جۋرناليست ميحايل كوزاچكوۆ ءوز تەلەگرام ارناسىندا قوستاناي وبلىسىندا باسىلماي جاتقان ءورتتىڭ قايدان شىعۋى تۋرالى ءوز مالىمدەمەسىن جاسادى. بۇل تۋرالى kznews.kz-كە سىلتەمە جاساپ "ادىرنا" ۇلتتىق پورتالى حابارلايدى.
ونىڭ ايتۋىنشا، ءورت ادەيى جاسالىنعان قاستاندىق بولۋى مۇمكىن دەيدى. پرەزيدەنت قاسىم-جومارت توقاەۆتىڭ احمەت بايتۇرسىنوۆتىڭ 150 جىلدىق مەرەيتويىنا كەلگەنىن قالاماعان جانداردىڭ ساياسي ويىنى بولۋى دا مۇمكىن دەگەن پىكىر قالدىردى:
«توتەنشە جاعدايلار مينيسترلىگىنىڭ مالىمەتىنشە، قوستاناي وبلىسىنداعى جالىن قىرىق مىڭ گەكتاردان استام جەردى الىپ جاتىر، زارداپ شەككەن ايماقتا بەس ەلدى مەكەن بار، ەكى مىڭعا جۋىق جەرگىلىكتى تۇرعىن ەۆاكۋاتسيالاندى. ءورت ءالى سوندىرىلگەن جوق. ال كەشە كەشكە اقمولا وبلىسىندا دا دابىل سوعىلدى. زەرەندى اۋدانىندا دا ءورت شىقتى، بىراق ول جەردە ءبارىن تەز ءسوندىرىپ ۇلگەردى. ورمان امان قالدى.
ارينە، ەلوردادا تالداۋ جۇمىسى باستالدى، ءارتۇرلى نۇسقالار قاراستىرىلۋدا. ورگاندار مۇنىڭ سەبەبى ساياساتپەن بايلانىستى بولۋى مۇمكىن دەپ سانايدى.30 تامىزدا مەملەكەت باسشىسىنىڭ ءباسپاسوز حاتشىسى پرەزيدەنتتىڭ قوستاناي وبلىسىنا، ونىڭ ىشىندە احمەت بايتۇرسىنوۆتىڭ مەرەيتويىن اتاپ وتۋگە قاتىسۋدى جوسپارلاپ وتىرعانىن رەسمي تۇردە مالىمدەدى. بارلىعىنا الدىن-الا حابارلاندى. 1 قىركۇيەكتە پرەزيدەنت قازاقستان حالقىنا جولداۋىمەن ءسوز سويلەپ، وندا مەملەكەت باسشىسىنىڭ مەرزىمىنەن بۇرىن سايلانۋى تۋرالى مالىمدەدى، ياعني ءىس جۇزىندە سايلاۋ ناۋقانىن باستاۋدى تاپسىردى. ول قاي جەردە باستالادى؟ ارينە، قوستاناي وبلىسىندا، احمەت بايتۇرسىنوۆتىڭ تۋعان جەرىندە. وندا دايىندىق بەلسەندى جۇرگىزىلىپ، كيىز ۇيلەر تىگىلىپ، تىكۇشاق الاڭدارى اسفالتتالدى. جەرگىلىكتى اقساقالدار دا دايىندالىپ جاتقان شىعار. ولار توقاەۆتان سايلاۋعا ءوز كانديداتۋراسىن ۇسىنۋدى وتىنەر ەدى. بىراق، بىرنەشە كۇن بۇرىن قوستاناي وبلىسىندا ءورت شىقتى، ورمان القاپتارىن جالىن شارپىپ كەتتى. شقو-دا قورىق ايماقتارىندا وسىنداي جاعداي ورىن الىپ تۇراتىن، بىراق بۇل جولى ءبارى باسقاشا. بەس كەنتتەگى جۇزدەگەن ءۇيدىڭ ءبىر-اق ساتتە ورتەنىپ كەتەتىندەي جاعداي بۇرىن-سوڭدى بولماعان.
