى، ۇلتتىق ءداستۇرىمىزدى دارىپتەۋگە ارنالعان سپورتتىق ويىنداردى ۇيىمداستىرۋدى ۇسىندى. ورتالىق باسشىسى وسى ۇسىنىستاردى الداعى كۇندەرى بىرلەسە پىسىقتاپ، جۇزەگە اسىراتىنىن جەتكىزدى.
