ەلوردادا «AMANAT» پارتياسىنىڭ «جاستار رۋحى» جاستار قاناتى استانا قالاسى اكىمدىگىنىڭ قولداۋىمەن اۋقىمدى بوس جۇمىس ورىندارى جارمەڭكەسىن ۇيىمداستىردى. ءىس-شاراعا 3000-عا جۋىق ادام قاتىستى.
بۇگىندە مىڭداعان قازاقستاندىق جاستار جۇمىس ىزدەپ ءجۇر. ال ەگەر جۇمىستى ءبىر كۇندە – ەلوردانىڭ ءدال ورتالىعىندا، ەلىمىزدىڭ ونداعان ءىرى جۇمىس بەرۋشىلەرىنىڭ اراسىنان تابۋعا بولاتىن بولسا شە؟ استانادا ءدال وسىلاي بولدى. ە. راحماديەۆ اتىنداعى مەملەكەتتىك اكادەميالىق فيلارمونيا ءبىر كۇنگە مەكتەپ، كوللەدج جانە جوعارى وقۋ ورىن تۇلەكتەرىنە ارنالعان اۋقىمدى بوس جۇمىس ورىندارى جارمەڭكەسى اياسىندا ستۋدەنتتەردى، تۇلەكتەردى جانە جۇمىس بەرۋشىلەردى بىرىكتىرەتىن ءىرى مانساپ الاڭىنا اينالدى. جاستار ۇلتتىق كومپانيالاردان باستاپ، ونەركاسىپتىك كاسىپورىندارعا دەيىنگى 70-تەن استام كومپانيانىڭ وكىلدەرىمەن بەتپە-بەت سويلەستى. ولار جۇمىسقا ورنالاسۋ مۇمكىندىگى تۋرالى ءبىلىپ، العاشقى سۇحباتتان ءوتتى.
«AMANAT» پارتياسىنىڭ اتقارۋشى حاتشىسى داۋلەت كارىبەك مەملەكەت باسشىسى قاسىم-جومارت توقاەۆ جاريالاعان جۇمىسشى ماماندىقتارى جىلى وسىنداي ءىس-شارالار ۇيىمداستىرۋدىڭ ءمانى مەن ماڭىزىن اتاپ ءوتتى. بۇل شەشىم قوعام يگىلىگى جولىندا ادال جۇمىس ىستەپ جۇرگەن جانداردى قولداۋعا ارنالعان.
«بۇگىندە جۇمىسشى ماماندىقتار – تۇراقتىلىق پەن جوعارى سۇرانىس قانا ەمەس، سونىمەن قاتار لايىقتى جالاقى، سىي-قۇرمەت جانە مانساپ جولىندا جوعارىلاۋ مۇمكىندىگى. جاستار ەكونوميكانىڭ وسى سەكتورىنا بەت بۇرىپ، ەل ەرتەڭى ەڭبەكپەن بايلانىستى ەكەنىن تۇسىنە باستادى. بۇل – وتە ماڭىزدى. ءبىزدىڭ بوس جۇمىس ورىندارى جارمەڭكەلەرىمىز جاستارعا ومىردە ءوز ورنىن، ال جۇمىس بەرۋشىلەرگە لايىقتى مامان تابۋىنا كومەكتەسەدى. جاس ازاماتتار ءۇشىن تەك جۇمىس تابۋ عانا ەمەس، سونىمەن قاتار ولاردىڭ ەڭبەگى باعالاناتىنىن، ءوسۋ مەن دامۋ مۇمكىندىگى بار ەكەنىن سەزىنۋ ماڭىزدى. سوندىقتان «AMANAT» پارتياسى ءار تۇلەك ومىردە ءوز ورنىن تاۋىپ، مانساپ جولىن باستاي الاتىن باستامالاردى جۇزەگە اسىرۋدا»، – دەدى ول.
استانادان بولەك، «جاستار رۋحىنىڭ» باستاماسىمەن ەلىمىزدىڭ بارلىق وبلىس ورتالىعىندا وسىنداي جارمەڭكەلەر وتۋدە. ولارعا كەم دەگەندە 50 مىڭ قازاقستاندىق جاس ازامات كەلەدى دەپ جوسپارلانۋدا. بوس جۇمىس ورىندارى جارمەڭكەلەرى ء«بىر تەرەزە» قاعيداتى بويىنشا وتۋدە: جۇمىس ىزدەپ جۇرگەن جاستار كومپانيالاردىڭ ۇسىنىستارىمەن تانىسىپ قانا قويماي، جاستارعا قولداۋ كورسەتۋدىڭ مەملەكەتتىك باعدارلامالارى بويىنشا انىقتاما الا الادى. سونىڭ ىشىندە، جاستار پراكتيكاسىنان باستاپ، وقىتۋ جانە ءوز ءىسىن اشۋعا دەيىنگى قولداۋلار بار.
