Ár óńirden sanap qarasaq, bıylǵy jyldyń ózinde jol apaty óte kóp. Sondaı-aq, bir mashınadan 4-5 adam birden ajal qushyp, otbasy qaıǵydan qan jutady. Kúni keshe Aqtóbe oblysynda jantúrshigerlik jol apatynan 4 adam qaza tapty. «Adyrna» ulttyq portalynyń tilshisi bul taqyrypty zerttep kórdi.
Aldymen, 14 tamyzda saǵat 16:55-te Pokrovka – Jańajol avtojolynyń 75-shaqyrymynda bolǵan, saldarynan 4 adam qaza tapqan jol apatyn qarastyraıyq.
Aqtóbe oblystyq IID resmı ókili Erbol myrzadan anyq-qanyǵyn surastyrdyq.
Erbol myrza:
«Jol apaty saldarynan 4 adam qaza tapty.
Aǵymdaǵy jyldyń 14 tamyzynda saǵat 16.55-te "Pokrovka-Janajol" avtojolynyń 75 shaqyrymynda jol-kólik oqıǵasy oryn alyp, adam ólimine alyp keldi.
Temir aýdany Pokrovka-Jańajol tas jolynyń 75-shaqyrymynda Temir qalasynan Keńqııaq aýyly baǵytynda kele jatqan VAZ 2113 avtokóliginiń 26 jastaǵy júrgizýshisi qarsy qozǵalysqa arnalǵan jolaqqa shyǵyp ketip, Muǵaljar aýdanynyń 50 jastaǵy turǵynynyń basqarýyndaǵy KamAZ kóligimen soqtyǵysqan.
Jol-kólik oqıǵasy saldarynan "VAZ 2113" markaly avtokóliginiń júrgizýshisi men 3 jolaýshy alǵan jaraqatynan oqıǵa ornynda kóz jumdy.
Sonymen qatar, "VAZ 2113" avtokóliginiń jolaýshysy túrli jaraqattarmen Kenkııaq aýlynyń aýrýhanasyna jatqyzyldy.
Atalǵan fakti boıynsha QR QK 345-baby 4-bóligi boıynsha sotqa deıingi tergeý bastaldy.
Aqtóbe oblysy Polıııa departamenti kólik júrgizýshilerin jol qozǵalysy erejelerin qatań saqtaýǵa shaqyrady.
Esterińizde saqtańyzdar, sizderdi úıde jaqyndaryńyz kútedi.
Jol qatelikterdi keshirmeıdi!»,- dedi ol óz pikirinde.
Ári qaraı 2022 jyly oryn alǵan, kóp adamdy ajal qushtyrǵan jol apattaryn tizbektesek:
1.Atyraý oblysynda jol apatynan bes adam qaza tapty. Apat saǵat 27.06.2022 jyly saǵat 16:00-de Dossor-Qulsary-Beıneý tas jolynda oryn aldy.
"Toyota Hilux jáne Hyundai Tucson avtokólikteri soqtyǵysty. Jol apaty saldarynan 1985 jyly týǵan Hyundai Tucson avtokóliginiń júrgizýshisi men onyń 4 jolaýshysy oqıǵa ornynda kóz jumdy. Toyota Hilux avtokóliginiń júrgizýshisi men jolaýshysy túrli dene jaraqatymen oblystyq aýrýhanaǵa jetkizildi. Tergeý amaldary júrgizilip jatyr",-dedi Atyraý oblystyq polıııa departamentiniń baspasóz qyzmeti.
Dáleldenbegen derek boıynsha, qaıtys bolǵan 5 adamnyń barlyǵy bir úıdiń adamdary.
-Shyǵys Qazaqstanda jantúrshigerlik jol apaty bolyp, alty adam qaza tapty. Bul týraly oblystyq PD málimdedi.
Qaıǵyly oqıǵa 8 mamyr kúni Jarma aýdany, Shar qalasynyń mańynda Omby–Maıqapshaǵaı respýblıkalyq tasjolynda bolǵan.
«Ssang Yong Actyon» markaly avtokólik júrgizýshisi róldi basqara almaı qalyp, qarsy baǵytta kele jatqan «Vaz-21014» kóligimen betpe-bet soqtyǵysty. Apat saldarynan «Vaz-21014» kóliginiń 33 jastaǵy júrgizýshisi men 5 jolaýshy sol jerde til tartpaı ketti. Al «Ssang Yong Actyon» kóligindegi 35 jastaǵy júrgizýshi men kámeletke tolmaǵan úsh jolaýshy túrli dene jaraqatymen aýrýhanaǵa jetkizildi», – delingen habarlamada.
-Aqtaý-Beıneý tas jolynda jantúrshigerlik jol apaty bolyp, 4 adam qaza tapty.
Qaıǵyly oqıǵa 28 shildede tús aýa bolǵan. Lada Priora kóliginiń júrgizýshisi róldi basqara almaı, qarsy jolaqqa shyǵyp ketip, Mercedes Benz S-320 kóligimen betpe-bet soqtyǵysqan.
