اقش كونگرەسىندە قورعانىس ءمينيسترى پيت حەگسەتكە قاتىستى قارار جوباسى تانىستىرىلدى، دەپ حابارلايدى "ادىرنا" ۇلتتىق پورتالى.
DW دەرەگىنشە، قۇجاتتى وكىلدەر پالاتاسىنىڭ رەسپۋبليكاشىل مۇشەسى توماس مەسسي ۇسىنعان. ول ءمينيستردى يرانعا قارسى سوعىسقا بايلانىستى وكىلەتتىگىن اسىرا پايدالاندى دەپ ايىپتاپ وتىر.
34 بەتتەن تۇراتىن قۇجات سەگىز باپتان قۇرالعان. ونىڭ ۇشەۋى يرانعا قارسى اسكەري ارەكەتتەرگە قاتىستى. مەسسيدىڭ پىكىرىنشە، حەگسەت كونگرەستىڭ رۇقساتىنسىز سوعىس باستاعان. سونداي-اق قارار جوباسىندا يەمەندەگى اسكەري قيمىلدار، اقش اسكەرىنىڭ كاريب تەڭىزىندەگى ەسىرتكى تاسىمالداۋشىلاردىڭ كەمەلەرىنە جاساعان سوققىلارى جانە ۆەنەسۋەلا پرەزيدەنتى نيكولاس مادۋرونى تۇتقىنداۋ ماسەلەلەرى قامتىلعان.
توماس مەسسي ءمينيستردى كونگرەستىڭ سوعىس جاريالاۋ قۇقىعىنا قاتىستى شەشىمدەرىن ەلەمەدى، شەتەلدىك كوشباسشىلاردى زاڭسىز ۇستاپ، ترامپ اكىمشىلىگىن سىناۋشىلاردى ءسوز بوستاندىعىن پايدالانعانى ءۇشىن قۋدالادى دەپ ايىپتادى.
اقش پرەزيدەنتى دونالد ترامپ حەگسەتتىڭ قىزمەتىنە وڭ باعا بەرىپ، ونىڭ «وتە جاقسى جۇمىس اتقارعانىن» اتاپ ءوتتى. سونىمەن قاتار باستامانى كوتەرگەن مەسسيدى سىنعا الدى. ال پيت حەگسەت يمپيچمەنت جاريالاۋ ارەكەتتەرىنە الاڭدامايتىنىن ايتىپ، 10 قاراشادا پەنتاگوندا وسى ماسەلەگە قاتىستى بريفينگ وتكىزەتىنىن حابارلادى.
DW مالىمەتىنشە، وكىلدەر پالاتاسى مەسسيدىڭ ۇسىنىسىن وسى اپتادا قاراۋى مۇمكىن.
توماس مەسسي كەنتۋككي شتاتىنان سايلانعان. ول مارقۇم قارجىگەر دجەففري ەپشتەيننىڭ ىسىنە قاتىستى قۇجاتتاردى جاريا ەتۋگە ىقپال ەتكەن ساياساتكەرلەردىڭ ءبىرى. دونالد ترامپ باستاپقىدا قۇجاتتاردى جاريالاۋعا قارسى بولعانىمەن، كەيىن كونگرەسس تالابىنا كەلىسكەن. ال كەنتۋككيدەگى رەسپۋبليكاشىلداردىڭ الدىن الا سايلاۋىندا ترامپ مەسسيدىڭ ورنىنا ۇمىتكەر بولعان ونىڭ قارسىلاسىن قولداعان.
