"سىزدەر كەڭەس وداعىن قايتا تىرىلتپەكسىزدەر مە؟" - بەلگىلى تاريحشى ايماعامبەتوۆكە اشىق حات جازدى

20107
Adyrna.kz Telegram

بەلگىلى ۇستاز، تاريحشى ءومىر شىنىبەكۇلى وقۋ-اعارتۋ ءمينيسترى اسحات ايماعامبەتوۆكە "سىزدەر كەڭەس وداعىن قايتا تىرىلتپەكسىزدەر مە؟" دەپ سۇراق قويىپ، اشىق حات جازدى.  بۇل تۋرالى "ادىرنا" ۇلتتىق پورتالى حابارلايدى. 

ۇستازدىڭ ايتۋىنشا، مەكتەپتەردە وتكىزىلەيىن دەپ جاتقان "جەڭىس ديكتانتى" دەگەن شارانىڭ ارتىندا رەسەي تۇر...

"اسحات قاناتۇلى، ءسىز ەلىمىزدىڭ ءبىلىم سالاسىنا ءبىراز ەڭبەك سىڭىرگەنىڭىزدى ءتىپتى دۇشپاندارىڭىز دا جوققا شىعارا المايدى. ەلىمىزدىڭ مينيسترلەرى اراسىنان ءسىز تۇڭعىش رەت اشىق جۇمىس ىستەۋدى باستادىڭىز. ءسىزدىڭ تۇسىڭىزدا "پەداگوگ مارتەبەسى تۋرالى" زاڭ قابىلداندى. بەلسەندى پەداگوگتاردىڭ ۇسىنىستارى بۇل زاڭعا كىرمەي قالسا دا، ءوز باسىم مۇنى پروگرەسسيۆتى قادام دەپ ەسەپتەيمىن! مەن وزىڭىزبەن كەزدەسكەندە دە، مەملەكەتتىك حاتشى ەرلان كارينمەن كەزدەسكەندە دە مينيسترلىكتەن شىعىپ جاتقان قۇجاتتاردىڭ كوپشىلىگى شيكى ەكەنىن ايتقان بولاتىنمىن. ءيا، ءبىر ورىندا جىلدار بويى وتىرعان كەيبىر مەڭگەرۋشىلەر مەن ديرەكتورلاردىڭ سىبايلاستىق تامىر جايىپ جىبەرگەنى شىندىق. وندايلاردى جىلى ورىندارىنان قوزعاۋ كەرەك. بىراق ول ءۇشىن الدىمەن پروبلەمانى جان-جاقتى زەرتتەپ، تاۋەكەلدەردى انىقتاپ الىپ قانا روتاتسيالاۋ تۋرالى بۇيرىق شىعارۋ كەرەك ەدى... ەندى بىرنەشە جىل ءبىلىم باسقارمالارى، ءبىلىم سالاسىنداعى ساپانى قامتاماسىز ەتۋ دەپارتامەنتتەرى، مينيسترلىك جانە قۇقىق قورعاۋ ورگاندارى ءبىلىم وشاقتارىنان تۇسكەن ارىز-شاعىمداردان كوز اشا الماي قالاتىن بولادى...", - دەيدى ءومىر شىنىبەكۇلى.

ءومىر شىنىبەكۇلىنىڭ ايتۋىنشا، سوڭعى كەزدەرى ايماعامبەتوۆتىڭ ارەكەتتەرى كوپشىلىك اراسىندا تۇسىنىكسىزدىك پەن تۇسىنبەۋشىلىككە اكەلدى...

