بۇگىن موڭعوليادا ۇلى شىڭعىس حاننىڭ تۋعانىنا 864 جىل تولۋىنا وراي ۇلتتىق ماقتانىش كۇنى اتالىپ ءوتىپ جاتىر، دەپ حابارلايدى "ادىرنا".
بۇل مەرەكە اي كۇنتىزبەسى بويىنشا قىستىڭ العاشقى ايىنىڭ ءبىرىنشى كۇنىنە سايكەس كەلەدى.
اتالعان كۇن 2012 جىلى موڭعوليا پرەزيدەنتىنىڭ جارلىعىمەن مەملەكەتتىك مەرەكە مارتەبەسىنە يە بولعان. تاريحي داتانى بەلگىلەۋ تۋرالى شەشىم موڭعوليا عىلىم اكادەمياسىنىڭ ۇسىنىسى مەن ارنايى جۇمىس توبىنىڭ قورىتىندىسى نەگىزىندە قابىلدانعان.
شىڭعىس حاننىڭ تاريحي مۇراسى حالىقارالىق دەڭگەيدە دە مويىندالعان. 1995 جىلى امەريكالىق The Washington Post باسىلىمى ونى «مىڭجىلدىق ادامى» دەپ اتاعان. ال 2005 جىلعى 14 قاراشادا بۇۇ باس اسسامبلەياسى «موڭعول مەملەكەتتىلىگىنىڭ 800 جىلدىعى» اتتى 60/16 قارارىن قابىلدادى.
قۇجاتتا كوشپەلى وركەنيەتتىڭ الەمدىك مادەنيەتتەر اراسىنداعى ديالوگتى دامىتۋعا، ساۋدا بايلانىستارىن كەڭەيتۋگە جانە ءتۇرلى وركەنيەتتەردىڭ ءوزارا ىقپالداستىعىنا قوسقان ۇلەسى اتاپ وتىلگەن. سونداي-اق موڭعوليانىڭ كوشپەلى مادەنيەت پەن ءداستۇردى ساقتاۋعا باعىتتالعان باستامالارىنا قولداۋ بىلدىرىلگەن.
