الماتىدا SkyTrain پويىزدارى 8-14 مەتر بيىكتىكتە جۇرەدى. بۇل تۋرالى قالالىق جول ينفراقۇرىلىمىن دامىتۋ باسقارماسى ايتتى، دەپ حابارلايدى «ادىرنا» ءتىلشىسى informburo.kz-كە سىلتەمە جاساپ.
بۇعان دەيىن SkyTrain جەلىلەرى جول كەپتەلىسىنە تاۋەلدىلىكتى ازايتۋ ءۇشىن ەستاكادالار بويىمەن سالىناتىنى حابارلانعان ەدى. باسقارمانىڭ مالىمەتىنشە، ەستاكادالاردىڭ بيىكتىگى شامامەن 8-12 مەتر بولادى، ال كەيبىر ۋچاسكەلەردە 12-14 مەترگە دەيىن جەتەدى.
جالپى ۇزىندىعى 46,4 شاقىرىم بولاتىن ەكى SkyTrain جەلىسىنىڭ قۇرىلىسى 2027 جىلى باستالادى. ءبىرىنشى جەلىنى 2029 جىلى اياقتاۋ جوسپارلانعان. ال ەكىنشى جەلىنىڭ قۇرىلىسى قاشان اياقتالاتىنى جوبالىق-سمەتالىق قۇجاتتاما ازىرلەۋ كەزەڭىندە ناقتىلانادى.
ءبىرىنشى جەلىنىڭ ۇزىندىعى 22,5 شاقىرىمدى قۇرايدى. ول «بارلىق» جانە «شىعىس» كولىك-لوگيستيكالىق توراپتارى اراسىندا رايىمبەك داڭعىلىنىڭ بويىمەن وتەدى. جوبا اياسىندا 13 ايالداما كەشەنى مەن اۆتوتۇراقتار قاراستىرىلعان. ەكىنشى جەلىنىڭ ۇزىندىعى 23,9 شاقىرىم بولادى، وندا 14 ايالداما كەشەنىن سالۋ جوسپارلانىپ وتىر.
ازىرگە قانشا پويىز ساتىپ الىناتىنى جانە ولاردىڭ قاشان جەتكىزىلەتىنى بەلگىسىز. ماشينيستەردى ىرىكتەۋ مەن وقىتۋ جۇمىستارى جوبانى ىسكە قوسۋ مەرزىمى جاقىنداعاندا باستالماق.
ەسكە سالايىق، استاناداعى LRT جوباسىنا مامانداردى قابىلداۋ 2024 جىلدىڭ سوڭىندا باستالىپ، Tarlan Astana وقۋ باعدارلاماسى 2026 جىلدىڭ مامىرىندا ىسكە قوسىلعان ەدى.
SkyTrain قۇرىلىسىنىڭ ناقتى قۇنى ازىرگە بەلگىسىز. باسقارما وكىلدەرىنىڭ ايتۋىنشا، ونىڭ باعاسى جوبالىق قۇجاتتار دايىندالىپ، مەملەكەتتىك ساراپتامانىڭ قورىتىندىسى شىققاننان كەيىن انىقتالادى.
SkyTrain – جوعارى جىلدامدىقتى زاماناۋي اۋە رەلستى كولىك جۇيەسى. مۇنداي جەلىلەردىڭ كوپشىلىگى بيىكتىكتە سالىنادى جانە كەيبىرى ءماشينيسسىز جۇمىس ىستەيدى.
