دەپۋتاتتاردى ەندى حالىق تاڭدايدى. سوندىقتان سول دەپۋتاتتارعا جاۋاپتى - حالىق. بۇل تۋرالى ساياساتتانۋشى ينديرا رىستينا جۋرناليست نۇرسۇلتان قۇرماننىڭ يۋتۋب ارناسىنا بەرگەن سۇحباتىندا ايتتى، دەپ حابارلايدى “ادىرنا” ۇلتتىق پورتالى.
ينديرا رىستينانىڭ ايتۋىنشا، سايلاۋداعى ادىلەتسىز شەشىم سايلاۋعا بارماعانداردىڭ جالقاۋلىقتارىنان بولادى.
“ەگەر سىزدەر سايلاۋعا بارماساڭىزدار ءسىزدىڭ بيۋللەتەنىڭىز بوس بولىپ تۇرادى. ونى بىرەۋ پايدالانىپ كەتسە شە؟ ءسىز ول بيۋللەتەندى ءوزىڭىز قولدانساڭىز، ونداي قاستاندىققا جول بەرمەيسىز. بۇل - ءبىرىنشى كەزەكتە. ەگەر ەشكىم ۇناماسا، بارىنە قارسىمىن دەپ تە داۋىس بەرە الاسىز. ول دا نەگىزگى كانديداتتاردان داۋىستارىن الىپ قويا الادى.
ەكىنشىدەن، سىزدەر بارماعان كەزدە، ءسىز داۋىسىڭىزدى جوق قىلىپ جىبەرەسىز. ءسىزدىڭ داۋىسىڭىز ەشنارسەگە اسەر ەتپەيدى. داۋىسىڭىزدى بەرمەي، ەشقانداي قاتىسپاي، “مەملەكەت دامىماي جاتىر”، دەپ قالاي ايتاسىز؟”،-دەدى ول.
سونداي-اق، ساياساتتانۋشى “سايلاۋدا كىمدەر كانديدات بولۋ مۇمكىن؟” دەگەن سۇراققا جاۋاپ بەردى
“بارلىعىنا بەلگىلى قاسىم-جومارت توقاەۆ “سايلاۋ الدى باعدارلامامدى شىعارامىن، سايلاۋعا قاتىسامىن” دەپ ايتتى. ءارى قاراي، “قانداي ازاماتتار سايلاۋعا قاتىسا الادى؟” دەگەن سۇراققا جاۋاپ بەرەيىك. بەلگىلىسى 40 جاستان اسقان ازامات بولۋ قاجەت. قازاقستاندا تۋعان، 15 جىل قازاقستاندا تۇرعان ازاماتتار بولۋ كەرەك. سونداي-اق، قازاقستاننىڭ ەلشىلىگى نەمەسە حالىقارالىق ۇيىمداردا جۇمىس ىستەگەن ازاماتتار دا قاتىسا الادى. ويتكەنى، ولار مەملەكەتتىڭ اتىنان جۇمىس ىستەدى. باستىسى قازاق ءتىلىن جەتىك ءبىلۋ قاجەت…
سايلاۋعا بىرنەشە پارتيا بىرىگىپ، ءبىر ادامدى دا ۇسىنۋعا بولادى. كانديداتتىڭ جىنىسى مەن مۇلكىنە قاراي شەكتەۋلەر جوق. وتباسىلىق جاعدايلارعا بايلانىستى دا شەكتەۋلەر جوق”،- دەدى ساياساتتانۋشى.
”ادىرنا” ۇلتتىق پورتالى
