قر ەكولوگيا ءمينيسترى 3 ساۋىردە ۋتيل الىمىن ەسەپتەۋ تاسىلىنە وزگەرىس ەنگىزۋ تۋرالى بۇيرىققا قول قويدى. قۇجات 30 كۇننەن كەيىن، ياعني مامىر ايىنىڭ باسىندا كۇشىنە ەنەدى، دەپ حابارلايدى "ادىرنا" ۇلتتىق پورتالى Kolesa.kz سايتىنا سىلتەپ.
جاڭا ەرەجەگە سايكەس، بەلارۋس پەن رەسەيدەن قازاقستانعا اكەلىنەتىن اۆتوموبيلدەر مەن اۋىل شارۋاشىلىعى تەحنيكاسىنا ۋتيل الىمى 2 كوەففيتسيەنتپەن ەسەپتەلەدى. ال قازاقستاندا وندىرىلگەن، ەاەو-عا مۇشە ەمەس مەملەكەتتەردەن، سونداي-اق ارمەنيا مەن قىرعىزستاننان جەتكىزىلگەن تەحنيكا ءۇشىن 1 كوەففيتسيەنت قولدانىلادى. ياعني بۇل ساناتتاعى كولىكتەر ءۇشىن الىم مولشەرى وزگەرىسسىز قالادى.
مولشەرلەمەنى قايتا قاراۋدىڭ نەگىزگى ماقساتى — ەۋرازيالىق ەكونوميكالىق وداق (ەاەو) ىشىندەگى تەڭسىزدىكتى جويۋ جانە قازاقستاننىڭ ۇلتتىق مۇددەسىن قورعاۋ.
ساراپشىلاردىڭ ايتۋىنشا، بۇل شەشىم قازاقستاندا وندىرىلگەن اۆتوموبيلدەردىڭ ەاەو نارىعىنا تەڭ جاعدايدا شىعۋىنا مۇمكىندىك بەرەدى. ياعني وداققا مۇشە مەملەكەتتەر اراسىنداعى ساۋدا شارتتارى تەڭەستىرىلۋى ءتيىس.
قازىرگى تاڭدا رەسەيدە ۋتيل الىمى ەكى ءتۇرلى تاسىلمەن ەسەپتەلەدى. الىس شەتەلدەن يمپورتتالعان كولىككە تۇراقتى مولشەرلەمە قولدانىلادى. ال ەاەو ەلدەرىنەن، سونىڭ ىشىندە قازاقستاننان جەتكىزىلگەن تەحنيكاعا قوسىمشا كەدەندىك باج ايىرماسى تولەنەدى.
ءىس جۇزىندە بۇل كولىكتىڭ تولىق قۇنىنا تەڭ باج سالىعى الىنۋىنا اكەلەدى. سەبەبى قازاقستاندا وندىرىلگەن اۆتوموبيل كەدەندىك راسىمنەن وتپەيدى. سونىمەن قاتار رەسەي تاراپى قوسىمشا ققس ايىرماسىن جانە اكتسيزدى دە ەسەپتەيدى.
وسىلايشا، ءۇشىنشى ەلدەردەن يمپورتتالعان كولىككە قاراعاندا، ەاەو ەلدەرىنەن كەلەتىن تەحنيكاعا ءتيىمسىز جاعداي قالىپتاسقان.
ال ەاەو كەدەن كودەكسىنە سايكەس، قازاقستاندا شەتەلدىك بولشەكتەردى پايدالانىپ وندىرىلگەن اۆتوموبيل وداق تاۋارى بولىپ سانالادى. دەمەك، رەسەيدىڭ قوسىمشا كوەففيتسيەنت قولدانۋى كودەكس تالاپتارىنا قايشى كەلەدى.
قازاقستان ديپلوماتتارى بۇل ماسەلەنى بىرنەشە مارتە كوتەرگەنىمەن، تاراپتار ورتاق شەشىمگە كەلە الماعان.
جاڭا ءتارتىپ كۇشىنە ەنگەن سوڭ رەسەي مەن بەلارۋستەن كەلەتىن كولىكتەردىڭ ۋتيل الىمى ونداعان ەسە وسەدى.
مىسالى، 1.6 ليترلىك موتورى جانە 5 ساتىلى مەحانيكالىق بەرىلىس قورابى بار Lada Granta كولىگىن الايىق.
قازىر رەسەيدە ونىڭ بازالىق نۇسقاسى 850 مىڭ رۋبل (شامامەن 5 ملن تەڭگە) تۇرادى. قازاقستاندا بىلتىرعى ۇلگىسى 5,99 ملن تەڭگە، ال 2026 جىلعى نۇسقاسى 6,49 ملن تەڭگە شاماسىندا ساتىلىپ جاتىر. ونىڭ ىشىندە ۋتيل الىمى 756 875 تەڭگەنى قۇرايدى.
جاڭا ەسەپتەۋ جۇيەسى ەنگىزىلسە، «گرانتا» ءۇشىن ۋتيل الىمى 38,8 ەسە ءوسىپ، 29,4 ملن تەڭگەگە جەتۋى مۇمكىن. بۇل سوما كولىكتىڭ رەسەيدەگى باعاسىنان التى ەسە جوعارى.
بيىل 10 ناۋرىزدا وتكەن بريفينگتە ونەركاسىپ جانە قۇرىلىس ءمينيسترى ەرسايىن ناعاسپاەۆ بۇل شارا رەسەيدىڭ ۋتيل الىمىن كوتەرۋىنە جاۋاپ رەتىندە قابىلدانعانىن مالىمدەدى.
دەگەنمەن ساراپشىلاردىڭ بولجامىنشا، بۇل وزگەرىس قازاقستانداعى اۆتوموبيل باعاسىنا ايتارلىقتاي اسەر ەتپەۋى مۇمكىن. سەبەبى رەسەي مەن بەلارۋستەن اكەلىنەتىن كولىكتەردىڭ نارىقتاعى ۇلەسى تومەن.
سونىمەن قاتار رەسەيدىڭ «گازەل» سەكىلدى مودەلدەرى قازاقستان اۋماعىندا قۇراستىرىلادى.
ال «لادا» ءوندىرىسى قوستانايداعى زاۋىتتا 2022 جىلى توقتاتىلعان. بولاشاقتا قاراعاندى وبلىسىنىڭ ساران قالاسىنداعى كاسىپورىن بۇل ءوندىرىستى قايتا قولعا الۋى مۇمكىن.