بايتۇرسىنوۆتىڭ مەرەيتويى توقتاتىلدى. توقاەۆ ارنايى ورمان وپەراتسياسىنىڭ قالاي ۇيىمداستىرىلعانىن زەرتتەۋدى جوسپارلاپ وتىر. سوندىقتان، ەگەر ديۆەرسانتتاردىڭ قيتۇرقى ارەكەتتەرىنەن ءورت شىقسا، ولار قاجەتتى ناتيجەگە قول جەتكىزىپ، پرەزيدەنتتىڭ جوسپارلارىنا ارالاسا الدى دەگەن ءسوز. 5 قاڭتاردان كەيىن ونىڭ جاۋلارى كوبەيدى. الدىمەن ءۇش، كەيىن سەگىز ءورت وشاعىنىڭ بار ەكەنى حابارلاندى. ايماقتا جىلۋ بار، جاز ىستىق بولدى. الايدا شىلدە مەن تامىز ايلارىندا دا مۇنداي جاعداي بولعان جوق. سوندا پرەزيدەنت ءوز مالىمدەمەسىن جاساعاننان كەيىن قوستانايلىق كاۋاپشىلار دەرەۋ دەمالىس ورنىنا بارىپ، وت جاعىپ، ونى ءسوندىرۋدى ۇمىتىپ كەتكەن بە؟ قىزىق…
بۇل جاي عانا نۇسقا ەكەنى تۇسىنىكتى. بىراق ەلدە تەحنوگەندىك جانە باسقا دا اپاتتار ءجيى كەزدەسەتىنى تاڭقالارلىق. قوستاناي وبلىسىندا ءورت شىعىپ، اقتوبە قالاسىندا قوقىس ءۇيىندىسى جانىپ جاتىر، اتىراۋ وبلىسىندا اتموسفەراعا قانداي دا ءبىر شىعارىندىلار شىعارىلۋدا، ماڭعىستاۋ وبلىسىندا يتبالىقتار مەن بالىقتار قىرىلىپ جاتىر، بقو-دا اپاتتى جولدار جوندەلمەيدى، ءتىپتى «ەگەمەن قازاقستان» مەملەكەتتىك گازەتى دە ولار تۋرالى سىني ماقالا شىعاردى.
اكىمدەر بارىنە بىردەي جاۋاپتى ەمەس ەكەنى تۇسىنىكتى، بىراق ولار ايماقتى باقىلاۋدا ۇستاۋ كەرەك. بيلىكتەگى توپ-مەنەدجەرلەردىڭ تاجىريبەسىنىڭ جوقتىعى قىنجىلتادى.
پرەمەر-مينيستر ءاليحان سمايىلوۆ بۇكىل ءومىرىن ەلوردا دالىزدەرىندە وتكىزدى، اپ باسشىسى مۇرات نۇرتىلەۋ نەگىزىنەن شەتەلدە جۇمىس ىستەدى، ءتىپتى ۇقك توراعاسى ەرمەك ساعىمباەۆ ءوزىنىڭ كوپ جىلعى مانسابىن پرەزيدەنتتى قورعاۋعا ارنادى، ءتىپتى ونىڭ «ەلباسىنىڭ 3-ءشى دارەجەلى قاۋىپسىزدىگىن قامتاماسىز ەتكەنى ءۇشىن» مەدالى بار.
بۇلاردىڭ ەشقايسىسى قوستانايدا بولعان جوق. ولار تەك جاقسى جاڭالىقتارعا، اكىم سايلاۋ، مەكتەپ اشۋ شارالارىنا قاتىسادى. قازىردىڭ وزىندە قوستانايدا 43 مىڭ گەكتار جەر جانىپ جاتىر، بىراق ايماقتا تەك توتەنشە جاعداي ءمينيسترى عانا بار. قالعاندارى تەك بايانداما تىڭداۋمەن شەكتەلەدى. سوندىقتان مۇنداي جاعدايدا ارام ويلىلاردىڭ قاستاندىق جاساۋى ابدەن مۇمكىن» — دەيدى جۋرناليست.
"ادىرنا" ۇلتتىق پورتالى
