FlyArystan áýe kompanııasynyń qyzmetkerleri múmkindigi shekteýli jolaýshynyń múgedekter arbasyn bagajǵa ótkizbegen, dep habarlaıdy «Adyrna» tilshisi.
Nııaz Súndetálıevtiń aıtýynsha, oqıǵa Almaty áýejaıynda bolǵan. Oǵan arnaıy tehnıka áli kúnge deıin qaıtarylmaǵan.
«Biz 28 tamyz kúni saǵat 23:05-te ushýymyz kerek edi. Biraq reıs keshigip, 2:35-te ǵana ushtyq. Júkti tirkeý kezinde áýe kompanııasynyń qyzmetkeri arbamdy ushaq bortyna kirgize almaıtynymdy aıtty, óıtkeni men klemma men basqarý pýltterin ózim ajyratýym kerek eken. Biraq aıaǵymnyń saýsaqtary qozǵalmasa, muny qalaı jasaımyn?»—dedi ol.
Jolaýshy 26 tamyz kúni Qaraǵandydan Almatyǵa dál sol áýe kompanııasymen esh qıyndyqsyz ushyp kelgenin atap ótti.
«Arbammen ne isteý kerektigin anyqtaý jarty saǵatqa sozyldy. Osy 30 mınýt ishinde maǵan múldem jaramsyz, bas tiregi joq, arqasy qatty jáne jumsaq oryndyǵy joq múgedekter arbasynda otyrýǵa týra keldi. Ókinishke qaraı, men salmyn, arqamdy tike ustaı almaımyn. Kez kelgen arbany qoldana almaımyn. Osy aralyqta múgedekter arbasynda búgilip otyrdym, densaýlyǵym men ómirime qaýip tóndi»,– dep túsindirdi ol.
Nııaz Súndetálıev áýe kompanııasyna múgedekter arbasyn paıdalanatynyn, ushý kezinde kómek qajet ekenin bes kún buryn habarlaǵan.
«Osynyń barlyǵyn áýe kompanııasy eskerdi, alaıda sońynda Qaraǵandyǵa ushyp kettim. Al arbam Almatyda tirkeý ústelinde qaldy. Qazir úıdemin, biraq adamdarmen kezdesýge, ózim shyǵyp taza aýa jutýyma múmkindigim joq. Eń bastysy, FlyArystan kompanııasynyń eshqandaı qyzmetkeri men sal bola tura, Qaraǵandy áýejaıynan úıge qalaı jetkenimdi suramady»,— dedi jolaýshy.
Azamattyq avıaııa komıteti oqıǵaǵa qatysty túsinikteme berdi.
«Eger avıakompanııa tarapynan zańbuzýshylyqtar anyqtalsa, Komıtet qoldanystaǵy zańnamada qarastyrylǵan sharalardy qabyldaıdy. Jumys nátıjesi boıynsha jaýap beriledi»,- dedi
vedomstvo.
