قاۋىپسىزدىك ماقساتىندا بۇۇ-نىڭ 100-گە جۋىق قىزمەتكەرى كابۋلدان الماتىعا قاشىقتان جۇمىس ىستەۋگە اۋىستىرىلادى. ەگەر جاعداي تۇراقتالسا، ولار اۋعانستانعا ورالادى. بۇل تۋرالى 18 تامىز، سارسەنبىدە بۇۇ باس حاتشىسىنىڭ رەسمي وكىلى ستەفان ديۋجارريك بريفينگتە ايتتى، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
"بىرىككەن ۇلتتار ۇيىمى قىزمەتكەرلەرىنىڭ ءبىر توبى بۇگىن كابۋلدان قازاقستانعا، الماتىعا كەتىپ جاتىر. ولار جۇمىسىن قاشىقتان جالعاستىرادى", - دەپ حابارلادى ديۋجارريكتىڭ ءسوزىن ريا نوۆوستي.
ونىڭ ايتۋىنشا، اۋعانستانداعى بۇۇ-نىڭ 100-گە جۋىق قىزمەتكەرى الماتىدا جۇمىس ىستەيدى دەپ جوسپارلانعان، ولار جاعداي تۇراقتالعان كەزدە ورالادى.
بۇل ارادا قازاقستاننىڭ سىرتقى ىستەر مينيسترلىگى مالىمەتىنشە، اۋعانستانداعى ىشكى ساياسي احۋالدىڭ ۋشىعۋىنا بايلانىستى بۇۇ قازاقستاننان اۋعانستانعا كومەك كورسەتۋ ميسسياسىن (UNAMA) جانە الماتىداعى بۇۇ-نىڭ باسقا دا اگەنتتىكتەرىن ۋاقىتشا كوشىرۋدى سۇراعان.
"قازاقستان مەن بۇۇ-نىڭ جان-جاقتى ءوزارا ءىس-قيمىلى رۋحى شەڭبەرىندە جانە وسى ۇيىمنىڭ تولىق قۇقىقتى مۇشەسى رەتىندەگى مىندەتتەمەلەرى اياسىندا پرەزيدەنت قاسىم-جومارت توقاەۆ بۇۇ ءوتىنىشىن قولداۋ تۋرالى شەشىم قابىلدادى", - دەلىنگەن حابارلامادا.
18 تامىزدا UNAMA قىزمەتكەرلەرى بار العاشقى بورت الماتى اۋەجايىنا قوندى. ءسىم الماتى اكىمدىگى، قۇزىرەتتى ۆەدومستۆولار جانە قىزمەتتەرمەن بىرلەسىپ، ولاردى ورنالاستىرۋ بويىنشا جەدەل تۇردە قاجەتتى شارالاردى قابىلداپ جاتىر. كەلگەن قىزمەتكەرلەر حالىقارالىق ديپلومات، بۇۇ پاسپورتى مەن يممۋنيتەتى يەگەرى.
الماتىدا UNAMA جانە باسقا دا بۇۇ اگەنتتىكتەرىنىڭ كەڭسەلەرىن ورنالاستىرۋ جانە ولاردىڭ ودان ءارى قىزمەت ەتۋى ۋاقىتشا، ياعني اۋعانستانداعى جاعداي تۇراقتالعانعا دەيىن، شامامەن جارتى جىلعا سوزىلادى دەپ كۇتىلەدى.
قىزمەتكەرلەردىڭ تۇرۋى، كەڭسە مەن ءۇي-جايلارىن جالعا الۋى جانە ت.ب. بارلىق شىعىستى تولىعىمەن بۇۇ-نىڭ بيۋدجەتىنەن قارجىلاندىرىلادى.
