قوستاناي وبلىسىنىڭ اۋليەكول اۋدانىندا ورمان ءورتىن ءسوندىرۋ جۇمىستار جالعاسۋدا. ءورتتى سوندىرۋگە جەكە قۇرامنان 235 ادام، 32 بىرلىك تەحنيكا، 3 اۋە كەمەسى، 3 ءورت ءسوندىرۋ پويىزى جۇمىلدىرىلدى، ونىڭ ىشىندە تجم - 14 بىرلىك تەحنيكا، جەكە قۇرامنان 61 ادام، سۋاعار قۇرىلعىلارى بار 2 تىكۇشاق; ءىىم - جەكە قۇرامنان 33 ادام; قورعانىس مينيسترلىگى - جەكە قۇرامنان 20 ادام; ورمان شارۋاشىلىعى - 15 بىرلىك تەحنيكا،جەكە قۇرامنان 80 ادام، 1 اۋە كەمەسى; جاو - 3 بىرلىك تەحنيكا، جەكە قۇرامنان 20 ادام; "قتج" اق-3 ءورت ءسوندىرۋ پويىزى (21 ادام).
ساعات 18:00-دەگى جاعداي بويىنشا تجم سۋ اعىزۋ قۇرىلعىلارى بار 2 تىكۇشاق ءورتتى ءسوندىرۋ ءۇشىن اۋەدەن 12 رەت كوتەرىلىپ، 36 توننا سۋ شاشتى.
تىكۇشاقتار سۋدى ءورت ورىنان 25 شاقىرىم قاشىقتىقتا ورنالاسقان تابيعي سۋ قويماسىنان الىپ، ءورتتى سوندىرۋدە.
"قازگيدرومەت" رمك دەرەكتەرى بويىنشا قوستاناي وبلىسىندا جوعارى تەمپەراتۋرا 38 گرادۋسقا دەيىن، جەلدىڭ جىلدامدىعى سەكۋندىنا 23 مەترگە دەيىن ساقتالادى.
توتەنشە جاعدايلار ءمينيسترى يۋ. ۆ. يلين اۋەدەن بارلاۋ جۇمىستارىن جۇرگىزدى.
3 قىركۇيەكتە مەتەورولوگيالىق جاعدايدىڭ كۇردەلەنۋىنە، ونىڭ ىشىندە اۋا تەمپەراتۋراسى 36 گرادۋسقا دەيىن كوتەرىلىپ، جەلدىڭ ەكپىنى سەكۋندىنا 28 مەترگە دەيىن جەتۋىنە بايلانىستى ءورت اۋماعى 3000 گەكتاردان استى.
امانقاراعاي جانە نوۆونەجينكا ەلدى مەكەندەرىن قورعاۋعا باعىتتالعان كۇشتەر مەن قۇرالداردى قايتا توپتاستىرۋ جۇرگىزىلدى. وزەرنوە اۋىلىنان (حالىق سانى 250 ادام) جانە امانقاراعاي اۋىلىنىڭ سولتۇستىك بولىگىنەن (1000 ادام) حالىقتى ەۆاكۋاتسيالاۋ جۇمىستارى جۇرگىزىلدى. وزەرنوە اۋىلىندا 3 تۇرعىن ۇيدە ءورت شىقتى.ءورتتى سوندىرۋگە 6 ءورت ءسوندىرۋ ءاۆتوموبيلى، 8 سۋ تاسۋ ماشيناسى جۇمىلدىرىلدى. كالينينو اۋىلىنان 228 ادام، لەسنوە اۋىلىنان 363 ادام ەۆاكۋاتسيالاندى. ساعات 17.20-دا امانقاراعاي اۋىلىنداعى مۇناي بازاسىنا قاۋىپ تۋىندادى، وقيعا ورنىندا 3 ءورت ءسوندىرۋ اۆتوتسيستەرناسى (2-تجم، 1-مۇناي بازاسىنىڭ وبەكتىلىك قىزمەتى) جۇمىس ىستەۋدە.
"ادىرنا" ۇلتتىق پورتالى
