АҚШ соты Трамптың триумфалды арка құрылысына тағы да тыйым салды

170
Adyrna.kz Telegram
https://adyrna.kz/storage/uploads/bkl1tFm6ZHuXe7oUKDxqxpRC9ZwOjDovjuRWRRfi.webp

Фото: cnn.com

АҚШ-та федералдық сот президент Дональд Трамптың Арлингтон ұлттық зираты маңында алып триумфалды арка тұрғызу жоспарына қатысты екінші рет тыйым салды. Судья жобаның заңдылығына күмән келтіріп, құрылысты бастау үшін Конгрестің мақұлдауы алынбағанын мәлімдеді. Бұл туралы Euronews жазды, деп хабарлайды "Адырна".

Жұма күні округтік сот судьясы Леони Бринкема биіктігі шамамен 76 метр болатын арка құрылысына алдын ала тыйым салу туралы шешім шығарды. Оның пікірінше, Трамп әкімшілігі жобаны жүзеге асыру үшін қажетті заңдық талаптарды орындамаған. Сондай-ақ құрылысқа қатысты экологиялық және экономикалық тәуекелдерге берілген баға жеткіліксіз болған.

Бұл – Трамптың бастамасына қатысты сот шығарған екінші тыйым. Бұған дейін судья Таня Чаткан да жобаның жүзеге асуына тосқауыл қойған еді. Алайда оның шешімі 3 желтоқсанға дейін күшінде болады және мерзімі ұзартылуы мүмкін. Ал Бринкема шығарған тыйымның аяқталу мерзімі белгіленбеген.

Жобаға қарсы тараптар арканың Арлингтон ұлттық зиратына жақын орналасуына алаңдаулы. Аталған зиратта жүздеген мың америкалық ардагер жерленген. Қарсылық білдірушілердің пікірінше, алып құрылыс зираттың көрінісін жауып, қоғамдық қауіпсіздікке қатер төндіруі мүмкін.

Арлингтон округтік кеңесінің мүддесін қорғайтын Democracy Forward ұйымы сот шешімін құптады. Ұйымның аға заңгері Кейт Талмор бұл шешімнің жергілікті тұрғындар үшін маңызды екенін атап өтті.

«Сот Арлингтонда тұратын және жұмыс істейтін адамдарға жоба келтіретін орны толмас зиянды мойындап, біздің талап-арызымыз қаралғанға дейін бұл ауқымды "өзін-өзі дәріптеу жобасының" құрылысын тоқтатты. Арка құрылысының қоғамдық қауіпсіздікке қатер төндіруіне жол бермеу үшін Арлингтон округтік кеңесімен бірлесіп жұмыс істеу біз үшін үлкен мәртебе», – деді ол.

Айта кетейік, осы айдың басында Ұлттық астаналық жоспарлау комиссиясы құрылыс жобасын мақұлдаған болатын.

Дональд Трамп 2025 жылдың қаңтарында Ақ үйге оралғаннан кейін Вашингтон қаласының сәулеттік келбетін өзгертуге бағытталған ауқымды бастама көтерді. Президент Арлингтон мемориалдық көпірінің жанындағы Ресепшн-Серкл аумағында салынатын арканы әскери мақсатта пайдалануды жоспарлап отырғанын мәлімдеген.

«Азамат соғысы кезінен бері салу жоспарланып келген Арлингтон мемориалдық көпірінің жанындағы Ресепшн-Серкл аумағында орналасатын керемет Триумф аркасын бірінші дәрежелі әскери кешенге айналдыруға келістім», – деп жазған ол Truth Social әлеуметтік желісінде.

Трамптың айтуынша, нысанды көптеген ұшқышсыз ұшу аппараттарын орналастыруға, сақтауға және оларды жедел іске қосуға пайдалануға болады.

«Ол жерде дрондарды орналастырып, сақтауға және қажет болған жағдайда жедел қолдануға мүмкіндік болады», – деген президент. Сондай-ақ ол арканың төбесі мен алдындағы алаңда мергендер орналасатынын және оқ-дәрілердің мол қоры сақталатынын айтқан.

Осылайша, жобаны жоспарлау комиссиясы мақұлдағанымен, федералдық соттардың шешімдері Трамптың алып арка салу бастамасын әзірге тоқтатып отыр.

Yorumlar
Diğer Haberler