كولۋمبيا پرەزيدەنتى گۋستاۆو پەترو ۆەنەسۋەلادا ورىن الىپ جاتقان جاعدايعا بايلانىستى بىرىككەن ۇلتتار ۇيىمى مەن امەريكا مەملەكەتتەرى ۇيىمىنىڭ شۇعىل وتىرىسىن وتكىزۋگە شاقىردى، دەپ حابارلايدى "ادىرنا" ۇلتتىق پورتالى Report-قا سىلتەپ.
پرەزيدەنت پەترو الەۋمەتتىك جەلىدەگى جازباسىندا:
«قازىرگى ۋاقىتتا كاراكاسقا بومبا جاۋدىرىلىپ جاتىر. بۇل بۇكىل الەم ءۇشىن قاۋىپ. امۇ مەن بۇۇ دەرەۋ وتىرىس شاقىرۋى ءتيىس»، – دەپ اتاپ ءوتتى.
ول سونداي-اق كولۋمبيانىڭ بۇۇ قاۋىپسىزدىك كەڭەسىنىڭ مۇشەسى رەتىندە حالىقارالىق قۇقىق تۇرعىسىنان ۆەنەسۋەلاعا قارسى اگرەسسيانى باعالاۋ مىندەتى بارىن ايتتى.
حالىقارالىق باق دەرەگىنشە، ۆەنەسۋەلا قارۋلى كۇشتەرى پرەزيدەنت رەزيدەنتسياسى ميرافلورەس ماڭىنا برونەتەحنيكا شىعارىپ، قاۋىپسىزدىكتى كۇشەيتكەن. سول ايماقتا كەمىندە جەتى جارىلىس تىركەلگەن، ال قورعانىس ءمينيسترىنىڭ ءۇيى، پورت جانە ازاماتتىق اۋەجايعا سوققى جاسالعان.
