كەزىندە وپپوزيتسيالىق ساياساتكەر رەتىندە قاتار جۇرگەن كاسىپكەرلەر تولەن توقتاسىنوۆ پەن عالىمجان جاقيانوۆ اراسىنداعى داۋ-داماي ءالى بىتەر ەمەس. 20 مامىر كۇنى قازاقستان رەسپۋبليكاسىنىڭ جوعارعى سوتى عالىمجان جاقيانوۆتىڭ 2019 جىلعى كەلىسىمدى جارامسىز دەپ تانۋ تۋرالى تالاپ-ارىزىن قاناعاتتاندىرۋدان باس تارتتى. سونىمەن قاتار، سوت مارقۇم تولەن توقتاسىنوۆتىڭ پايداسىنا اقشا ءوندىرۋ تۋرالى شەشىم شىعاردى. بۇل تۋرالى توقتاسىنوۆتىڭ جۇبايى الما توقتاسىنوۆا جاريالادى، دەپ حابارلايدى "ادىرنا".
سوت شەشىمى بويىنشا، تالاپ قويۋشى تاراپتىڭ ۋاجدەرى نەگىزسىز دەپ تانىلىپ، 2019 جىلعى كەلىسىم اياسىندا قاراستىرىلعان داۋلى ماسەلەلەر بويىنشا توقتاسىنوۆتىڭ قۇقىقتىق ۇستانىمى راستالدى. اتاپ ايتقاندا، موڭعولياداعى «اLGT» كومپانياسىنداعى ۇلەسكە قاتىستى داۋ سوت قاراۋىندا قاراستىرىلدى.
ءىس بارىسىندا تاراپتاردىڭ ۇسىنعان دالەلدەرى مەن قۇجاتتارى زەرتتەلىپ، بۇرىنعى سوت شەشىمدەرى مەن اكتسيونەرلەر جينالىستارىنىڭ حاتتامالارى دا قاراستىرىلدى. سوت ءتيىستى ماتەريالداردى نەگىزگە الا وتىرىپ، تۇپكىلىكتى شەشىم قابىلدادى.
سونىمەن قاتار، تاراپتار اراسىنداعى داۋعا قاتىستى وزگە دە ازاماتتىق ىستەر بوستاندىق اۋداندىق سوتىندا قارالىپ جاتقانى بەلگىلى بولدى. بۇل ىستەردە كومپانيانىڭ قارجىلىق مىندەتتەمەلەرى مەن اكتسيونەرلىك قۇرىلىمعا قاتىستى قوسىمشا تالاپتار تالقىلانۋدا.
ءىس ماتەريالدارىندا بۇرىنعى شەشىمدەر مەن كورپوراتيۆتىك قۇجاتتاردىڭ زاڭدىلىعى، سونداي-اق اكتسيونەرلەر جينالىستارى حاتتامالارىنىڭ راسىمدەلۋ ءتارتىبى دە قاراستىرىلعان.
تاراپتار ءوز ۇستانىمدارىن قورعاۋ بارىسىندا ءارتۇرلى قۇقىقتىق دالەلدەر كەلتىرگەن. سوت پروتسەستەرى زاڭ اياسىندا جالعاسۋدا.
ايتا كەتەيىك، دوستار اراسىنداعى داۋدىڭ باستاۋى تۋرالى تولىعىراق سىلتەمەدەن وقي الاسىز.
