اقىن-جازۋشىلاردى، دراماتۋرگتەر مەن بالالار اۆتورلارىن قولداۋ ماقساتىندا «AMANAT» پارتياسىنىڭ باستاماسىمەن جىل سايىنعى رەسپۋبليكالىق «ۇلى دالا» شىعارماشىلىق بايقاۋى باستالدى، دەپ حابارلايدى "ادىرنا" ۇلتتىق پورتالى.
بايقاۋ جىل سايىن «ۇلتتىق مۇرا» پارتيالىق جوباسى اياسىندا قازاقستان جازۋشىلار وداعىمەن بىرلەسىپ وتكىزىلەدى. 2019 جىلى باستاۋ العان بايقاۋ وسىمەن ءتورتىنشى رەت وتكىزىلىپ وتىر. ءباسپاسوز ءماسليحاتىندا پارتيا حاتشىسى داۋلەت كارىبەك جۋرناليستەرگە بايقاۋعا قاتىسۋدىڭ باستى ەرەكشەلىكتەرى مەن شارتتارى تۋرالى ەگجەي-تەگجەيلى بايانداپ بەردى.
«ءداستۇرلى تۇردە ۇيىمداستىرىلىپ كەلە جاتقان «ۇلى دالا» بايقاۋىنىڭ باستى ماقساتى – ۇلتتىق جانە رۋحاني قۇندىلىقتاردى پاش ەتەتىن بۇگىنگى وتاندىق اۆتورلاردىڭ شىعارمالارىن قولداۋ جانە ناسيحاتتاۋ. بيىل قاتىسۋشىلار شىعارماشىلىق شەبەرلىگىن ءتورت نوميناتسيا بويىنشا سىناپ كورەدى: «پروزا»، «پوەزيا»، «دراماتۋرگيا» جانە «بالالارعا ارنالعان شىعارما». نەگىزگى نوميناتسيالاردان بولەك، بايقاۋ اياسىندا ارنايى سىيلىقتار دا قاراستىرىلعان. سونداي-اق قاتىسۋشىلاردىڭ بارلىق شىعارماسى باق-تا جاريالانادى»، – دەدى پارتيا حاتشىسى داۋلەت كارىبەك
سپيكەردىڭ ايتۋىنشا، بيىل احمەت بايتۇرسىنۇلىنىڭ 150 جىلدىعىنا، مۇحتار اۋەزوۆتىڭ 125 جىلدىعىنا وراي ارنايى سىيلىقتار تاعايىندالادى. سونىمەن قاتار، «الاش اماناتى» ارنايى سىيلىعى تابىستالادى.
قر مەملەكەتتىك سىيلىعىنىڭ لاۋرەاتى روزا مۇقانوۆا قازىرگى قازاق ادەبيەتىنە، سونىڭ ىشىندە جاس قالامگەرلەرگە قوماقتى قولداۋ قاجەت ەكەنىن العا تارتتى.
«ادەبيەت – قولداۋعا ءزارۋ. اسىرەسە، ادەبيەتكە كەلگەن جاستار قاۋىمىن قولداۋ قاجەت. ال وسىنداي كونكۋرستار تالانتتى جاستاردىڭ ادەبيەت الەمىندەگى بەتالىسىن ايقىنداپ، شىعارماشىلىعىن وقىرمانعا تانىستىرادى»، – دەدى جازۋشى-دراماتۋرگ روزا مۇقانوۆا.
قازاقستاننىڭ ەڭبەك سىڭىرگەن قايراتكەرى امانجول ءالتايدىڭ ايتۋىنشا، بۇگىنگى قوعامدا كوركەم ادەبيەت ايرىقشا ورىن الادى.
«ۇلى دالا» شىعارماشىلىق بايقاۋى – «AMANAT» پارتياسىنىڭ الداعى ۋاقىتتا جۇيەلى تۇردە ۇلتتىڭ مادەنيەتى مەن ونەرىنە قامقورشى بولاتىندىعىنىڭ ناقتى ءبىر دالەلى. حاكىم اباي ايتقانداي، اقىلى نۇرلى، جۇرەگى جىلى، قايراتى ىستىق تولىق ادام قالىپتاسۋى ءۇشىن جاستار مىندەتتى تۇردە كوركەم ادەبيەتتىڭ ۋىزىن ەمىپ ءوسۋى كەرەك»، دەدى ءماجىلىس دەپۋتاتى امانجول ءالتاي.
قازاقستاننىڭ ەڭبەك سىڭىرگەن قايراتكەرى جاناربەك ءاشىمجان مۇنداي ءىس-شارا جاس قالامگەرلەردى ىنتالاندىرىپ، شىعارماشىلىعىنا تىڭ سەرپىن بەرەتىنىن جەتكىزدى.
«ۇلى دالا» بايقاۋى – مادەنيەت، رۋحانيات، ادەبيەت باعىتىنداعى ەلىمىزدەگى ەڭ ءىرى جوبالاردىڭ ءبىرى. قازىرگى كەزدە پروزا، دراماتۋرگيا، پوەزيا جانرلارىندا قالام تارتىپ جۇرگەن اسا تالانتتى جاستار بار. ال مۇنداي بايقاۋلار – جاستار قاۋىمىنا شالقار شابىت سىيلاپ، جاڭا شىعارمالار جازۋعا ىنتالاندىرادى»، – دەدى ءماجىلىس دەپۋتاتى جاناربەك ءاشىمجان.
پارتيا حاتشىسى داۋلەت كارىبەك بايقاۋعا كەلىپ تۇسكەن بارلىق شىعارما كوزىقاراقتى وقىرماننىڭ نازارىنا كۇندەلىكتى ۇسىنىلىپ، اشىق جاريالانىپ وتىراتىنىن ايتتى.
«قاتىسۋشىلارعا قويىلاتىن بارلىق تالاپتار مەن بايقاۋ بارىسى بەلگىلەنگەن ەرەجە ءماتىنى بۇگىن باق-تا، الەۋمەتتىك جەلىلەردەگى پاراقشالارىمىزدا جانە پارتيانىڭ رەسمي سايتىندا جاريالانادى. ەرەجەگە ساي كەلىپ تۇسكەن شىعارمالاردى بۇركەنشىك ەسىممەن اikyn.kz سايتىنان ارنايى اشىلعان «ۇلى دالا» بايقاۋى ايدارىندا كۇندەلىكتى جاريالاپ وتىراتىن بولامىز. كەز-كەلگەن قىزىعۋشىلىق تانىتقان ادام سول جەردەن شىعارمالارمەن تانىسا الادى»، – دەپ اتاپ ءوتتى پارتيا حاتشىسى داۋلەت كارىبەك.
ايتا كەتۋ كەرەك، بايقاۋعا 20-45 جاس ارالىعىنداعى اۆتورلار قاتىسا الادى. قاتىسۋشىلار 26 تامىز بەن 10 قازان ارالىعىندا ىرىكتەلەدى. بايقاۋ ناتيجەسى 25 قازان – رەسپۋبليكا كۇنى قارساڭىندا قورىتىندىلانىپ، سالتاناتتى ءىس-شارادا جاريالانادى.
"ادىرنا" ۇلتتىق پورتالى
