Depýtattardy endi halyq tańdaıdy. Sondyqtan sol depýtattarǵa jaýapty - halyq. Bul týraly saıasattanýshy Indıra Rystına jýrnalıst Nursultan Qurmannyń ıýtýb arnasyna bergen suhbatynda aıtty, dep habarlaıdy “Adyrna” ulttyq portaly.
Indıra Rystınanyń aıtýynsha, saılaýdaǵy ádiletsiz sheshim saılaýǵa barmaǵandardyń jalqaýlyqtarynan bolady.
“Eger sizder saılaýǵa barmasańyzdar sizdiń bıýlletenińiz bos bolyp turady. Ony bireý paıdalanyp ketse she? Siz ol bıýlletendi ózińiz qoldansańyz, ondaı qastandyqqa jol bermeısiz. Bul - birinshi kezekte. Eger eshkim unamasa, bárine qarsymyn dep te daýys bere alasyz. Ol da negizgi kandıdattardan daýystaryn alyp qoıa alady.
Ekinshiden, sizder barmaǵan kezde, siz daýysyńyzdy joq qylyp jiberesiz. Sizdiń daýysyńyz eshnársege áser etpeıdi. Daýysyńyzdy bermeı, eshqandaı qatyspaı, “memleket damymaı jatyr”, dep qalaı aıtasyz?”,-dedi ol.
Sondaı-aq, saıasattanýshy “saılaýda kimder kandıdat bolý múmkin?” degen suraqqa jaýap berdi
“Barlyǵyna belgili Qasym-Jomart Toqaev “saılaý aldy baǵdarlamamdy shyǵaramyn, saılaýǵa qatysamyn” dep aıtty. Ári qaraı, “qandaı azamattar saılaýǵa qatysa alady?” degen suraqqa jaýap bereıik. Belgilisi 40 jastan asqan azamat bolý qajet. Qazaqstanda týǵan, 15 jyl Qazaqstanda turǵan azamattar bolý kerek. Sondaı-aq, Qazaqstannyń elshiligi nemese halyqaralyq uıymdarda jumys istegen azamattar da qatysa alady. Óıtkeni, olar memlekettiń atynan jumys istedi. Bastysy qazaq tilin jetik bilý qajet…
Saılaýǵa birneshe partııa birigip, bir adamdy da usynýǵa bolady. Kandıdattyń jynysy men múlkine qaraı shekteýler joq. Otbasylyq jaǵdaılarǵa baılanysty da shekteýler joq”,- dedi saıasattanýshy.
”Adyrna” ulttyq portaly
