جامبىل وبلىسىندا جول اپاتى بولىپ، ەكى ادام قازا تاپتى. تاعى ەكى ادام ءتۇرلى جاراقاتپەن شۋ اۋداندىق اۋرۋحاناسىنا جەتكىزىلدى. جەلىدە تاراعان اقپاراتتارعا سايكەس،كولىكتە تانىمال سپورتشى شاۆكات راحمونوۆتىڭ ايەلى مەن ۇلى بولعان، دەپ حابارلايدى «ادىرنا» ءتىلشىسى.
وقيعا ورنىندا تۇسىرىلگەن كادرلاردى Instagram جەلىسىندەگى jagdaikz پاراقشاسى جاريالادى.
«گۇلايىم راحمونوۆا ۇلى جانە قۇربىلارىمەن قاراعاندىدان الماتىعا كەلە جاتقان. الماتى-ەكاتەرينبۋرگ تاس جولىنىڭ 296-شاقىرىمىندا Toyota Land Cruiser جول تالعامايتىن كولىگى اۋدارىلىپ قالعان. ايەل رولگە يە بولا الماعان»،—دەلىنگەن جازبادا.
وبلىستىق پوليتسيا دەپارتامەنتى زارداپ شەككەندەردىڭ ناقتى تۇلعالارىن راستاعان جوق, الايدا جول-كولىك وقيعاسىنا بايلانىستى مالىمدەمە جاسادى. رەسمي دەرەكتەرگە سۇيەنسەك، وقيعا 27 شىلدە كۇنى ساعات 08:50-دە بولعان.
«رەسپۋبليكالىق ماڭىزى بار الماتى – ەكاتەرينبۋرگ اۆتوجولىنىڭ 299-شاقىرىمىندا Toyota Land Cruiser 200 اۆتوكولىگىنىڭ جۇرگىزۋشىسى قاراعاندى وبلىسى جاعىنان الماتى قالاسى باعىتىندا كەلە جاتىپ، كولىك تىزگىنىنە يە بولا الماي، اۋدارىلىپ كەتكەن. جول-كولىك وقيعاسى سالدارىنان ەكى ادام قازا تاۋىپ، تاعى ەكى ادام اۋرۋحاناعا جەتكىزىلدى»،—دەلىنگەن حابارلامادا.
جامبىل وبلىستىق پوليتسيا دەپارتامەنتى اتالعان فاكت بويىنشا قىلمىستىق كودەكستىڭ 345-بابىنىڭ 4-بولىگى («كولىك قۇرالدارىن جۇرگىزۋ قاعيدالارىن بۇزۋ نەمەسە ولاردى پايدالانۋ ەرەجەلەرىن ساقتاماۋ، ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان») بويىنشا سوتقا دەيىنگى تەرگەۋ باستالعانىن جەتكىزدى.
قازىرگى تاڭدا كولىك ارنايى ايىپ تۇراعىنا قويىلىپ، وقيعانىڭ تولىق ءمان-جايىن انىقتاۋ ماقساتىندا تەرگەۋ امالدارى جۇرگىزىلىپ جاتىر.
ازىرگە سپورتشىنىڭ ءوزى بۇل وقيعاعا قاتىستى مالىمدەمە جاساعان جوق.
