ءار وڭىردەن ساناپ قاراساق، بيىلعى جىلدىڭ وزىندە جول اپاتى وتە كوپ. سونداي-اق، ءبىر ماشينادان 4-5 ادام بىردەن اجال قۇشىپ، وتباسى قايعىدان قان جۇتادى. كۇنى كەشە اقتوبە وبلىسىندا جانتۇرشىگەرلىك جول اپاتىنان 4 ادام قازا تاپتى. «ادىرنا» ۇلتتىق پورتالىنىڭ ءتىلشىسى بۇل تاقىرىپتى زەرتتەپ كوردى.
الدىمەن، 14 تامىزدا ساعات 16:55-تە پوكروۆكا – جاڭاجول اۆتوجولىنىڭ 75-شاقىرىمىندا بولعان، سالدارىنان 4 ادام قازا تاپقان جول اپاتىن قاراستىرايىق.
اقتوبە وبلىستىق ءىىد رەسمي وكىلى ەربول مىرزادان انىق-قانىعىن سۇراستىردىق.
ەربول مىرزا:
«جول اپاتى سالدارىنان 4 ادام قازا تاپتى.
اعىمداعى جىلدىڭ 14 تامىزىندا ساعات 16.55-تە "پوكروۆكا-جاناجول" اۆتوجولىنىڭ 75 شاقىرىمىندا جول-كولىك وقيعاسى ورىن الىپ، ادام ولىمىنە الىپ كەلدى.
تەمىر اۋدانى پوكروۆكا-جاڭاجول تاس جولىنىڭ 75-شاقىرىمىندا تەمىر قالاسىنان كەڭقياق اۋىلى باعىتىندا كەلە جاتقان ۆاز 2113 اۆتوكولىگىنىڭ 26 جاستاعى جۇرگىزۋشىسى قارسى قوزعالىسقا ارنالعان جولاققا شىعىپ كەتىپ، مۇعالجار اۋدانىنىڭ 50 جاستاعى تۇرعىنىنىڭ باسقارۋىنداعى كاماز كولىگىمەن سوقتىعىسقان.
جول-كولىك وقيعاسى سالدارىنان "ۆاز 2113" ماركالى اۆتوكولىگىنىڭ جۇرگىزۋشىسى مەن 3 جولاۋشى العان جاراقاتىنان وقيعا ورنىندا كوز جۇمدى.
سونىمەن قاتار، "ۆاز 2113" اۆتوكولىگىنىڭ جولاۋشىسى ءتۇرلى جاراقاتتارمەن كەنكياق اۋلىنىڭ اۋرۋحاناسىنا جاتقىزىلدى.
اتالعان فاكتى بويىنشا قر قك 345-بابى 4-بولىگى بويىنشا سوتقا دەيىنگى تەرگەۋ باستالدى.
اقتوبە وبلىسى پوليتسيا دەپارتامەنتى كولىك جۇرگىزۋشىلەرىن جول قوزعالىسى ەرەجەلەرىن قاتاڭ ساقتاۋعا شاقىرادى.
ەستەرىڭىزدە ساقتاڭىزدار، سىزدەردى ۇيدە جاقىندارىڭىز كۇتەدى.
جول قاتەلىكتەردى كەشىرمەيدى!»،- دەدى ول ءوز پىكىرىندە.
ءارى قاراي 2022 جىلى ورىن العان، كوپ ادامدى اجال قۇشتىرعان جول اپاتتارىن تىزبەكتەسەك:
1.اتىراۋ وبلىسىندا جول اپاتىنان بەس ادام قازا تاپتى. اپات ساعات 27.06.2022 جىلى ساعات 16:00-دە دوسسور-قۇلسارى-بەينەۋ تاس جولىندا ورىن الدى.
"Toyota Hilux جانە Hyundai Tucson اۆتوكولىكتەرى سوقتىعىستى. جول اپاتى سالدارىنان 1985 جىلى تۋعان Hyundai Tucson اۆتوكولىگىنىڭ جۇرگىزۋشىسى مەن ونىڭ 4 جولاۋشىسى وقيعا ورنىندا كوز جۇمدى. Toyota Hilux اۆتوكولىگىنىڭ جۇرگىزۋشىسى مەن جولاۋشىسى ءتۇرلى دەنە جاراقاتىمەن وبلىستىق اۋرۋحاناعا جەتكىزىلدى. تەرگەۋ امالدارى جۇرگىزىلىپ جاتىر",-دەدى اتىراۋ وبلىستىق پوليتسيا دەپارتامەنتىنىڭ ءباسپاسوز قىزمەتى.
دالەلدەنبەگەن دەرەك بويىنشا، قايتىس بولعان 5 ادامنىڭ بارلىعى ءبىر ءۇيدىڭ ادامدارى.
-شىعىس قازاقستاندا جانتۇرشىگەرلىك جول اپاتى بولىپ، التى ادام قازا تاپتى. بۇل تۋرالى وبلىستىق پد مالىمدەدى.
قايعىلى وقيعا 8 مامىر كۇنى جارما اۋدانى، شار قالاسىنىڭ ماڭىندا ومبى–مايقاپشاعاي رەسپۋبليكالىق تاسجولىندا بولعان.
«Ssang Yong Actyon» ماركالى اۆتوكولىك جۇرگىزۋشىسى ءرولدى باسقارا الماي قالىپ، قارسى باعىتتا كەلە جاتقان «ۆاز-21014» كولىگىمەن بەتپە-بەت سوقتىعىستى. اپات سالدارىنان «ۆاز-21014» كولىگىنىڭ 33 جاستاعى جۇرگىزۋشىسى مەن 5 جولاۋشى سول جەردە ءتىل تارتپاي كەتتى. ال «Ssang Yong Actyon» كولىگىندەگى 35 جاستاعى جۇرگىزۋشى مەن كامەلەتكە تولماعان ءۇش جولاۋشى ءتۇرلى دەنە جاراقاتىمەن اۋرۋحاناعا جەتكىزىلدى»، – دەلىنگەن حابارلامادا.
-اقتاۋ-بەينەۋ تاس جولىندا جانتۇرشىگەرلىك جول اپاتى بولىپ، 4 ادام قازا تاپتى.
قايعىلى وقيعا 28 شىلدەدە ءتۇس اۋا بولعان. Lada Priora كولىگىنىڭ جۇرگىزۋشىسى ءرولدى باسقارا الماي، قارسى جولاققا شىعىپ كەتىپ، Mercedes Benz S-320 كولىگىمەن بەتپە-بەت سوقتىعىسقان.
"جول-كولىك وقيعاسى سالدارىنان ەكى جۇرگىزۋشى، Lada Priora كولىگىنىڭ ەكى جولاۋشىسى العان جاراقاتتارىنان قازا بولدى. سونىمەن قاتار، ەكى جولاۋشى زارداپ شەكتى، ولار جاقىن ماڭداعى اۋداندىق اۋرۋحاناعا جاتقىزىلدى", - دەدى وبلىستىق پوليتسيا وكىلدەرى.
دەرەك قازاقستان رەسپۋبليكاسى قىلمىستىق كودەكسىنىڭ 345-بابى 4-بولىگى بويىنشا ماڭعىستاۋ اۋدانىنىڭ پوليتسيا بولىمىندە سوتالدى تەرگەپ-تەكسەرۋدىڭ بىرىڭعاي تىزىلىمىنە تىركەلگەن. قازىر تەرگەۋ امالدارى جۇرگىزىلىپ جاتىر.
-ورالدا جانتۇرشىگەرلىك جول-كولىك اپاتى بولىپ، سالدارىنان 8 ادام قازا تاپتى.
قايعىلى وقيعا 18 شىلدە كۇنى ساعات 2:45-تە VenOil جانارماي بەكەتىنە قاراما-قارسى اينالما جولدا بولعان.
قالالىق پوليتسيا دەپارتامەنتىنىڭ مالىمدەۋىنشە، Nissan (كولىكتە تەك جۇرگىزۋشى بولعان) جانە Lada (سالوندا بەس ەرەسەك جانە ەكى بالا بولعان) كولىكتەرى سوقتىعىسقان.
«Nissan جۇرگىزۋشىسى الدىنداعى كولىكتى باسىپ وزباق بولىپ قارسى جولاققا شىعىپ كەتىپ، Lada كولىگىمەن تۇيىسكەن»،— دەيدى ۆەدومستۆو.
كورىپ، وقىپ وتىرعاندارىڭىزداي، ەلىمىزدە بيىلعى جىلدىڭ وزىندە كولىك اپاتى وتە وتە كوپ. نە سەبەپ؟ «ادىرنا» ءتىلشىسى «جول اكتيۆتەرىنىڭ ۇلتتىق ساپا ورتالىعى» شجق رمك الماتى وبلىسى بويىنشا فيليال ديرەكتورىنىڭ م.ا. ءالىپوۆ ماۋلەن توقتاربايۇلىمەن پىكىر الماستى.
-ءار وڭىردەن ساناعاندا كۇنىنە 2-3 جول اپاتى ورىن الۋدا. بارلىعىندا ادام شىعىنى بار. باستى سەبەپ قانداي؟
-سەبەپتەر كوپ. جولدىڭ وي-شۇقىرلارى، جول توسەمى بەتىنىڭ وتىرىپ كەتۋى، جول بەلگىلەرى ستاندارتقا ساي قويىلماۋى. بىراق باستى سەبەپ، كوبىنەسە جۇرگىزۋشىلەردىڭ جول ەرەجەسىن ساقتاماۋىنان بولىپ جاتادى.
