300 jyldyq tarıhy bar Semeı: Bodandyq, quldyq qaqpalary alynsyn!

662

Abaı oblysynyń ákimi Nurlan Telmanuly Uranhevtyń nazaryna

BODANDYQ, QULDYQ QAQPALARY ALYNSYN!!!

Semeı qalasynyń tarıhy, irgetasy 1718 jyly qalanǵan áskerı bekinisipen baılanystyrýǵa bolmaıtyny málimdelgen. Tarıxshy, ǵalymdar dáleldegen.

2018 jyly qalanyń 300 jyldyǵy dep uran salǵandardyń álegine, zııaly qaýym bastap, keıin ákimshilik qostap tosqaýyl bolǵan. Tiri kýámiz. Sodan beri áli tıisti tapsyrma berilip, ákimshilik tarapynan shara qoldanylmaǵan.

I Petrdiń shyǵys aımaqtaǵy jerlerdi qorǵaý týraly áıgili jarlyǵyna jáne Ertis óńiri bekinisteriniń salyna bastaýymen baılanystyrylǵan tarıxtyń sheńberi óte tar.

Ideologııalyq turǵydan ábden eskirgen. Táýelsiz elmizge jaraspaıdy. Jańa Qazaqstanǵa múldem.
Prezıdent Qasym-Jomart Toqaev aıtqandaı: "Semeı óńiri – qazaq tarıhyndaǵy kıeli ólkeniń biri. Sondyqtan eldiń rýhanı damýynda erekshe orny bar Semeı qa­lasyn tarıhı ortalyq retinde belgi­legen jón. Uly Abaı men Shákárim­niń, Muhtar Áýezovtiń kindik qany tam­ǵan óńir aıryqsha qurmetke laıyq.” - degen sózin oblys ákimshiligi múlde qaperden shyǵarmaǵany jón dep oılaımyn.

Qazir. Iá, dál qazir qalamyzdyń shyǵys jaq betinen kirseńiz kózge túrpideı tıetin tómendegi "Semeı-1718" degen jazýy bar dáý belgi áli jarqyrap tur. Túbimen qoparyp, tuqym-tuıaǵymen qurtsa deımin.

Óıtkeni jas urpaq, alys-jaqynan keletin qonaqtar qala tarıxy 300-aq jyl eken dep oılap qalýy bek múmkin. Solaı aıtyp júrgendermen de talaı daýlasqanbyz. Quldyq, bodandyq belgileri de súıekke tańba.
Ótkendegi Dmıtrıı Medvedevtiń paraqshasyna salynyp, keıin qaıta óshirilgen jazbadan: “Qazaqstan-jasandy memleket, burynǵy orys terrıtorııalary. Mysaly Gýrev (Atyraý), Semeı (Semıpalatınsk), tipti Almaty qalalary 1924 jylǵa deıin Vernyı dep ataldy.” - degen shatpaǵyna myna bekinis belgileri (Semeıde áli turǵan) tuzdyq bolary sózsiz.
Ejelgi Qımaq qaǵanatynyń, Alash ordanyń astanasy bolǵan, búginde rýhanı ortalyq, “Kıeli meken" degen uǵymdy bildiretin SEMEI shaharymyzdyń tereń tamyryna balta shappaı, búginin búrleteıik!

P.S. Aıtpaqshy jańadan jasaqtalǵan, quramynda bir de bir aqyn-jazýshysy joq “Abaı oblysynyń qoǵamdyq keńesi”, alǵashqy jumystaryńyz bolsyn, Sizderdiń de qulaqtaryńyzǵa altyn syrǵa.

Mereı Qart
QJO Abaı oblysy fılıalynyń tóraǵasy

Pikirler
Redakııa tańdaýy