قازبا وتىندارى COP31 كونفەرەنتسياسىنداعى باستى داۋعا اينالدى

91
Adyrna.kz Telegram
https://adyrna.kz/storage/uploads/I7UBxmyjS5bIclbmQnziGckxRsIPfiiVLUtgaSHX.jpg

فوتو: Reuters

تۇركيانىڭ انتاليا قالاسىندا ءوتىپ جاتقان بۇۇ-نىڭ COP31 كليماتتىق كونفەرەنتسياسىندا ەلدەر اراسىنداعى كەلىسسوزدەر كۇردەلەنە ءتۇستى. جەكسەنبى كۇنى تاڭەرتەڭ جاريالانعان كەلىسىمنىڭ جاڭا جوباسىندا الەمدىك ەكونوميكانى ەلەكترلەندىرۋ ماقساتى ساقتالعانىمەن، قازبا وتىندارىنان باس تارتۋ تۋرالى ناقتى تالاپ ەنگىزىلمەگەن، دەپ حابارلايدى "ادىرنا".

AFP اگەنتتىگىنىڭ حابارلاۋىنشا، قۇجاتتىڭ سوڭعى نۇسقاسى جەكسەنبى كۇنى وتەتىن قورىتىندى وتىرىستا 200-گە جۋىق ەلدىڭ ماقۇلداۋىنا ۇسىنىلۋى ءتيىس. الايدا بىرقاتار مەملەكەتتەر جوبانىڭ مازمۇنىنا نارازىلىق ءبىلدىرىپ وتىر.

ەۋروپالىق وداق وكىلى جاڭا جوبانى «كەرى قادام» دەپ باعالاپ، كەلىسسوزدەردىڭ ورتاق كەلىسىمسىز اياقتالۋ قاۋپى بار ەكەنىن مالىمدەدى. ونىڭ ايتۋىنشا، مۇناي ءوندىرۋشى ەلدەر قازبا وتىندارىنا قاتىستى تالاپتاردى جۇمسارتۋ ءۇشىن بەلسەندى تۇردە قارسىلىق تانىتىپ جاتىر.

ايتا كەتەيىك، كونفەرەنتسيا بارىسىندا قازبا وتىندارىنان كەزەڭ-كەزەڭىمەن باس تارتۋ ماسەلەسى نەگىزگى داۋلى تاقىرىپتاردىڭ بىرىنە اينالدى. وسى اپتادا ۇسىنىلعان العاشقى جوبادا قازبا وتىندارىن پايدالانۋدى جەدەل قىسقارتۋ كوزدەلگەن بولاتىن. الايدا بەيسەنبى كۇنى جاريالانعان ەكىنشى نۇسقادان بۇل تۋرالى بارلىق تۇجىرىمدار الىنىپ تاستالعان.

بۇعان جاۋاپ رەتىندە فرانتسيا مەن پاناما باستاعان بىرقاتار مەملەكەت جۇما كۇنى كەلىسىمگە قازبا وتىندارىنان ناقتى ءارى ايقىن باس تارتۋ جولىن ەنگىزۋدى تالاپ ەتتى.

جاڭا قۇجاتتا كومىرقىشقىل گازىن ۇستاۋ جانە ساقتاۋ تەحنولوگيالارىن كەڭىنەن قولدانۋ تۋرالى ۇسىنىس تا ساقتالعان. بۇل باستامانى ەنەرگەتيكا سالاسىنىڭ وكىلدەرى قولداسا، سىنشىلار تەحنولوگيانىڭ قىمبات ەكەنىن جانە پارنيكتىك گازدار شىعارىندىلارىن ازايتۋداعى تيىمدىلىگى تومەن ەكەنىن العا تارتادى.

انتيگۋا جانە باربۋدا قورشاعان ورتانى قورعاۋ ءمينيسترى مايكل دجوزەف تە كەلىسىم جوباسىنا كوڭىلى تولمايتىنىن جەتكىزدى. ونىڭ پىكىرىنشە، قۇجاتتا قازبا وتىندارى ماسەلەسىنە جەتكىلىكتى نازار اۋدارىلماعان. مينيستر قازىرگى نۇسقاسىن قولداي المايتىنىن مالىمدەدى.

وسىلايشا، COP31 كونفەرەنتسياسىنداعى باستى ماسەلە – قازبا وتىندارىنان باس تارتۋ جونىندە ەلدەردىڭ ورتاق ۇستانىمعا كەلە الماۋى. قورىتىندى كەلىسىمنىڭ قابىلدانۋى قاتىسۋشى مەملەكەتتەردىڭ ءوزارا ىمىراعا كەلۋىنە بايلانىستى.

پىكىرلەر