"د/ش جانە ورىس ءتىلى پاندەرىنىڭ ساعاتتارى قىسقاراتىنى تۋرالى پەداگوگتار تەك تامىز ايىندا عانا بىلگەنى ءتىپتى تۇسىنىكسىز.. ال ەندى، اباي وبلىسى مەكتەپتەرىندە "جەڭىس ديكتانتى" دەگەن شارا وتپەكشى ەكەن دەپ جەلى شۋلاپ جاتىر؟ راس پا؟ ءيا، پاتريوتتىق تاربيە كەرەك.. بىراق ءدال وسى "جەڭىس" تاقىرىبى 9-مامىردىڭ قارساڭى بولسا ءبىر ءسارى، قىركۇيەك ايىندا قوزعايتىن ماسەلە ەمەس قوي.. قىسقاسى سوڭعى كەزدەردەگى ارەكەتتەرىڭىز مۇلدەم تۇسىنىكسىز بوپ بارا جاتىر... 17 تامىز كۇنى "سەنىمەن بولاشاق" قوعامدىق بىرلەستىگىنىڭ جيىنىنا قاتىسىپ ءسوز سويلەگەنىڭىز راس پا؟ مەنىڭ پوشتاما كەپ تۇسكەن وسى جيىنعا شاقىرتۋدىڭ سكرينىندە راحىمبەك جولاەۆتىڭ دەگەننىڭ قولى تۇر... تۇركىستان وبلىسىنىڭ ءبىلىم باسقارماسى باستىعى قىزمەتىندە 3 جىلعا جۋىق وتىرعان ر.جولاەۆ نەسىمەن ەستە قالدى؟ جولاەۆتىڭ تۇسىندا تۇركىستان وبلىسىنىڭ ءبىلىم سالاسىنداعى بىلىق شەكتەن شىقتى. 2020 جىلى ونلاين-وقۋ كەزىندە كومپيۋتەر الۋعا بولىنگەن ميللياردتاعان قارجىنىڭ ەسەبىن كىم بەرەدى؟ وتكەن جىلى سايرام اۋدانى ءبىلىم ءبولىمىنىڭ باستىعى پارامەن ۇستالدى. سارىاعاش اۋدانى ءبىلىم ءبولىمىنىڭ باستىعى قاتەلەسپەسەم "ادام ولتىرۋگە تاپسىرىس بەردى" دەگەن كۇدىكپەن قاماۋدا وتىر. بيىل كوكتەمدە تولەبي اۋدانى ءبىلىم ءبولىمىنىڭ باستىعى ۇستالدى. ءبىر ايداي بۇرىن شاردارا اۋدانى ءبىلىم ءبولىمىنىڭ باستىعى قاماۋعا الىندى دەگەن قاۋەسەت تارادى... وسىلاردىڭ ءبارى ر.جولاەۆتىڭ قول استىندا بىرنەشە جىل قىزمەت اتقارعان ازاماتتار...", - دەيدى ۇستاز. 

ۇستازدىڭ ايتۋىنشا، "جەڭىس ديكتانتى" دەگەن شارانىڭ ارتىندا رەسەيلىكتەر تۇر... سوندا بۇل قالاي بولعانى؟

"وسىنداي "تاريحى" بار ر.جولاەۆ باسقاراتىن قوعامدىق ۇيىم مەن وقۋ-اعارتۋ ءمينيسترى ا.ايماعامبەتوۆ اراسىندا قانداي بايلانىس بولۋى مۇمكىن دەگەن سۇراق وزىنەن ءوزى تۋىنداپ تۇر.. بىلەتىندەردىڭ ايتۋىنشا "جەڭىس ديكتانتى" دەگەن شارانىڭ ارتىندا رەسەيلىكتەر تۇرعان كورىنەدى. وسى راس پا؟ ال جيىنىندا ءسىز ءسوز سويلەدى دەگەن "سەنىمەن بولاشاق" قب اسپەتتەپ جۇرگەن اموناشۆيلي گرۋزيادا تۋعان كەڭەس عالىمى ەكەنىن كوزى قاراقتى ادام بىلەدى. ونىڭ ۇلى وتكىزگەن ترەنينگتەن ءوزىڭىز ءۇشىن جاڭا نە الا الدىڭىز؟ سوندا سىزدەر كەڭەس وداعىن قايتا تىرىلتپەكسىزدەر مە؟ وسى سۇراقتارعا جاۋاپ بەرىڭىزشى، مينيستر مىرزا...", -دەپ جازدى ءومىر شىنىبەكۇلى ءوزىنىڭ فەيسبۋك پاراقشاسىندا. 

"ادىرنا" ۇلتتىق پورتالى 

پىكىرلەر