-جولدىڭ سالىنۋى، ءتىپتى كەيبىر اۋدان،اۋىل، ۇزاق تراسسا جولدارى شوقالاقتان كوز اشتىرمايدى. مۇمكىن اپاتقا سەبەپشى وسى جول بولار؟
-وكىنىشكە قاراي، كەيبىر شالعايداعى جولدارعا جوندەۋ جۇمىستارى جۇرگىزىلمەي جاتادى. قاراجات جەتىسپەۋشىلىگىنەن، يا بولماسا جوبالاۋ ينستيتۋتتارىنىڭ قاتىنايتىن كولىك سانى دۇرىس ەسەپتەلمەگەنىنەن بولىپ جاتادى.
-ۇلكەن جۇك كولىكتەرى قانشالىقتى دەڭگەيدە جول جاعدايىن ناشارلاتادى؟
-جول سالماستان بۇرىن، ەڭ الدىمەن جوبا جۇمىستارى جۇرگىزىلەدى، ول كەزدە جولعا قاتىستى بارلىق فاكتورلار ەسەپكە الىنادى. سونىمەن بىرگە، رۇقسات ەتىلگەن جۇكتەمە (ناگرۋزكا نا وس) ەسەپتەلەدى. اسىرا سالماق ارتىپ جۇك تيەگەن كولىكتەر ارينە جول قاباتىنا زيانىن تيگىزەدى. وسىعان وراي، ءبىزدىڭ مەكەمە كولىك ينسپەكتسياسىمەن بىرلەسىپ رەيدتەرگە شىعىپ تۇرادى. كوپتەگەن زاڭبۇزۋشىلىقتار كەزدەسىپ جاتادى. ءبىزدىڭ تاراپىمىزدان ءتيىستى حاتتامالار تولتىرىلىپ تاپسىرىس بەرۋشىلەرگە جولدانادى.
مىسالى، 2021 جىلى 4 رەيدكە شىقتىق. 64 كولىك تەكسەرىلىپ، 17 حاتتاما تولتىرىلدى جانە 2 ملن تگ جۋىق ايىپپۇل سالىندى.
- اقتوبەدە جۇك كولىگى مەن جەڭىل اۆتوكولىك سوعىستى. جالپى، جۇك كولىكتەرىنە قالا ىشىندە جۇرۋگە تىيىم بار ما؟
-جۇك كولىكتەرىنە قالا ىشىندە جۇرۋگە تيىم سالۋ قالا بيلىگىنىڭ قۇزىرىندا.
-كوبىنە شەتەلدەن كەلگەن كولىكتەر جول اپاتىنا ءتۇسىپ جاتىر. تىركەلمەگەن كولىكتەر عوي... وسىنى توقتاتۋ ءۇشىن قانداي امال قولدانۋىمىز كەرەك؟
-بۇل سۇراققا جاۋاپ بەرۋگە ءبىز ۇاكىلەتتى ەمەسپىز، بىراق ماي تاراپىنان بۇل جۇمىستى كۇشەيتۋ كەرەك دەپ ەسەپتەيمىز.
-ەلدەگى اۆتوكولىكتەر باعاسىنىڭ ۇشىنىپ تۇرۋى دا شەتەلدىك كولىكتىڭ كوبەيۋىنە ءبىر بەلگى عوي. جالپى ءبىر عانا جول اپاتىنىڭ استىندا مەملەكەتتىك پروبلەما جاتقان سەكىلدى؟
-دەگەنمەن، ءار جول پايدالانۋشى كولىك قوزعالىسىنا اسا جاۋاپكەرشىلىكپەن قاراسا، جول اپاتىنىڭ سانىن ازايتۋعا بىردەن-ءبىر سەبەپ بولار ەدى.
قورىتا كەلە، جان العان جول اپاتتارىن ازايتۋداعى باستى دۇنيە – جىلدامدىق. ءار ادام ءوز ومىرىنە، جولاۋشىلارىنىڭ دەنساۋلىعىنا اسا قاتتى ماڭىزدىلىقپەن قاراسا مۇمكىن اپات ورىن الماس ەدى. جەتەر جەرىمىزگە بەس مينۋت ۇنەمدەپ، تەز بارامىن دەپ ماڭگى كەلمەس مەكەنگە اتتانىپ كەتپەيىك!
ءىنجۋ ومىرزاق،
"ادىرنا" ۇلتتىق پورتالى