"Jol-kólik oqıǵasy saldarynan eki júrgizýshi, Lada Priora kóliginiń eki jolaýshysy alǵan jaraqattarynan qaza boldy. Sonymen qatar, eki jolaýshy zardap shekti, olar jaqyn mańdaǵy aýdandyq aýrýhanaǵa jatqyzyldy", - dedi oblystyq polıııa ókilderi.
Derek Qazaqstan Respýblıkasy Qylmystyq kodeksiniń 345-baby 4-bóligi boıynsha Mańǵystaý aýdanynyń polıııa bóliminde sotaldy tergep-tekserýdiń biryńǵaı tizilimine tirkelgen. Qazir tergeý amaldary júrgizilip jatyr.
-Oralda jantúrshigerlik jol-kólik apaty bolyp, saldarynan 8 adam qaza tapty.
Qaıǵyly oqıǵa 18 shilde kúni saǵat 2:45-te VenOil janarmaı beketine qarama-qarsy aınalma jolda bolǵan.
Qalalyq polıııa departamentiniń málimdeýinshe, Nissan (kólikte tek júrgizýshi bolǵan) jáne Lada (salonda bes eresek jáne eki bala bolǵan) kólikteri soqtyǵysqan.
«Nissan júrgizýshisi aldyndaǵy kólikti basyp ozbaq bolyp qarsy jolaqqa shyǵyp ketip, Lada kóligimen túıisken»,— deıdi vedomstvo.
Kórip, oqyp otyrǵandaryńyzdaı, elimizde bıylǵy jyldyń ózinde kólik apaty óte óte kóp. Ne sebep? «Adyrna» tilshisi «Jol aktıvteriniń ulttyq sapa ortalyǵy» ShJQ RMK Almaty oblysy boıynsha fılıal dırektorynyń m.a. Álipov Máýlen Toqtarbaıulymen pikir almasty.
-Ár óńirden sanaǵanda kúnine 2-3 jol apaty oryn alýda. Barlyǵynda adam shyǵyny bar. Basty sebep qandaı?
-Sebepter kóp. Joldyń oı-shuqyrlary, jol tósemi betiniń otyryp ketýi, jol belgileri standartqa saı qoıylmaýy. Biraq basty sebep, kóbinese júrgizýshilerdiń jol erejesin saqtamaýynan bolyp jatady.
-Joldyń salynýy, tipti keıbir aýdan,aýyl, uzaq trassa joldary shoqalaqtan kóz ashtyrmaıdy. Múmkin apatqa sebepshi osy jol bolar?
-Ókinishke qaraı, keıbir shalǵaıdaǵy joldarǵa jóndeý jumystary júrgizilmeı jatady. Qarajat jetispeýshiliginen, ııa bolmasa jobalaý ınstıtýttarynyń qatynaıtyn kólik sany durys eseptelmegeninen bolyp jatady.
-Úlken júk kólikteri qanshalyqty deńgeıde jol jaǵdaıyn nasharlatady?
-Jol salmastan buryn, eń aldymen joba jumystary júrgiziledi, ol kezde jolǵa qatysty barlyq faktorlar esepke alynady. Sonymen birge, ruqsat etilgen júkteme (nagrýzka na os) esepteledi. Asyra salmaq artyp júk tıegen kólikter árıne jol qabatyna zııanyn tıgizedi. Osyǵan oraı, bizdiń mekeme kólik ınspekııasymen birlesip reıdterge shyǵyp turady. Kóptegen zańbuzýshylyqtar kezdesip jatady. Bizdiń tarapymyzdan tıisti hattamalar toltyrylyp tapsyrys berýshilerge joldanady.
Mysaly, 2021 jyly 4 reıdke shyqtyq. 64 kólik tekserilip, 17 hattama toltyryldy jáne 2 mln tg jýyq aıyppul salyndy.
- Aqtóbede júk kóligi men jeńil avtokólik soǵysty. Jalpy, júk kólikterine qala ishinde júrýge tyıym bar ma?
-Júk kólikterine qala ishinde júrýge tıym salý qala bıliginiń quzyrynda.
-Kóbine shetelden kelgen kólikter jol apatyna túsip jatyr. Tirkelmegen kólikter ǵoı... Osyny toqtatý úshin qandaı amal qoldanýymyz kerek?
-Bul suraqqa jaýap berýge biz úákiletti emespiz, biraq MAI tarapynan bul jumysty kúsheıtý kerek dep esepteımiz.
-Eldegi avtokólikter baǵasynyń ushynyp turýy da sheteldik kóliktiń kóbeıýine bir belgi ǵoı. Jalpy bir ǵana jol apatynyń astynda memlekettik problema jatqan sekildi?
-Degenmen, ár jol paıdalanýshy kólik qozǵalysyna asa jaýapkershilikpen qarasa, jol apatynyń sanyn azaıtýǵa birden-bir sebep bolar edi.
Qoryta kele, jan alǵan jol apattaryn azaıtýdaǵy basty dúnıe – jyldamdyq. Ár adam óz ómirine, jolaýshylarynyń densaýlyǵyna asa qatty mańyzdylyqpen qarasa múmkin apat oryn almas edi. Jeter jerimizge bes mınýt únemdep, tez baramyn dep máńgi kelmes mekenge attanyp ketpeıik!
Injý ÓMIRZAQ,
"Adyrna" ulttyq portaly
