Abaı aýdanynyń jastary Memleket basshysy Q.Toqaevtyń «Ádiletti memleket. Birtutas ult. Berekeli qoǵam» atty Joldaýyndaǵy bastamalar týraly oılaryn ortaǵa salyp, ózara pikir almasty.
Aldymen Shymkent qalalyq jastar resýrstyq ortalyǵynyń basshysy Maǵjan Isahov Prezıdenttiń jastarǵa qolaıly orta qalyptastyrý úshin barlyq jaǵdaı qarastyrǵanyn aıtyp, jas býyndy patrıot bolýǵa shaqyrdy.
–Bilim izdep, tulǵalyq damý jolyna túsken jastardy búginniń patrıoty dep aıtar edim. Qazir jastardyń sapaly bilim alýyna, jumyspen qamtylyp, kásipkerlikpen aınalysýyna jaǵdaı jasaý úshin kóptegen memlekettik baǵdarlamar júzege asyp jatyr. Máselen, «Jastar praktıkasy» baǵdarlamasyn alyp qarasaq, endi oqý ornyn támamdaǵan jas túlek tájirıbe jınaý úshin alǵashqy jumys ornyna joldanady. Óz kásibińizdi ashyp, erekshe jobalardy júzege asyrýdy kózdeseńiz, memlekettik granttyń múmkindigin paıdalanyńyz. Jumys isteıtin jastardy da pátermen qamtý jolǵa qoıylyp otyr. Jýyrda Memleket basshysy óz Joldaýynda 100 myń jasty jumyspen qamtý, kásipkerligin damytqysy kelgen jastar úshin 2,5 paıyzdyq nesıe beriletinin aıtty. El Prezıdenti jastar úshin barynsha kúsh salyp jatyr. Sondyqtan sizderden damý jolyna túsip, eldiń órkendep, gúldenýine úles qosýǵa shaqyramyn, - dedi M.Isahov.
Shymkent jastarynyń usynysy árdaıym ákimdikten qoldaý taýyp keledi. Ótken jyly qalanyń bir top belsendi jastary qala ákimi Murat Áıtenovpen kezdesýinde ár aýdannan ortalyq ashý usynysyn jetkizgen bolatyn. Kóp uzamaı shahar basshysynyń tapsyrmasyna sáıkes, qaladaǵy tórt aýdanda Jastar resýrstyq ortalyǵynyń fılıaldary óz jumysyn bastady. Búginde aýdandyq ortalyqtarda jastarǵa memlekettik baǵdarlamanyń múmkindikteri túsindirilip, bos ýaqytty tıimdi paıdalanýǵa baǵyt berip otyr.
–Jastardyń belsendiligi tek volonter bolýymen shektelmeý kerek. Elimizdi damytýǵa, qalamyzdy kórkeıtýge, óz zamandastaryńyzdyń patrıottyq sezimin nyǵaıtýǵa baǵyttalǵan jobalaryńyz bolsa ortaǵa salyńyzdar. Biz úshin sizderdiń usynystaryńyz árqashan mańyzdy, - dedi ortalyq basshysy.
Jıynǵa qatysýshy jastar sport úıirmelerin kóbeıtýdi, ulttyq dástúrimizdi dáripteýge arnalǵan sporttyq oıyndardy uıymdastyrýdy usyndy. Ortalyq basshysy osy usynystardy aldaǵy kúnderi birlese pysyqtap, júzege asyratynyn jetkizdi.
