پرەزيدەنت قاسىم-جومارت توقاەۆ تۇركيانىڭ يزمير پروۆينتسياسىنداعى مەتاللۋرگيالىق زاۋىتتا بولعان جارىلىسقا بايلانىستى تۇركيا پرەزيدەنتى رەجەپ تايىپ ەردوعانعا كوڭىل ايتۋ جەدەلحاتىن جولدادى، دەپ حابارلايدى "ادىرنا".
بۇل تۋرالى اقوردانىڭ ءباسپاسوز قىزمەتى حابارلادى.
مەملەكەت باسشىسى باۋىرلاس تۇركيا حالقىنا قايعىرا كوڭىل ايتىپ، جارىلىس سالدارىنان زارداپ شەككەن ازاماتتاردىڭ تەزىرەك ساۋىعىپ كەتۋىنە تىلەكتەستىك ءبىلدىردى.
بۇعان دەيىن تۇركيانىڭ يزمير پروۆينتسياسىنداعى HABAŞ مەتاللۋرگيالىق زاۋىتىندا بولعان جارىلىسقا بايلانىستى التى كۇدىكتىنىڭ ۇستالعانى حابارلانعان ەدى. قايعىلى وقيعا سالدارىنان قازا تاپقاندار سانى 17 ادامعا جەتكەن.
EKOTÜRK مالىمەتىنشە، جارىلىس 9 قاراشادا الياگا اۋدانىنداعى زاۋىتتا جوسپارلى جوندەۋ جۇمىستارى كەزىندە بولعان. ارتىنشا ءورت شىعىپ، بىرنەشە جۇمىسشى ءۇيىندى استىندا قالعان. وقيعا ورنىنا ءورت سوندىرۋشىلەر، قۇتقارۋشىلار مەن مەديتسينا قىزمەتكەرلەرى جەدەل جەتكەن.
