الەمدەگى كوپتەگەن ەلدە ميلليونداعان ادام اشارشىلىق الدىندا تۇر. بۇل تۋرالى بۇۇ باس حاتشىسى انتونيۋ گۋتەرريش قاۋىپسىزدىك كەڭەسىنىڭ كەزەكتى ونلاين وتىرىسىندا مالىمدەدى، دەپ حابارلايدى "حابار 24".
جۇرگىزىلگەن ستاتيستيكا بويىنشا 2020 جىلى جەر بەتىندە 88 ميلليون ادام اشتىقتىڭ زاردابىن تارتتى. بۇل بۇعان دەيىنگى كەزەڭمەن سالىستىرعاندا 20 پروتسەنتكە ارتىق.
ساراپشىلار بۇل تەندەنتسيا 2021 جىلى دا جالعاسادى دەپ بولجايدى. ماسەلەن، تابيعي اپاتتار مەن كوروناۆيرۋس پاندەمياسى جاعدايدى ۋشىقتىرىپ تۇر. دۇنيەجۇزىلىك ازىق-تۇلىك باعدارلاماسى وتكەن جىلى 265 ميلليون ادامنىڭ اش قۇرساق جۇرگەنىن ايتادى. ولاردىڭ ءبىرازى افريكا، تاياۋ شىعىس پەن ازيا ەلدەرىنىڭ تۇرعىندارى.
انتونيۋ گۋتەرريش جاعدايدى وڭالتۋ ءۇشىن شۇعىل شارالار قولعا الىنباسا اشتىق كوپتەگەن ادامنىڭ ءومىرىن قيۋى مۇمكىن دەيدى.
"قازىر قامدانباساق، الداعى ۋاقىتتا اشارشىلىققا تاپ بولۋىمىز ابدەن مۇمكىن. قارۋلى قاقتىعىس قيىنشىلىق تۋردىراتىنى انىق. سوندىقتان سوعىس ءورتى ءورشىپ تۇرعان ەلدەردە بەيبىتشىلىك ورناتۋ كەرەك. ونسىز دا تابيعي اپاتتار مەن جاھاندى جاۋلاعان پاندەميا قوس بۇيىردەن قىسىپ تۇر. ءارى ازىق-تۇلىك پەن اۋىز سۋ تاپشىلىعى جانە جۇمىسسىزدىق بەلەڭ الدى", - دەيدى انتونيۋ گۋتەرريش.
