FlyArystan اۋە كومپانياسىنىڭ قىزمەتكەرلەرى مۇمكىندىگى شەكتەۋلى جولاۋشىنىڭ مۇگەدەكتەر ارباسىن باگاجعا وتكىزبەگەن، دەپ حابارلايدى «ادىرنا» ءتىلشىسى.
نياز سۇندەتاليەۆتىڭ ايتۋىنشا، وقيعا الماتى اۋەجايىندا بولعان. وعان ارنايى تەحنيكا ءالى كۇنگە دەيىن قايتارىلماعان.
«ءبىز 28 تامىز كۇنى ساعات 23:05-تە ۇشۋىمىز كەرەك ەدى. بىراق رەيس كەشىگىپ، 2:35-تە عانا ۇشتىق. جۇكتى تىركەۋ كەزىندە اۋە كومپانياسىنىڭ قىزمەتكەرى اربامدى ۇشاق بورتىنا كىرگىزە المايتىنىمدى ايتتى، ويتكەنى مەن كلەمما مەن باسقارۋ پۋلتتەرىن ءوزىم اجىراتۋىم كەرەك ەكەن. بىراق اياعىمنىڭ ساۋساقتارى قوزعالماسا، مۇنى قالاي جاسايمىن؟»—دەدى ول.
جولاۋشى 26 تامىز كۇنى قاراعاندىدان الماتىعا ءدال سول اۋە كومپانياسىمەن ەش قيىندىقسىز ۇشىپ كەلگەنىن اتاپ ءوتتى.
«ارباممەن نە ىستەۋ كەرەكتىگىن انىقتاۋ جارتى ساعاتقا سوزىلدى. وسى 30 مينۋت ىشىندە ماعان مۇلدەم جارامسىز، باس تىرەگى جوق، ارقاسى قاتتى جانە جۇمساق ورىندىعى جوق مۇگەدەكتەر ارباسىندا وتىرۋعا تۋرا كەلدى. وكىنىشكە قاراي، مەن سالمىن، ارقامدى تىكە ۇستاي المايمىن. كەز كەلگەن اربانى قولدانا المايمىن. وسى ارالىقتا مۇگەدەكتەر ارباسىندا بۇگىلىپ وتىردىم، دەنساۋلىعىم مەن ومىرىمە قاۋىپ ءتوندى»،– دەپ ءتۇسىندىردى ول.
نياز سۇندەتاليەۆ اۋە كومپانياسىنا مۇگەدەكتەر ارباسىن پايدالاناتىنىن، ۇشۋ كەزىندە كومەك قاجەت ەكەنىن بەس كۇن بۇرىن حابارلاعان.
«وسىنىڭ بارلىعىن اۋە كومپانياسى ەسكەردى، الايدا سوڭىندا قاراعاندىعا ۇشىپ كەتتىم. ال اربام الماتىدا تىركەۋ ۇستەلىندە قالدى. قازىر ۇيدەمىن، بىراق ادامدارمەن كەزدەسۋگە، ءوزىم شىعىپ تازا اۋا جۇتۋىما مۇمكىندىگىم جوق. ەڭ باستىسى، FlyArystan كومپانياسىنىڭ ەشقانداي قىزمەتكەرى مەن سال بولا تۇرا، قاراعاندى اۋەجايىنان ۇيگە قالاي جەتكەنىمدى سۇرامادى»،— دەدى جولاۋشى.
ازاماتتىق اۆياتسيا كوميتەتى وقيعاعا قاتىستى تۇسىنىكتەمە بەردى.
«ەگەر اۆياكومپانيا تاراپىنان زاڭبۇزۋشىلىقتار انىقتالسا، كوميتەت قولدانىستاعى زاڭنامادا قاراستىرىلعان شارالاردى قابىلدايدى. جۇمىس ناتيجەسى بويىنشا جاۋاپ بەرىلەدى»،- دەدى
ۆەدومستۆو.
