300 جىلدىق تاريحى بار سەمەي: بوداندىق، قۇلدىق قاقپالارى الىنسىن!

661

اباي وبلىسىنىڭ اكىمى نۇرلان تەلمانۇلى ۇرانحەۆتىڭ نازارىنا

بوداندىق، قۇلدىق قاقپالارى الىنسىن!!!

سەمەي قالاسىنىڭ تاريحى، ىرگەتاسى 1718 جىلى قالانعان اسكەري بەكىنىسىپەن بايلانىستىرۋعا بولمايتىنى مالىمدەلگەن. تاريxشى، عالىمدار دالەلدەگەن.

2018 جىلى قالانىڭ 300 جىلدىعى دەپ ۇران سالعانداردىڭ الەگىنە، زيالى قاۋىم باستاپ، كەيىن اكىمشىلىك قوستاپ توسقاۋىل بولعان. ءتىرى كۋامىز. سودان بەرى ءالى ءتيىستى تاپسىرما بەرىلىپ، اكىمشىلىك تاراپىنان شارا قولدانىلماعان.

ءى پەتردىڭ شىعىس ايماقتاعى جەرلەردى قورعاۋ تۋرالى ايگىلى جارلىعىنا جانە ەرتىس ءوڭىرى بەكىنىستەرىنىڭ سالىنا باستاۋىمەن بايلانىستىرىلعان تاريxتىڭ شەڭبەرى وتە تار.

يدەولوگيالىق تۇرعىدان ابدەن ەسكىرگەن. تاۋەلسىز ەلمىزگە جاراسپايدى. جاڭا قازاقستانعا مۇلدەم.
پرەزيدەنت قاسىم-جومارت توقاەۆ ايتقانداي: "سەمەي ءوڭىرى – قازاق تاريحىنداعى كيەلى ولكەنىڭ ءبىرى. سوندىقتان ەلدىڭ رۋحاني دامۋىندا ەرەكشە ورنى بار سەمەي قا­لاسىن تاريحي ورتالىق رەتىندە بەلگى­لەگەن ءجون. ۇلى اباي مەن شاكارىم­نىڭ، مۇحتار اۋەزوۆتىڭ كىندىك قانى تام­عان ءوڭىر ايرىقشا قۇرمەتكە لايىق.” - دەگەن ءسوزىن وبلىس اكىمشىلىگى مۇلدە قاپەردەن شىعارماعانى ءجون دەپ ويلايمىن.

قازىر. ءيا، ءدال قازىر قالامىزدىڭ شىعىس جاق بەتىنەن كىرسەڭىز كوزگە تۇرپىدەي تيەتىن تومەندەگى "سەمەي-1718" دەگەن جازۋى بار ءداۋ بەلگى ءالى جارقىراپ تۇر. تۇبىمەن قوپارىپ، تۇقىم-تۇياعىمەن قۇرتسا دەيمىن.

ويتكەنى جاس ۇرپاق، الىس-جاقىنان كەلەتىن قوناقتار قالا تاريxى 300-اق جىل ەكەن دەپ ويلاپ قالۋى بەك مۇمكىن. سولاي ايتىپ جۇرگەندەرمەن دە تالاي داۋلاسقانبىز. قۇلدىق، بوداندىق بەلگىلەرى دە سۇيەككە تاڭبا.
وتكەندەگى دميتري مەدۆەدەۆتىڭ پاراقشاسىنا سالىنىپ، كەيىن قايتا وشىرىلگەن جازبادان: “قازاقستان-جاساندى مەملەكەت، بۇرىنعى ورىس تەرريتوريالارى. مىسالى گۋرەۆ (اتىراۋ), سەمەي (سەميپالاتينسك), ءتىپتى الماتى قالالارى 1924 جىلعا دەيىن ۆەرنىي دەپ اتالدى.” - دەگەن شاتپاعىنا مىنا بەكىنىس بەلگىلەرى (سەمەيدە ءالى تۇرعان) تۇزدىق بولارى ءسوزسىز.
ەجەلگى قيماق قاعاناتىنىڭ، الاش وردانىڭ استاناسى بولعان، بۇگىندە رۋحاني ورتالىق، “كيەلى مەكەن" دەگەن ۇعىمدى بىلدىرەتىن سەمەي شاhارىمىزدىڭ تەرەڭ تامىرىنا بالتا شاپپاي، بۇگىنىن بۇرلەتەيىك!

P.S. ايتپاقشى جاڭادان جاساقتالعان، قۇرامىندا ءبىر دە ءبىر اقىن-جازۋشىسى جوق “اباي وبلىسىنىڭ قوعامدىق كەڭەسى”، العاشقى جۇمىستارىڭىز بولسىن، سىزدەردىڭ دە قۇلاقتارىڭىزعا التىن سىرعا.

مەرەي قارت
قجو اباي وبلىسى فيليالىنىڭ توراعاسى

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket