ىشكى ىستەر ءمينيسترىنىڭ ءبىرىنشى ورىنباسارى مارات قوجاەۆ «ۆاگنەر» جەكە اسكەري كومپانياسىنىڭ قۇرامىندا بولعانى ءۇشىن ۋكراينادا سوتتالعان قازاقستان ازاماتىنىڭ وقيعاسىنا ۇلتتىق اتا زاڭ نەگىزىندە تۇسىنىكتەمە بەردى. رەسەي ءۇشىن "وت كەشكەن" قازاقستاندىقتىڭ ەلىمىزدە دە قىلمىستىق جاۋاپقا تارتىلاتىنىن حابارلادى، دەپ جازادى "ادىرنا" ۇلتتىق پورتالى.
بۇگىن ماجىلىستە تىلشىلەر ءمينيستردىڭ ورىنباسارىنان «ۆاگنەر» جەكە اسكەري كومپانياسى قۇرامىندا بولعان جانە ۋكراينادا سوتتالعان قازاقستان ازاماتى تۋرالى سۇرادى.
«مەنىڭ ويىمشا، اتالعان ادامعا قاتىستى ماسەلەنى سىرتقى ىستەر مينيسترلىگى پىسىقتاپ جاتىر. ياعني بۇل تاقىرىپ سىرتقى ساياسي ۆەدومستۆو قۇزىرەتىندە. باسقا ەلدەردىڭ اۋماعىنداعى قارۋلى قاقتىعىستارعا قاتىسقاندارعا قازاقستاندا قىلمىستىق جاۋاپكەرشىلىك قاراستىرىلعان»، - دەدى م. قوجاەۆ.
سونىمەن قاتار، رەسەي بولىندا "قار قۇرسانىپ، مۇز جاستانعان" ازاماتتىڭ تاياۋدا عانا ۋكراينادا سوتتالعانىن حابارلادى. ونى قازاقستانعا ەكستراديتسيالاۋ ماسەلەسى الداعى ۋاقىتتا قارالۋى مۇمكىن.
فوتو: «ۆاگنەر» جەكە اسكەري كومپانياسى قۇرامىندا بولعان قازاقستان ازاماتى
ايتا كەتەيىك، بۇقارالىق اقپارات قۇرالدارىندا «ۆاگنەر» جەكە اسكەري كومپانياسى قۇرامىندا بولعان قازاقستان ازاماتىن ۋكراينادا 9 جىلعا باس بوستاندىعىنان ايىرۋ تۋرالى ۇكىم شىققانى حابارلاندى.
بۇدان بولەك، بيىل ءساۋىر ايىندا قازاقستاننىڭ سىرتقى ىستەر مينيسترلىگى قر ءسىم «ۆاگنەر» قۇرامىنا وتكەن ستۋدەنت قازاقستاندا قىلمىستىق جاۋاپقا تارتىلاتىنىن جاريالادى. وسىنداي اسكەري كومپانيالاردىڭ قۇرامىنا كىرەتىن ادامدار ەلىمىزدە 5 جىلدان 9 جىلعا دەيىن جازاعا تارتىلادى.
"ادىرنا" ۇلتتىق پورتالى
