«الەمنىڭ وزگەرۋىن قالاساڭ، سول وزگەرۋدىڭ العاشقىسى ءوزىڭ بول»، – دەپ ناقىل ءسوزىن كەيىنگى ۇرپاققا مۇرا رەتىندە قالدىرىپ كەتكەن ماحاتما گانديدىڭ ەرەن ەڭبەگىن بۇگىنگى ءۇندى حالقى عانا ەمەس، دۇنيەجۇزى حالىقتارى دا ماڭگى ەستە تۇتىپ، جىل سايىن 2 قازاندا قايسار تۇلعانى ەسكە الۋ ماقساتىندا الەم بويىنشا «حالىقارالىق زورلىق-زومبىلىقسىز كۇنى» رەتىندە اتاپ ءوتەدى.
وسىعان وراي، 2 قازان 2022 جىلى ءال-فارابي اتىنداعى قازۇۋ، شىعىستانۋ فاكۋلتەتى، تاياۋ شىعىس جانە وڭتۇستىك ازيا كافەدراسى، ءۇندىتانۋ ءبولىمى ءۇندىستاننىڭ الماتىداعى كونسۋلدىعىنىڭ وكىلدەرىمەن بىرلەسە وتىرىپ، الماتىداعى گاندي ساياباعىندا م.ك. گانديدىڭ تۋعان كۇنىنە ارنالعان ەسكە الۋ شاراسىن وتكىزدى.
گاندي ساياباعىندا اتالىپ وتكەن شارا ەكى ەلدىڭ ءانۇراندارىنىڭ ورىندالۋىمەن باستالىپ، ءۇندىتانۋ ءبولىمىنىڭ ستۋدەنتتەرى تاراپىنان ءۇندىستاننىڭ ۇلت كوسەمى م.گانديدىڭ ناقىل سوزدەرىنىڭ وقىلۋىمەن اياقتالدى. سونىمەن قاتار ءۇندىستاننىڭ الماتىداعى وكىلدىگىنىڭ كونسۋلى اميت كۋمار ميشرا مىرزا ءسوز الىپ، قالا قوناقتارى مەن بۇكىل ءۇندى حالقىن اتاۋلى مەرەكەمەن قۇتتىقتاپ، جىلى لەبىزىن ءبىلدىرءدى. رۋحاني-تانىمدىق ديالوگتى جۇزەگە اسىرۋدى ماقسات ەتكەن شارا بارىسىندا ءۇندى ۇلتىنىڭ ءبىرتۋار داناسى، ساياسي قايراتكەر ماحاتما گانديدىڭ ءومىرى مەن ەڭبەكتەرى تۋرالى قۇندى وي-پىكىرلەر ايتىلدى.
داريعا كوكەەۆا
شىعىستانۋ فاكۋلتەتى
تاياۋ شىعىس جانە وڭتۇستىك ازيا كافەدراسىنىڭ مەڭگەرۋشىسى