«مەن كوللەدجدى «ەلەكترومونتەر» ماماندىعى بويىنشا ءتامامداپ، ۇزاق ۋاقىت لايىقتى جۇمىس ىزدەدىم. بۇگىن وسى جارمەڭكەدە بىرنەشە كومپانيا وكىلىمەن سويلەسىپ، سۇحباتقا شاقىرۋ الدىم. بۇل – ەڭبەك ەتۋگە ىنتالاندىرادى. سەبەبى ناقتى مۇمكىندىكتەردى كورىپ وتىرمىن. جۇمىس بەرۋشى ءسىزدى تاڭدامايدى، كەرىسىنشە ءسىز بوس جۇمىس ورىندارىنىڭ اراسىنان وزىڭىزگە قولايلىسىن تاڭدايسىز»، – دەدى جارمەڭكەگە قاتىسقان ايدار كەنجەباەۆ.
سونداي-اق جارمەڭكە اياسىندا «وتباسى بانك» وكىلدەرى يپوتەكا رەسىمدەۋگە نيەتتى ازاماتتارعا كەڭەس بەرىپ، استانا قالاسى اكىمدىگىنىڭ وكىلدەرى NEET ساناتىنداعى جاستاردى جۇمىسپەن قامتۋعا جاردەمدەسۋ بويىنشا «Joltap» جوباسىن ۇسىندى. ال ەلورداداعى ەڭبەك ۇتقىرلىعى ورتالىعىنىڭ قىزمەتكەرلەرى تۇلەكتەرگە ارنالعان «العاشقى جۇمىس ورنى» جانە «جاستار پراكتيكاسى» جوبالارى تۋرالى حاباردار ەتتى. سونىمەن قاتار جارمەڭكەگە كەلگەن ازاماتتارعا ەلىمىزدىڭ وزگە وڭىرلەرىنە كوشىپ بارۋ مۇمكىندىگى تۋرالى مالىمەت ۇسىنىلدى.
«ەرتىس ءوڭىرى – ونەركاسىپ ايماعى. بىزدە بوس جۇمىس ورىندارى وتە كوپ. جۋىردا استانا قالاسى دا حالىق اراسىندا «وڭتۇستىكتەن سولتۇستىككە» دەپ اتالاتىن ەرىكتى تۇردە قونىس اۋدارۋ باعدارلاماسىنا شىعۋ ءوڭىرى رەتىندە ەندى. وسى باعدارلاما شەڭبەرىندە مىندەتتى تۇردە مەملەكەتتىك قولداۋ شارالارى قاراستىرىلعان. ماسەلەن – كوشۋگە ارنالعان سۋبسيديا. كوشىپ بارعان وتباسىنىڭ ءار مۇشەسىنە جىل بويى تۇرعىن ءۇي جالداۋ وتەماقىسى تولەنەدى. بۇعان قوسا، ەكونوميكالىق ۇتقىرلىق سەرتيفيكاتى بەرىلەدى. ياعني، تۇرعىن ءۇي ساتىپ الۋ كەزىندە مەملەكەت باسپانا قۇنىنىڭ 50%-ىن جابادى»، – دەدى پاۆلودار وبلىسىنداعى ەڭبەك ۇتقىرلىعى ورتالىعى ديرەكتورىنىڭ ورىنباسارى قازبەك جومارتوۆ.
سونداي-اق جارمەڭكەدە «تازا قازاقستان» ارنايى ورنى جۇمىس ىستەدى. وندا قايتا وڭدەۋ ماقساتىندا پلاستيك جينالىپ، جاسىل تەحنولوگيالار تۋرالى مالىمەت بەرىلدى. مۇنداي ورىن – ەل ەرتەڭىنە دەگەن قامقورلىق تەك جاستاردى جۇمىسپەن قامتۋ عانا ەمەس، سونىمەن قاتار ەكولوگيالىق مادەنيەتتى قالىپتاستىرۋ ەكەنىن كورسەتتى.
«AMANAT» پارتياسى ەڭبەك جانە حالىقتى الەۋمەتتىك قورعاۋ مينيسترلىگىمەن بىرلەسىپ جۇزەگە اسىرىپ جاتقان «جاستارعا جۇمىس» جوباسى ءوز تيىمدىلىگىن دالەلدەدى. ماسەلەن، كەيىنگى ەكى جىلدا 150 مىڭعا جۋىق جاس ازامات قامتىلعان 1,5 مىڭنان استام ءىس-شارا وتكىزىلدى. 200-گە جۋىق بوس جۇمىس ورىندارى جارمەڭكەسى ۇيىمداستىرىلدى، وعان 5,2 مىڭنان استام ۇيىم قاتىستى، 55 مىڭنان استام جاس ازامات جۇمىسقا ورنالاستىرىلدى. شالعايداعى ەلدى مەكەندەردى قامتۋ ماقساتىندا «جاستار رۋحىنىڭ» ءموبيلدى توپتارى 150-دەن استام اۋىلعا بارىپ، 55 مىڭ ادامعا الەۋمەتتىك-ەڭبەك ماسەلەلەرى بويىنشا كەڭەس بەردى.
وسىلايشا، «AMANAT» پارتياسىنىڭ باستاماسى مەملەكەت باسشىسى ءوز سايلاۋالدى باعدارلاماسىندا العا قويعان ستراتەگيالىق ماقساتتى جۇزەگە اسىرۋدىڭ ءبىر بولىگىنە اينالۋدا: 2029 جىلعا قاراي كەمىندە 2,3 ملن جاس ازاماتتى جۇمىسپەن قامتۋ.
